Keimon lidoun ariñahani

Keimon lidoun libiaman menú

Gefentiña luagu Heowá

Garifuna

Hínsiñeti hamuga san hun hasubudiruni inarüni?

Hínsiñeti hamuga san hun hasubudiruni inarüni?

INARÜNI, ka uagu? Luagu fiú lídangiñe álügüdahani súdiniti le adüga hamaalibei gürigia hóuniwagua. Íbini huguya gayaraati álügüdaguaadün lan hungua:

  • Bereseti funa san Bungiu wau?

  • Lachülürüba funa san dan lun lagumuchun wuribu luma asufuriruni?

  • Ka asuseredubei woun dan le wóunwegun?

  • Anihein funa san somu emenigini houn hilaaña?

  • Ida luba wafurieidun lun laganbuniwa Bungiu?

  • Ida luba wadarirun ugundani?

Halíaba hamuga san háluaha óunabagülei lun álügüdahani burí le? Anuhein saragu milu líburu ñein lubéi lariñawagúa anihein lan óunabagülei. Gama lumoun, ámuñegueinarügü óunabagülei wadarirubei tidan kada aban. Anuhein fiú rutu óunabagülei le genegeti gayara lan lahuudun, gama lumoun eibu lásügürün dan aba meseriwínhali lan, ábati haransehani o hasansiruni.

Gama lumoun, anuhein aban líburu to íchugutu óunabagülei le chóuruti ani inarüniti. Ariñagati meha Hesusu lun Bungiu lidan aban furíei: “Bererun [...] inarünibei” (Huan 17:17). Uguñe weyu subudiwatu Lererun Bungiu kei Bíbülia. Lidan le asigirubei warihiba fiú lídangiñe óunabagülei furanguti ani chóuruti le tíchugubei Bíbülia lun álügüdahani burí le.

 Bereseti funa san Bungiu wau?

KA LÉBUNABEI ÁLÜGÜDAHANI LE?: Wawinwanduña lidan aban ubóu buin lau furundei luma marichaü. Gíbeti relihión arufudahati luagu lugundan lan Bungiu wasufurirunbei.

LE TARUFUDAHABEI BÍBÜLIA: Maweiyasunti Bungiu adüga wuribani. Ariñagati Hobu 34:10: “Maritagua humá luagu adüga lan Bungiu Suntigabafu wuribani odi marichaü!”. Kei hínsiñehabu lubéi Bungiu, gasuuniti houn sun gürigia, ligía larufudahanbei Hesusu lun wafurieidun ítara: “Wáguchi Bungiu le siélubei [...]. Ñǘbuinla barúeihan; adügüwalá bugundan ya ubouagu kei ladügǘniwa sielu” (Matéu 6:9, 10). Le linarün katei, wéiriti wínsiñe lun Bungiu darí lun ladügün aban óunwenbu sákürifisiu lun gayara lan lagunfulirun lisuuni (Huan 3:16).

Ariha huméi giñe Agumesehani 1:26-28; Santiagu 1:13, luma 1 Féduru 5:6, 7.

Lachülürüba funa san dan lun lagumuchun wuribu luma asufuriruni?

KA LÉBUNABEI ÁLÜGÜDAHANI LE?: Añaheingua saragu gürigia óunwegua ladüga wuribu. Ani sun wagía súfuritiwa luagu ámuñegueinarügü resun.

LE TARUFUDAHABEI BÍBÜLIA: Füramaseti Bungiu ladügüba lan lun ñein lan darangilaü lidan sun Ubóu. Lábugiñe Larúeihan Bungiu le siélubei, ‘mibihin hañame gürigia arufudahani lun wuribu’ ani ábame “hadaagun hu tídangiñe hefeinte” (Isaíasi 2:4). Lagumuchuba giñe Bungiu lau marichaü luma asufuriruni. Füramasetu Bíbülia houn sun gürigia: “Laragahabei [Bungiu] sun háguira; úaalime óunweni ni ayahuni ni íruni ni igarigu, ladüga sügüha furumiñeti burí katei [íbini marichaü luma asufuriruni]” (Arufudúni 21:3, 4).

