Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Uganu buiti lúmagiñeti Bungiu

 LEKSIÓUN 10

Ida luba wasubudiruni ka lan relihión inarünibei?

Ida luba wasubudiruni ka lan relihión inarünibei?

1. Ábanrügüñein san relihión inarüniti?

“Góunigi humá hawéi profetagu yéetiña.” (MATÉU 7:15)

Ábanrügüñein relihión larufudahan Hesusu houn lani disipulugu, relihión le inarünibei, le konpararü lubéi luma aban émeri le anügübei lidoun ibagari magumuchaditi ani murusunrügüñanu gürigia adarirei (Matéu 7:14). Lúnrügüñein áhuduraguni le ídanbei layusurúa inarüni le tídanbei Bíbülia lánhara Bungiu, ani ha áhuduragubaña lun según inarüni ligía úaratiña lidan ábanrügü afiñeni. Aliiha huméi Huan 4:23, 24; 14:6 luma Éfesuna 4:4, 5.

2. Ka meha lariñagubei Hesusu hawagu kristiánugu mama inarünitiña?

“Ariñagatiña luagu subudi lan Bungiu houn; gama lumoun lau burí katei le hadügübei, arufuda hamuti luagu ibidiñe lan houn.” (TITU 1:16)

Ariñagati meha Hesusu hayabinburiba lan profetagu yéetiña ha lúnbaña hawiyeduni hadamurin kristiánugu. Arufudaguatiña gürigia burí ha houngua kei kristiánugu ani ariñagatiña giñe kristiánu tan haligilisin. Íbini ariñaga hamá hámañein lan inarüni eyeeharügü hamutiña gürigia. Gayarati wasubudiruni ka lan relihión inarünibei, lugundun arufuda hamuti lílana lau ligaburi hawinwandun kristiánugu hamá inarünitiña. Aliiha huméi Matéu 7:13-23.

3. Ida luba hasubudirúniwa kristiánugu ha inarünitiña?

Akutiha wamá seingü katei le íderagubaliwa asubudiraña:

  • Inebetu Bíbülia houn keisi Lererun Bungiu. Lubaragiñe hígiraguagüdün houngua lun harufudahan wügüriña, áfaaguatiña  lun gaganbadi hamá lun adundehani le tídanbei Bíbülia (Matéu 15:7-9). Winwan hamuti giñe le hapurichihabei. Aliiha huméi Huan 17:17 luma 2 Timotéu 3:16, 17.

  • Rútiña inebesei lun liri Bungiu, Heowá. Adüga lumuti Hesusu le lau lasubudiragüdüni liri Lúguchi. Ayanuhati houn gürigia luagu Heowá arufudahati giñe houn lun hamuriahan lidan furíei lun inebewa lan iri le (Matéu 6:9). Ka relihión asubudiragüdübalin liri Bungiu lidan fulasu le ñein lubéi heredera? Aliiha huméi Huan 17:26 luma Rómana 10:13, 14.

  • Apurichihatiña luagu Larúeihan Bungiu. Ounahóuati Hesusu ubouagun lun lapurichihani uganu buiti luagu Larúeihan Bungiu, lugundun ligíarügüñein emenigini houn gürigia ubouagu. Ani adüga lumuti darí luéyuri lounwen (Lúkasi 4:43; 8:1; 23:42, 43NM). Ariñagati giñe hayanuhaba lan lani disipulugu luagu arúeihani ligía. Ligíati, anhein achülüra somu gürigia humoun lun layanuhan hun luagu Larúeihan Bungiu, ka funa lánibei gürigia ligía relihión? Aliiha huméi Matéu 24:14.

  • Mama lánigu ubóu wuribati le hagía. Mádaraguntiña lánigu Hesusu disipulu houngua lidoun polítika, ni lidoun hawuribuhan gürigia hámagua (Huan 17:16; 18:36). Máyeihan hamuti giñe échuni luma igaburi wuribati le lídanbei ubóu le. Aliiha huméi Santiagu 4:4.

  • Furanguti larihín ínsiñeni le hádanbei. Furendeihaña tidan Lererun Bungiu lunti lan inebe hamá sun gürigia houn íbini ha lídangiñetiña amu burí rasa. Libe-agei dan, ídehatiña lílana relihión mama inarüniti lidan wuribu, ánheinti kristiánugu inarünitiña madügün hamuti (Mikeasi 4:1-3). Lubaragiñe lira, yusu hamuti hadaani luma haseinsun lun híderaguniña gürigia luma lun híchugun dǘgüdaguaü houn magurabunga hibihin somu katei hámagiñe. Aliiha huméi Huan 13:34, 35 luma 1 Huan 4:20.

4. Gayarati san hasubudiruni ka lan relihión inarünibei?

Ka san relihión ayusurubarun Bíbülia lébuname harufudahan, rútiña inebesei lun liri Bungiu ani adimureha hagía houn amu luagu Larúeihanrügüñein lan Bungiu emenigini houn gürigia ubouagu? Ka san ábanrügü relihión ídanbei larihíwa ínsiñeni le inarüniti ani mádaraguntiña houngua lidoun wuribu? Ka hisaminabei? Aliiha huméi 1 Huan 3:10-12.

 

Lanwoun ariñahani

Kátima san tarufudahabei Bíbülia?

Áhuduraguni le aubei lagundaara Bungiu

Sisi katei le arufudubalin kátaña lan lídanbaña relihión inarüniti