Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Uganu buiti lúmagiñeti Bungiu

 LEKSIÓUN 7

Larúeihan Bungiu, katei san?

Larúeihan Bungiu, katei san?

1. Larúeihan Bungiu, katei san?

Ka uagu Hesusu lubéi urúei le buídutimabei? (MÁRÜKOSU 1:40-42)

Aban arúeihani sielu le lunbei lagumuchun lau sun arúeihani ubouaguna yarafa madise ani libihiba lun ladügǘn lugundan Bungiu ya ubouagu keisi ladügǘniwa sielu. Larúeihan Bungiu, ligía agumadihani le hemegeirubei gürigia, ladügüba lun úara hamá sun gürigia lidan sun ubóu. Ma buiti ñunsu le? Aliiha huméi Danieli 2:44; Matéu 6:9, 10, luma 24:14.

Kei le sun lubéi arúeihani mégeiti aban urúei, írida laali Heowá Hesukrístu le Liráü Urúeime lidan Larúeihan. Aliiha huméi Arufudúni 11:15.

2. Ka uagu Hesusu lubéi urúei le buídutimabei?

Liráü Bungiu urúei le buídutimabei lugundun areidati ani óuserati lau irichaü (Huan 1:14). Gabafuti giñe lun líderaguniña gürigia, ani layusurubei ubafu ligía danme le larúeihani Ubóu siélugiñe. Lárigiñebei láguyugun Hesusu, aba lawarirun sielun ñein lubéi lagurabaha luéigiñe lóunwenren Bungiu (Ebüréu 10:12, 13). Lagumuhóun, aba líchuguni Bungiu ubafu lun lun lagumadihan. Aliiha huméi Danieli 7:13, 14.

3. Harúeihaba san amu gürigia luma Hesusu?

Ariñagatu Bíbülia harúeihaba lan fiú gürigia luma Hesusu. Lidan Danieli 7:27 wáwati houn “lumutuniña Bungiu [“sandu”, NM]”. Lánigu Hesusu apostolu hagía furumiñetiña gürigia lanúadirun Bungiu lun sandu hamá. Uguñe weyu, anihagua Heowá anúadira wügüriña hama würiña ha derebuguti hafiñen lun giñe sandu hamá. Ítara kei meha Hesusu, háguyuguba gürigia burí ha lau aban úgubu le hani sífirigu lun houdin sielun. Aliiha huméi Huan 14:1-3 luma 1 Korintuna 15:42-44.

 Átiribaña san ñǘdüntiña sielun? Ariñagatu Bíbülia murusunrügübaña lan, wati Hesusu houn “mudún míbetiña” (Lúkasi 12:32NM). 144,000 gürigia hagíaba arúeihei Ubóu luma Hesusu. Aliiha huméi Arufudúni 14:1.

4. Ka asuseredubei dan le lagumeserunbei Hesusu arúeiha?

Gumeseti Hesusu arúeiha lidan irumu 1914, ani furumiñeti katei le ladügübei, lasagaruni Satanási hama lumafianu siélugiñe aba lachüürüniña múarugun. * Lau lanarime igañi, aba lagumeserun Mafia agubuha turóbuli ubouagu (Arufudúni 12:7-10, 12). Lúmagiñe dan ligía, wuribatimarügüti katei ubouagu. Anihein wuribu, hárabaganali, sandi luma ilamaü, sun le lagunfuliruña aban profesía le arufudubalin málühali lan Larúeihan Bungiu agumadiha ubouagu sunsuinagubei. Aliiha huméi Lúkasi 21:7, 10, 11, 31.

5. Ka ladügübei Larúeihan Bungiu guentó ani kaba ladüga ámuñegü?

Lau wadagimanu lánina apurichihani lidan sun ubóu, lóundaraguña Larúeihan Bungiu “saragu gürigia” lídangiñetiña sun néchani. Saragu míñunu gürigia haruma tanigi hawinwanduña lábugiñe larúeihan Hesusu. Súngubei hesefuruba danme le lagünrinchaguni Larúeihan Bungiu ubóu wuribati le. Ligíati, anhein busén wabéi wawinwandun lun warihini le lunbei ladügüni Larúeihan Bungiu, mosu gaganbadi wamá lun Hesusu. Aliiha huméi Arufudúni 7:9, 14, 16, 17.

Lidan milu irumu, ladügüba Arúeihani le lun lagunfulirun le lisuunibei Bungiu houn gürigia ubouagu lúmagiñe furumiñeti dan. Ladügǘba Ubóu paraísume. Lagumuhóun, ábame lagiribudagüdüni Hesusu Arúeihani lun Lúguchi (1 Korintuna 15:24-26). Hínsiñeti hamuga san hun habahüdahan lun somu gürigia luagu Arúeihani le? Aliiha huméi Sálumu 37:10, 11, 29.

 

^ par. 6 Lun hibihin lanwoun ariñahani luagu profesía le ayanuhabei luagu irumu 1914, akutiha huméi páhina 215 darí 218 tidan líburu Kátima san tarufudahabei Bíbülia?

Lanwoun ariñahani

Kátima san tarufudahabei Bíbülia?

Wawinwanduña san lidan “lagumuhóun dan”?

Arufuda lumuti ligaburi hóuserun luma hagaburi gürigia ha geyegubaña wau wawinwanduña lan lidan “lagumuhóun dan” le uágubei tadimureha Bíbülia lidan profesía.

KÁTAÑA SAN ADÜGÜBALIN LUGUNDAN HEOWÁ UGUÑE WEYU?

Ida liña haransehóun gefentiña luagu Heowá lun hapurichihan?

Dan le wapurichihan, falá wamuti hénpulu le meha líchugubei Hesusu dan meha ya lubéi ubouagu. Ka meha lídangiñe ligaburi apurichihani layusurubei?