Keimon lidoun ariñahani

Keimon lidoun libiaman menú

Gefentiña luagu Heowá

Garifuna

Afiñetiña san gefentiña luagu Heowá tuagu Binadu Daradu?

Afiñetiña san gefentiña luagu Heowá tuagu Binadu Daradu?

Anha. Chouru wamuti, wagía gefentiña luagu Heowá, sun lan le bürüwañubei tidan Bíbülia “Bungiu guánarügü [lan] íchugubalin haritagunrugun wügüriña lun habürüdüni, ani huutu” (2 Timotéu 3:16). Ani tídanñoun Lererun Bungiu dandu Binadu kei Iseri Daradu. Kei mabusenrun wabéi, wagía gefentiña luagu Heowá, lun lasaminarúniwa mahuudun haali lan fánreinti tídangiñeti Bíbülia le unbei hagúara gürigia Binadu Daradu, himei wamuti wagúarun lun Abürüdǘni Ebüréu. Ánheinti lun fánreinti le unbei hagúara gürigia Iseri Daradu ligía unbei wagúara Abürüdǘni Güriegu Kristiánu.

Ka uagu megei habarun kristiánugu dandu Binadu Daradu kei Iseri Daradu?

Adügati Bungiu lun labürüdüni apostolu Pábulu dimurei burí le: “Sun le ariñawagúbei tidan Lererun Bungiu lúmagiñe binarü, lun larufudahóun woun labürühóua” (Rómana 15:4). Ligía gayara lubéi wachoururuni anihein lan ariñahani wéiriti lisudinin tidan Abürüdǘni Ebüréu. Lidan burí katei le ariñawagúbei, daritiwa abahüdaguni luáguti dan le sügühalibei luma burí adundehani le huuti woun.

  • Sügǘ súdiniti lidan binadu dan. Lidan Abürüdǘni Ebüréu, abahüdawagúati woun ida liña lan laranseruni Bungiu Ubóu luma ida liña lan hábürühan gürigia lábugiñoun lubafu figóu. Seremei anihein lan ariñahani le ñein wasubudirunbalin halíagiñe lan wayabin ani ka lan uagu wóunwegua (Agumesehani 2:7, 17). Lanwoun lira, afuranguagüda lumuti giñe Abürüdǘni Ebüréu ida liña lan líderaguniña Bungiu gürigia ha meha ásügürübaña lídangiñe lénrengunga libe le úmabei wagagibudagua uguñe weyu (Santiagu 5:17).

  • Adundehani le huuti woun. Tidan burí líburu to gíriboun Ariñawagúni luma Apurichihati, to wadariruboun lidan Abürüdǘni Ebüréu, daritiwa saragu adundehani le huuti lun wabagari uguñe weyu. Rutu adundehani libügürü katei kéiburi ida luba lan gunda lan habagari iduheñu (Ariñawagúni 15:17), ida luba lan warihini wadagimanu keisi lubudubu (Ariñawagúni 10:4; Apurichihati 4:6), luma ka lan gayaraabei hadügüni nibureingiña lun buídutima lan ligaburi hanügüni habagari (Apurichihati 11:9–12:1).

Wéiriti giñe lahuudun waturiahani Lúrudu le líchugubei Bungiu lun Moisesi le wadarirubei tidan seingü furumiñetu líburu to tídanboun Bíbülia. Lau sun mama lan mosu hagunfulirun kristiánugu lau lúrudu burí le, daritiwa adundehani méiniti lidan le íderagubaliwa lun gunda lan wabagari (Fádirigu 19:18; 2 Lúrudu 6:5-7).