Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Uganu buiti lúmagiñeti Bungiu

 LEKSIÓUN 14

Ka uagu mosu lubéi lidan hamá aban óundaruni lubúeingu Bungiu?

Ka uagu mosu lubéi lidan hamá aban óundaruni lubúeingu Bungiu?

1. Ka meha uagu lóundaraguaña Bungiu binadu ísüraelina?

Adügati meha Bungiu aban buiti aransehani lun lóundaraguniña ladügawagun Abüraámü lun aban hamá néchani, ani ruti saragu lúrudu houn. Wati lun néchani ligía “Ísüraeli” ani ru lumuti kárugu houn lun hóunigiruni áhuduraguni inarüniti luma lererun Bungiu (Sálumu 147:19, 20). Seremei aransehani ligía, gayarati meha hibihin lílana sun le líbiri néchani abinirúni. Aliiha huméi Agumesehani 22:17, 18.

Bungiu anúadirubaliña ísüraelina lun lánigume gefentiña. Sun le meha asuseredubei lidan habagari binadu néchani ha, arufudati barǘ lan gaganbadi lun lilurudun Bungiu buiti resultóu (2 Lúrudu 4:6). Hádangiñe ísüraelina gayarabei meha hibihin amu néchani chansi lun giñe hasubudiruni Bungiu le inarüniti. Aliiha huméi Isaíasi 43:10, 12.

2. Ka uagu mosu lubéi óundaragu hamá kristiánugu inarünitiña?

Dan le heferidirunbalin ísüraelina lufulesein Bungiu, aba lóundaraguni Heowá damuriguaü hani kristiánugu heweñeguame (Matéu 21:43; 23:37, 38). Guentó, kristiánugu inarünitiña eseriwidubaña lun Heowá kei lánigu gefentiña, mama ísüraelina. Aliiha huméi Adügaü 15:14, 17.

Óundaragua lumutiña Hesusu lani disipulugu lun hapurichihan luma lun hadügün disipulugu lidan sun ubóu (Matéu 10:7, 11; 24:14; 28:19, 20). Guentó, lidan lagumuhóun dan lidan ubóu le, wéiritimahali lapurichihóun uganu buiti lidan sun ubóu. Lidan dan le, lóundaraguña Heowá saragu míñunu gürigia lídangiñetiña sun néchani lun hóundarun lidan relihión le inarünibei (Arufudúni 7:9, 10). Kei óundaraguhaña lubéi kristiánugu inarünitiña, gayarati híchugun gurasu luma ídemuei hóuniwagua. Ani súngubei hagía resibi hamuti ligiaméme arufudahani tídangiñeti Bíbülia lidan hadamuridagun. Aliiha huméi Ebüréu 10:24, 25.

 3. Ida liña hagumeserun gefentiña luagu Heowá ha lídanbaña dan le?

Gumeseti óundaruni le lidan burí irumu 1870. Gumeseti aban liraüraü sétanu hani aturiahatiña Bíbülia adarira iseri inarüni tidan Bíbülia le meha aramudañubei luagu saragu dan. Subudi hamuti meha óundaragua laaña lan Hesusu lílana damuriguaü hani kristiánugu lun hapurichihan, ligía aba lubéi hagumeserun íchigei uganu luáguti Larúeihan Bungiu lidan besafu ageiraü. Lidan irumu 1931 resibi hamuti iri, gefentiña luagu Heowá. Aliiha huméi Adügaü 1:8; 2:1, 4, 11, luma 5:42.

4. Ida liña aransehani hadan gefentiña luagu Heowá?

Lidan furumiñeti sígulu, sun damuriguaü hani kristiánugu ha lídanbaña ámuñegueinarügü fulasu ubouagu lábugiñeñanu meha laríaahan aban sétanu le arihibei lau damuriguaü lidan dan ligía, ani ariha lumuti Hesusu keisi Lichügüdina damuriguaü (Adügaü 16:4, 5). Uguñe weyu, anihein giñe aban Sétanu le arihibei lau hawadigimari gefentiña luagu Heowá lidan sun ubóu, lidan sétanu le, kristiánugurügüñanu ha derebuguhali hafiñen lidan, ha arihibaña tau sun áfisi tánina Beteli lidan sun ubóu. Tidan burí áfisi to, sügügüdawatu garüdia lídangiñe aban iñeñein lidoun amu, imprimíruatu ani afanreinhóua tuguya agumeiraguagüdüni tídangiñetu Bíbülia lidan lóugiñe 600 iñeñei. Yusu hamutu lílana sétanu le Bíbülia lun híchugun gurasu luma adundehani lun lóugiñe san-milu damuriguaü le ídanbei añahein lan giñe wügüriña ha aransetiña lun hóunigiruniña lumutuniña Bungiu lau ínsiñeni. Aliiha huméi 1 Féduru 5:2, 3.

Anihein aransehani hadan gefentiña luagu Heowá lun hapurichihani uganu buiti ani adüga hagía disipulugu. Kei hadügüni apostolugu, apurichihatiña muna tuagu muna (Adügaü 20:20). Rútiña giñe aturiahani tídangiñeti Bíbülia houn ha hínsiñehabubaña lun inarüni. Ani mama ábanrügü óundaruni gefentiña luagu Heowá. Anihein aban iduheguaü wadan keisi íbirigu dandu wügüriña kei würiña, hínsiñeguatiwa wámagua ani tóunigi lumutiwa Wáguchi lau ínsiñeni (2 Tesalónikana 1:3). Ani kei lubúeingu Bungiu áfaaguatiwa lun wadügüni lugundan luma lun wíderaguniña ha híbiri gürigia, adügati le lun wagía lan iduheñu ha gúndaatimabaña lidan sun ubóu. Aliiha huméi Sálumu 33:12 luma Adügaü 20:35.