Ariha huméi giñe Sálumu 37:10, 11; 46:9, luma Mikeasi 4:1-4.

Ka asuseredubei woun dan le wóunwegun?

KA LÉBUNABEI ÁLÜGÜDAHANI LE?: Arufudahati libe-agei relihión anihein lan somu katei wadan le erederuti wínwanñu lárigiñe wóunwegun. Añahein ariñagutiña gayara lan hadügün hilaaña dañu houn ha wínwangiñabaña, o siadi lániña Bungiu wuribatiña lun hasufurirun lun súnwandan máfiougati.

LE TARUFUDAHABEI BÍBÜLIA: Dan le wóunwegun ñein lagumucha sun katei. Ariñagati Apurichihati 9:5: “Ánhaña ha hilaañabaña ibidiñeti ni kata houn”. Masubudiruntiña ni kata, masandirun ni kata ani madügün hagía ni kata, ligíati siñá lubéi hadügün dañu houn ha wínwangiñabaña ni híderaguniña lidan ni kata (Sálumu 146:3, 4).

Ariha huméi giñe Agumesehani 3:19 luma Apurichihati 9:6, 10.

 Anihein funa san somu emenigini houn hilaaña?

KA LÉBUNABEI ÁLÜGÜDAHANI LE?: Sun wagía busentiwa wawinwandun ani gunda wagíame lau wabagari úara hama gürigia ha hínsiñebaña woun. Ligíati adügübei lun wayumahani luéyuri háguyugun waduheñu ha hilaguaañabaña lídangiñe óunweni.

LE TARUFUDAHABEI BÍBÜLIA: Hibe-agei gürigia ha hilaguaañabaña habagaridayaba. Füramaseti Hesusu: “Lachülürüba dan lun haganbuni sun hilaguaaña numalali, ábame háfuridunga lídangiñe hamúaha” (Huan 5:28, 29). Gürigia ha lúnbaña háguyugun, gachansinbaña lun hawinwandun ya ubouagu luma lun harihini ida luba lan ladügǘn Ubóu paraísume kei labusenruni Bungiu lúmagiñe furumiñeti dan (Isaíasi 65:21-25). Le linarün katei, lídanme lubuidun dan ligía, sun gürigia ha úaraguabaña lun Bungiu hagundaaruba lau ibagari lun súnwandan luma lubuidun átuadi. Ariñagatu Bíbülia: “Galangantehabei gürigia buítiña múa, haganóuba giñe lidan súnwandan” (Sálumu 37:29).

Ariha huméi giñe Ebüréu 11:17-19; Lúkasi 7:11-17, luma Adügaü 24:15.

Ida luba wafurieidun lun laganbuniwa Bungiu?

KA LÉBUNABEI ÁLÜGÜDAHANI LE?: Lidan libe-agei relihión, furíeitiña gürigia. Gama lumoun, gíbetiña asaminarutiña luagu mounabún lan hafurieidun.

LE TARUFUDAHABEI BÍBÜLIA: Arufudahati meha Hesusu moun lumuti lan wáguyuguagüdüni ligiaméme dimurei saragu wéiyaasu dan le wafurieidun. Ariñagati ítara: “Lidan le hafurieidun, máguyuguagüda humá dimurei le málati” (Matéu 6:7). Anhein busén wabéi lun laganbuni Bungiu wafurieidun, mosu wadügüni kei le aubei labusenra. Ligíati mosu lubéi wafurendeiruni ka lan lugundanbei lun wafurieidun lun según le aubei lagundaara. Chóurugüda lumuti 1 Huan 5:14 katei le woun: “Subudi wamuti luagu ánhawa lan amuriaha furumiñeguarügü katei keisi lugundan, laganbubadiwa lan”.

Ariha huméi giñe Sálumu 65:2; Huan 14:6, 14, luma 1 Huan 3:22.

Ida luba wadarirun ugundani?

