Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Kátaña san adügübalin lugundan heowá uguñe weyu?

 LEKSIÓUN 13

Ka mini lubéi prekursoru lan aban gürigia?

Ka mini lubéi prekursoru lan aban gürigia?

Canadá

Apurichihani muna tuagu muna

Aturiahani tídangiñeti Bíbülia

Waturiahanu Bíbülia wábugua

Dimurei prekursoru yúsuati lun aban gürigia le adaarubalin üma habá ha lúnbaña hayabin lárigiñe lidan aban fulasu le mapurichihounwagili. Aban meha prekursoru Hesusu, lugundun ounahóuati ubouagun lun lagumeserun aban ministeriu le íchuguti ibagari ani daraléi üma le lánina asalbaruni (Matéu 20:28). Uguñe weyu sigí wamuti lani Hesusu hénpulu ani yusu wamuti sun dan le wayaraati lun wadügün disipulugu (Matéu 28:19, 20). Añahein hagía heseriwiduña kei prekursorugu.

Aban prekursoru ligía aban apurichihati lidan dan dayarüti. Sun gefentiña luagu Heowá apurichiha wamuti uganu buiti. Gama lumoun, añahein aranseha hamuti habagari lun heseriwidun kei prekursorugu ha adügübaña ǘrüwa-wein-diisi oura sagü hati. Lun hadügüni, gíbetiña áluahatiña aban wadagimanu le lamidanrügüti weyu. Añahein amu íbirigu anuadirúatiña kei prekursorugu espechalitiña, ábati hounahóun lidoun fulasu le ñein lubéi mégeiwa hamá apurichihatiña; íbirigu ha adügatiña 130 oura luagu hati o lóugiñe lidan ministeriu. Sensiyuti hanügüni prekursorugu habagari ani afiñetiña líchugubei lan Heowá sun le hemegeirubei houn (Matéu 6:31-33; 1 Timotéu 6:6-8). Íbirigu ha siñabei heseriwidun kei prekursorugu ha adügütiña 70 oura o kei prekursorugu espechalitiña, gayarati heseriwidun kei prekursorugu ídehatiña, ha adügübaña dimí-san o darandi oura luagu hati.

Ínsiñeni luagu Bungiu luma hawagu gürigia ligía ínchahabaliña prekursorugu. Ítara kei Hesusu, rútiwa fe luagu lirun gádantiña gürigia ladüga libidiñe Bungiu houn (Márükosu 6:34). Gama lumoun, anihein aban subudi wama le gayarabei líderaguniña lúmagiñe guentó lau hasubudiruni emenigini le chóuruti luagu aban ibagari buítimati ámuñegü. Ínsiñeni hawagu amu gürigia ínchahabalin aban prekursoru lun layusuruni lidaani luma lere lun líderagun amu asubudirei Bungiu (Matéu 22:39; 1 Tesalónikana 2:8). Adügati le lun lederebugudun lafiñen luma lumadagua luma Bungiu, le adügübei lun gunda lan (Adügaü 20:35).

  • Ka mini lubéi prekursoru lan aban gürigia?

  • Ka ínchahabaliña fiú íbirigu lun heseriwidun kei apurichihatiña lidan dan dayarüti?