Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Kátaña san adügübalin lugundan heowá uguñe weyu?

 LEKSIÓUN 11

Ka uagu wóundaragua lidan burí adamurini wéinamuti?

Ka uagu wóundaragua lidan burí adamurini wéinamuti?

Méhiku

Yámani

Botsuana

Nigarawa

Italia

Ariha humuti san ugundani le harufudubei gürigia ha? Lídanñanu aban lídangiñe adamurini wéinamuti le wadügübei. Ítara kei lubúeingu Bungiu ha lánina binadu dan, ha únbaña lichugúa lúrudu lun hadamuridagun ǘrüwa wéiyaasu lidan irumu, gúndaatiwa giñe wóundaragun lidan adamurini wéinamuti (2 Lúrudu 16:16). Ǘrüwañein adamurini wéinamuti wadügün luagu irumu: bián adamurini lánina sirkuitu le aduraruti aban weyu kada aban luma aban adamurini le ǘrüwati weyu. Ka buiti lanügübei adamurini burí le woun?

Adügati lúntima laweiridun ínsiñeni le wádanbei kei íbirigu. Gúndaatiña meha ísüraelina lau halawahani Heowá “hañúarü lumutuniña”, ani wagía wéiriti giñe wagundan lau walawahani lidan burí ókaasion espechaliti úara hama wíbirigu (Sálumu 26:12; 111:1). Ruti adamurini burí le chansi woun lun wóundarun hama wíbirigu gefentiña luagu Heowá ha lídangiñetiña amu damuriguaü íbini hama ha lídangiñetiña amu ageiraü. Amidirugu hóutiwa úara lidan fulasu le ñein lubéi ladügǘwa adamurini, adügati le lun wederebudagüdüni wamadagua (Adügaü 2:42). Ñein wasandirei ínsiñeni le óundaragubaliwa keisi ‘iduheñu’ ha lídangiñetiña sun ubóu (1 Féduru 2:17).

Ídehati lun wawanserun lidan wafiñen. Ibihatiña meha ísüraelina buiti dan le “gunfuranda hamani” sun le arufudahóubei houn tídangiñe Lererun Bungiu (Neemíasi 8:8, 12). Ariñahani le weresibirubei lidan burí adamurini le, wéiriti giñe lebegi woun. Kada adamurini ayanuhati luagu aban tema tídangiñeti Bíbülia. Lau saragu yanu luma demostrasión arufudahóuati woun ida luba lan wadügüni lugundan Bungiu. Ani ruti giñe gurasu woun waganbun abahüdaguni hawagu gürigia ha agañeirubalin lénrengunga le burí hásügürübei kristiánugu lidan dan hénrenguti le. Lidan burí adamurini le ǘrüwati weyu adügǘwati drama tau daüguaü to lánina tidaani Bíbülia lun híchugun ibagari lun abahüdaguni tídangiñeti Bíbülia le ígirubei leksióun súdiniti woun. Ani lidan sun adamurini badiseiwatiña sun ha busenbaña harufuduni deregeguaaña lan houngua lun Bungiu.

  • Ka uagu aban lubéi burí ókaasion lánina saragu ugundani adamurini?

  • Ida luba líderagunün hidin lidan aban lídangiñe wani adamurini?

Lanwoun ariñahani

ADAMURINI

Liraüraü bidéu: Adamurini irumu-auti le hadügübei gefentiña luagu Heowá

Ariha huméi ka lan uagu hachülüra saragu míñunu gürigia lidoun adamuridaguni espechaliti le lidan sun ubóu.