KA LÉBUNABEI ÁLÜGÜDAHANI LE?: Gíbetiña gürigia áluahatiña irisini, uéiriguni luma lun buídumeraü hamá, lugundun saminatiña lanügüba lan katei burí le ugundani houn. Gama lumoun, madaritiña ugundani.

LE TARUFUDAHABEI BÍBÜLIA: Arufuda lumuti Hesusu ida luba lan wadarirun ugundani dan le lariñagunbei: “Fuleseiwatiña ha asubudirubalin luagu megei hamani lídehan Bungiu” (Matéu 5:3). Wadariruba ugundani le inarüniti ánhawagubeirügü etenira lun létima wemegeirubei: wasubudiruni inarüni luagu Bungiu luma luagu lisuuni woun. Dariwati inarüni ligía tidan Bíbülia, ani dan le wasubudiruni íderagua lumutiwa asubudirei ka lan súdinitimabei. Dan le wígirun lun Bíbülia lan adundehawa dan le desidírü wamá luma lidan le wadügübei, gasuunitimati wabagari (Lúkasi 11:28).

Ariha huméi giñe Ariñawagúni 3:5, 6, 13-18 luma 1 Timotéu 6:9, 10.

 Akutihaadiwa murusun luagu óunabagülei le tíchugubei Bíbülia lun sisi álügüdahani. Busentün hasigirun afurendeira? Anhein hugía lubéi aban hádangiñe gürigia ha “asubudirubalin luagu megei hamani lídehan Bungiu”, chóuruti busenbadün lan hasigirun afurendeira. Háfuga álügüdaguaadün hungua ka lan uagu lígira Bungiu lun ñein lan saragu wuribani luma asufuriruni anhein inarüni lubéi berese lan wau. O háfuga busén humá hasubudiruni kaba lan hadüga lun buídutima lan hibagari hama hiduheñu. Rutu Bíbülia óunabagülei le buiti lun álügüdahani burí le luma lun amu.

Gama lumoun, gíbetiña gürigia mínsiñeti houn hakutihanu Bíbülia. Ariha hamutu kei aban líburu hanarimeti tueirin ani hénrenguti gunfurandawa tan. Hínsiñeti hamuga san hun hibihin ídemuei lun hadariruni óunabagülei le tíchugubei Bíbülia? Gúndaatiña gefentiña luagu Heowá lun híderagunün lidan biama manera.

Le furumiñeti manera tau líburu Kátima san tarufudahabei Bíbülia?, to adügǘboun lun tíderaguniña gürigia —hátima beresegubaña— lun hakutihani óunabagülei le tíchugubei Bíbülia lun álügüdahani burí le súdiniti. Le libiaman manera lau aban külase tídangiñeti Bíbülia húbiñe mafayeihanga. Gayarati lidin aban gefenti luagu Heowá íchiga külase hun lidan aban oura luma aban fulasu le hínsiñetimabei hun, lun lakutihanu Bíbülia huma murusun oura aban wéiyaasu luagu dimaasu. Ibihaaña saragu míñunu gürigia buiti lídangiñe külase burí le, ani gúndaatiña luagu darí hamaali lan inarüni.

Gayarati giñe hachoururuni hungua luagu siñá lan konpararua lan lebegi inarüni tídangiñeti Bíbülia luma ni kata. Sefu lumutiwa mámarügü luéi afiñeni le mébunati, luéi yuriguaü luma luéi anufudei le lanügübei fiú afiñeni, buíngüda lumuti giñe wabagari lau emenigini, ugundani luma isuuni. Hesusu guánarügü ariñagubei: “Ábame hasubudiruni inarüni, ábame lesefurunün inarüni” (Huan 8:32).

Lanwoun ariñahani

TATURIAHÓUN BÍBÜLIA

Ka uagu lunti lubéi haturiahanu Bíbülia?

Íderaguaaru Bíbülia saragu míñunu gürigia adarira óunabagülei lun lanarime burí álügüdahani le hadügübei hóuniwagua lidan habagari. Hínsiñeti hamuga hun huguya lan aban hádangiñe?