Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Uganu buiti lúmagiñeti Bungiu

 LEKSIÓUN 3

Inarüni san lúmagiñe lan Bungiu liabin uganu buiti?

Inarüni san lúmagiñe lan Bungiu liabin uganu buiti?

1. Ka abürügüdǘbarun Bíbülia?

Lubuidun uganu luagu wawinwanduba lan lun súnwandan ubouagu, dariwati tidan Bíbülia (Sálumu 37:29). Anuhein 66 líburu tidan Bíbülia ani habürüdün 40 wügüriña úaraguatiña ha lanúadirubaña Bungiu. To furumiñetu seingü líburu labürüdün Moisesi 3,500 irumu guentó, ánhounti to tagumuhóun labürüdün apostolu Huan 1,900 irumu guentó. Ka isaminan tídanbei Bíbülia? Yusu lumuti Bungiu lani sífiri sandu lun lasubudiragüdüni lisaminan houn wügüriña ha abürühabarun Bíbülia (2 Samueli 23:2). Lisaminan Bungiu habürühabei wügüriña hagía, mama hasaminan guánarügü. Lererun lubeiti Heowá tídanbei Bíbülia. Aliiha huméi 2 Timotéu 3:16 luma 2 Féduru 1:20, 21.

2. Ka uagu gayara lubéi wachoururuni inarüni lan sun le tídanbei Bíbülia?

Chouru wamuti lúmagiñetu lan Bungiu Bíbülia lugundun lubaragiñe lasuseredun katei bürüwaali tidan ani susereti ítara kei labürüdǘn, katei le siñá hamuti gürigia adüga (Hosué 23:14). Búngiurügüñein le suntigabafu gayara ladügüni. Aliiha huméi Isaíasi 42:9 luma 46:10.

Anhein lúmagiñe lubéi Bungiu tiabin aban líburu, agurabatiwa espechaliboun lan. Afanreinhouaru saragu milu míñunu Bíbülia lidan saragu san iñeñein. Íbini lúmagiñetu lan binadu dan úaratu luma siensia. Ani úati sigenei lidan le habürühabei 40 wügüriña ha abürüdübarun. * Lidan kada tubana arihúati línsiñehabu Bungiu ani íbini uguñe weyu, gabafutu Bíbülia lun tasansiruni habagari gürigia sunsuinagubei. Ligíati chouru habalin saragu míñunu gürigia luagu Lererun lan Bungiu Bíbülia. Aliiha huméi 1 Tesalónikana 2:13.

 3. Ka uagu tayanuha Bíbülia?

Ayanuhatu Bíbülia luagu lubuidun lisuuni Bungiu houn gürigia. Abahüdaguatu luagu leferidiruni wügüri chansi lun lawinwandun lidan aban paraísu lúmagiñe furumiñeti dan, ani afuranguagüda tumuti ida luba lan ladügǘnya ubóu paraísume. Aliiha huméi Arufudúni 21:4, 5.

Tidan Bíbülia anihein lúrudu, eweridihani luma inarüni le adundehabaliwa lidan wabagari. Ariñaga tumuti woun ida liña lan lóuseruniña Heowá gürigia lun wasubudiruni ka lan ligaburibei. Ligíati, íderagua tumutiwa Bíbülia asubudirei Bungiu. Arufudahatu giñe woun ida luba lan wadügün umadaguaü luma. Aliiha huméi Sálumu 19:7, 11 luma Santiagu 2:23 luma 4:8.

4. Kaba íderaguawa lun gunfuranda wamanu Bíbülia?

Lun “gunfuranda hamanu Lererun Bungiu”, aba burí meha layusurun Hesusu somu bérusu, lárigiñe aba lafuranguagüdüni. Ítarameme luba ligaburi tarufudahan garüdia to lun tíderaguniwa lun buídutima lan gunfuranda wamanu Bíbülia. Aliiha huméi Lúkasi 24:27, 45.

Chouru wamuti gúndaabadün lan lau hafurendeirun luagu uganu buiti le lúmabei Bungiu wabá. Gama lumoun, añahein gürigia úati súdini lan le houn, ani añahein hagía mínsiñegubeiti houn layanuhóun houn luagu Bungiu. Mígira humá lun hadügün gürigia ha lun hígiruni hafurendeirun lugundun ariñagatu Bíbülia ha lan afurendeirutiña luagu Bungiu gayarabei lan hawinwandun lun súnwandan. Aliiha huméi Huan 17:3.

 

^ par. 3 Ariha humóun garüdia Bíbülia ka uganu tídanbei?