Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Uganu buiti lúmagiñeti Bungiu

 LEKSIÓUN 13

Ka tarufudahabei Bíbülia luagu le lunbei lasuseredun lun relihión ámuñegü?

Ka tarufudahabei Bíbülia luagu le lunbei lasuseredun lun relihión ámuñegü?

1. Buiti san sun relihión?

Lidan sun relihión añahein gürigia buítiña. Ani buiti wasubudiruni luagu berese lan Bungiu hau ani gebegitiña ligibugiñe. Gama lumoun, adügǘwaali saragu katei wuribati lidan liri relihión (2 Korintuna 4:3, 4; 11:13-15). Aganbaadiwa burí lidan ñunsu luagu dágua lan fiú relihión lungua lidoun anarimeni le anufudedagüdübaliñu gürigia, háfarawagun saragu gürigia ha lílana somu néchani, wuribu luma houserún irahüñü wuriba o harufudahan katei luáguti agamariduni houn. Sun le adügati lun mabusenrun hamá gürigia haruma tanigi hasubudirun ni kata luagu relihión. Aliiha huméi Matéu 24:3-5, 11, 12.

Lidan aniha lan relihión inarüniti íchiga uériguni lun Heowá, aniha relihión mama inarüniti adüga katei le mínsiñeti lun. Arufudahati saragu iyeeni luagu Bungiu, luagu le asuseredubei houn hilaaña luma amu burí katei le úati tidan Bíbülia. Gama lumoun busenti Heowá lun hasubudiruni gürigia inarüni luagu. Aliiha huméi Apurichihati 9:5, 10 luma 1 Timotéu 2:3-5.

2. Ka tarufudahabei Bíbülia luagu le lunbei lasuseredun lun relihión ámuñegü?

Meyeedun hamuti lílana relihión Bungiu lau hariñagun hínsiñe lan houn, ani le linarün katei ubóu le lani Satanási hínsiñetimabei houn (Santiagu 4:4). Tidan Bíbülia, wáwati lun lóundarun sun relihión mama inarüniti “Babilónia to wéiriboun”, iri Babilónia liri meha binadu uburugu le ñein lubéi lagumesera relihión mama inarüniti lárigiñe Guran lidan lidaani Noé. Yarafa madise, sódinibei lagumuchun Bungiu lau sun relihión burí le eyeehabaliña gürigia ani adüga ligía dañu houn. Aliiha huméi Arufudúni 17:1, 2, 5, 16, 17 luma 18:8.

Gama lumoun, mabulieidagunti Heowá hawéi gürigia buítiña ha eferidiragubaña lidan burí relihión mama inarüniti  ubouagu ani lóundaraguñanu. Ida? Lau larufudahani inarüni houn. Aliiha huméi Mikeasi 4:2, 5.

3. Ka lunbei hadügüni gürigia haruma tanigi?

Adügati relihión le inarüniti lun ñein lan úarani

Bereseti Heowá hau gürigia ha hínsiñehabubaña lun inarüni ani busén hagía hadügüni le buídubei. Ligía lamisurahanbaliña lun háfuridun lídangiñe relihión mama inarüniti. Anhein inarüni lubéi hínsiñe lan houn, hadügüba asansiruni lidan habagari lun hagundaaragüdüni. Aliiha huméi Arufudúni 18:4.

Lidan furumiñeti sígulu, dan le hapurichihanbalin apostolugu uganu buiti, óunabatiña saragu gürigia richaguatiña lau ugundani. Arufudahati meha Heowá houn gürigia hagía lun hawinwandun aban iseri ibagari le buinbei lau ugundani, isuuni luma emenigini. Ítara kei hagía, mosu giñe wóunabun buidu lun uganu buiti lau wíchuguni Heowá lidan furumiñeti lúgaaru lidan wabagari. Aliiha huméi 1 Tesalónikana 1:8, 9 luma 2:13.

Gürigia ha ígirubalin relihión le mama inarüniti lun hebelurun lidoun le inarüniti, buiti leresibiruniña Heowá. Sun hagía gúndaatiña lau aban umadaguaü buiti luma Heowá, lau ínsiñeni le hádanbei íbirigu luma lau emenigini luagu aban ibagari magumuchaditi. Hínsiñeti hamuga san hun heresibiruni abinirúni burí le? Aliiha huméi Matéu 19:29 luma 2 Korintuna 6:17, 18.

4. Kaba ladüga Bungiu lun ñein lan ugundani lidan sun Ubóu?

Danme le lagumuchun Heowá lau relihión mama inarüniti, lanügüba awalidaguni lun ubóu. Meyeehandigia hamaañame gürigia ani madügün hagíame lun ñein lan fánreinguaü. Sun gürigia háhuduraguba lun ábanrügü Bungiu inarüniti. Ma buiti uganu le? Aliiha huméi Arufudúni 18:20, 21 luma 21:3, 4.

 

Lanwoun ariñahani

Kátima san tarufudahabei Bíbülia?

Áhuduraguni le aubei lagundaara Bungiu

Sisi katei le arufudubalin kátaña lan lídanbaña relihión inarüniti

Kátima san tarufudahabei Bíbülia?

Luéigiñe humá lóubadina áhuduraguni le inarüniti

Ka turobuli úmabei gayara lan wadunragun dan le wadimurehan luagu wafiñen houn amu? Ida luba wadügüni sin wagañidagüdüniña?