Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Kátaña san adügübalin lugundan heowá uguñe weyu?

 LEKSIÓUN 23

Ida liña san tabürühóun luma tásügürawagüdün agumeiraguagüdüni?

Ida liña san tabürühóun luma tásügürawagüdün agumeiraguagüdüni?

Departamentu hani Abürühatiña (Meriga)

Corea del Sur

Armenia

Burundi

Sri Lanka

Lun wanügüni “uganu le magumuchaditi [...] houn sun néchanigu, rasa, luwuyerigu dimurei luma sun fulasu”, adügatiwa agumeiraguagüdüni lidan kéiburi sedü-san iñeñein (Arufudúni 14:6). Ida liña san wadügüni lanarime wadagimanu le? Lau hídehan saragu abürühatiña ha lídangiñetiña ámuñegueinarügü ageiraü hama kéiburi ǘrüwa-milu-ǘrüwa-san ásügüragüdütiña lidoun amu burí iñeñein, súngubei gefentiña luagu Heowá.

Lidan inglesi labürüdǘwa ariñahani furumiñe. Sétanu le arihibei lau hawadigimari gefentiña luagu Heowá lidan sun ubóu, ligía arihibei lau Departamentu hani Abürühatiña, le wadarirubei tidan áfisi to arihiboun tau sun Beteli lidan sun ubóu. Departamentu le, ligía aransehabalin hawadigimari abürühatiña ha nadagimeinbaña tidan áfisi to arihiboun tau sun Beteli luma hawadigimari ha tídanbaña amu burí áfisi hani gefentiña luagu Heowá. Kei añahein lubéi gürigia lídangiñetiña ámuñegueinarügü ageiraü lidan wadagimanu le, gayarati wayanuhan luagu tema le súdiniti houn gürigia ha lídangiñetiña ámuñegueinarügü ageiraü, huutu lubeiti wani agumeiraguagüdüni houn gürigia lidan sun ubóu.

Aba lounahóun ariñahani houn ha lúnbaña hásügüragüdüni lidoun amu burí iñeñein. Lárigiñe labürüdǘn ariñahani le ani anha ligía Sétanu le arihibei lau hawadigimari gefentiña luagu Heowá lun, aba lounahóun tau konputadora houn ha lúnbaña hásügüragüdüni lidoun amu burí iñeñein. Lárigiñe hásügüragüdüni, aba hachoururuni ua lan charati lidan. Áfaaguatiña ásügüragüdütiña ha lun hanúadahan “dimurei burí le richabei” lun hásügüragüdüni ligiaméme saminaü le lídanbei inglesi (Apurichihati 12:10).

Ídehatu konputadora lun furesetima lan wadagimanu. Siñati tadügüni konputadora luadigimari aban gürigia le abürühati o le ásügüragüdüti ariñahani lidoun amu iñeñein. Gama lumoun, gayarati tíderaguniwa lau burí katei le tídanbei, kéiburi dimurei-agei o amu burí katei lun wakutihan. Wagía gefentiña luagu Heowá adügaadiwa aban programa le gíribei Sistema Electrónico de Edición Plurilingüe (MEPS, ligía iri chátiti le libihibei lidan inglesi), seriwiti lun wíchugun ariñahani tidan konputadora lidan saragu iñeñein, wíchuguni lidan aban páhina lau dibuhu luma lun laransehóun lubá imprimírua lan.

Ka uagu wáfaagua saragu íbini luagu iñeñein le murusunrügüñanu gürigia ayanuhei? Lugundun busenti Heowá “lun hasalbarun sun gürigia, lun giñe hayabin lun hasubudiruni inarüni” (1 Timotéu 2:3, 4).

  • Ka wadagimanu lanügübei tabürüdǘn wani agumeiraguagüdüni?

  • Ka uagu wásügüragüda agumeiraguagüdüni lidoun saragu iñeñein?