Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Uganu buiti lúmagiñeti Bungiu

 LEKSIÓUN 6

Anihein funa san somu emenigini houn hilaaña?

Anihein funa san somu emenigini houn hilaaña?

1. Ka san emeniginibei houn hilaaña?

Dan le meha ya lubéi Hesusu ubouagu, aba lidin Betania yarafa lun Herusalén. Dan le lachülürünbei, sügühali gádürü weyu lúmagiñe lounwen Lásaru le lumada. Aba lidin Hesusu hama lítunu hilaali, Marta tuma María lubadun lumúaha Lásaru, ani lidan murusun oura aba habuinchagun gürigia ñein. Samina humá san luagun lueirin ugundani le hasandirubei Marta tuma María dan le harihini láguyuguagüdüni Hesusu hati. Aliiha huméi Huan 11:21-24, 38-44.

Lidan uganu buiti anihein emenigini luagu hásaarayaba lan hilaaña. Furendeiharu meha Marta füramase haali lan Heowá lásaaragüdüniña hilaaña lunya hawinwandun ubouagu. Aliiha huméi Isaíasi 26:19.

2. Ka asuseredubei houn hilaaña?

Ariñagati meha Bungiu lun Adán: “Lídangiñe múa badügǘwa basaliraguayaba múame” (AGUMESEHANI 3:19)

Lídangiñe múa hadügǘwa gürigia (Agumesehani 2:7; 3:19). Mama sífirigu wagía ha awinwandutiña lidan úgubu lauti ǘgürügü luma abun. Dan le wóunwegun úati ni kata erederuti wínwanñu wadan, íbini wasesun hilati ábati masaminarunhadiwa lan. Masanditiña hilaaña ni kata. Ligía mabahüdagun lubéi Lásaru ni kata dan le láguyugunbei lídangiñe óunweni. Aliiha huméi Apurichihati 9:5, 6, 10.

Añahein gürigia afiñetiña anihein lan aban máfiougati le ñein lubéi lasufuriragüdaña Bungiu gürigia lárigiñe hounwen,  gama lumoun iyeeni lira. Kei aubei warihei, ibidiñeti ni kata houn hilaaña. Iyeeni lubeiti le arufudahóubei luagu máfiougati, ani adügati lun layanuhóun wuriba luagu Heowá. Mínsiñeti lun Heowá nírügü lun lasaminarun luagu lasufuriragüdüniña gürigia lidan watu gemeti. Aliiha huméi Heremíasi 7:31.

3. Gayarati san layanuhóun hama hilaaña?

Siñati hayanuhan hilaaña ani maganbuntiña giñe (Sálumu 115:17). Gama lumoun, añahein saragu ánheligu wuribatiña ha gayarati hayanuhan hama gürigia, ábati hadügün lun hafiñerun gürigia hama lan haduheñu ha hilaañabaña hadimureha (Húdasi 6). Ligíati iyereegu lubéi lun Heowá wouchun wadimurehan hama hilaaña. Aliiha huméi 2 Lúrudu 18:10, 11.

4. Kaba san águyugua lídangiñe óunweni?

Saragu míñunu gürigia ha hilaguaañabaña, hásaarayaba lun hawinwandun ubouagu. Hásaarayaba íbini fiú ha masubudirunbalin Heowá ani adügatiña katei wuribati. Aliiha huméi Sálumu 37:29 luma Adügaü 24:15.

Ha lúnbaña háguyugun gayarabei hafurendeiruni inarüni luagu Bungiu, hafiñerun luagu Hesusu ani arufuda hameime gaganbadi hamá (Arufudúni 20:11-13). Anhein hadüga, hibihiba ibagari magumuchaditi ubouagu. Aliiha huméi Huan 5:28, 29.

5. Ka larufudahabei águyuguni woun luagu Heowá?

Lau águyuguni arufudahati Heowá woun hínsiñehabuti lan ani gudemehabuti. Seremei lóunahani Heowá Liráü lun líchuguni libagari wawagu, ligía wibihinbalin emenigini lánina águyuguni. Danme le hásaarun hilaaña, ka gürigia espechaliti habusenrubei harihin? Aliiha huméi Huan 3:16 luma Rómana 6:23.

 

Lanwoun ariñahani

Kátima san tarufudahabei Bíbülia?

Halíañanu san hilaaña?

Ka uagu wóunwegua? Halíañanu san hilaaña? Dariwati óunabagülei tidan Bíbülia.

Kátima san tarufudahabei Bíbülia?

Emenigini inarüniti houn iduheñu ha hilaañabaña

Hegeburihaña san? Warihayabaña san waduheñu hama wamadagu ha hilaguaañabaña? Ariha huméi le tarufudahabei Bíbülia luagu águyuguni.

Kátima san tarufudahabei Bíbülia?

Ka efekütu hánibei sífirigu wawagu?

Adimurehatu Bíbülia hawagu ánheligu hama máfianu. Inarünitiña san? Gayaraati san gabafu hamá lidan wabagari?