Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

“Redei humá lidan línsiñehabu Bungiu”

 KAPÍTULU 5

Ka mini lubéi mama wamá ubouaguna

Ka mini lubéi mama wamá ubouaguna

‘Mámaadün ubouaguna.’ (HUAN 15:19.)

1. Ka lafuranguagüdübei Hesusu lagumuhóun áriebu le ya lubéi ubouagu kei wügüri?

ABAN guñoun lubaragiñe lounwen Hesusu arufuda lumuti lidiheri luagu ida luba lan meha lidin houn lani disipulugu. Ani ariñagati lun Lúguchi lidan aban furíei: “Mamuriahantina buma lun basagaruniña ubouagugiñe, namuriahan buma lun bóunigiruniña luéi wuribani. Ítara kei mama nan lani ubóu, mama giñe lani ubóu hagía” (Huan 17:15, 16). Lidan furíei le ladügübei tídangiñe sun lanigi, arufudati weiri lan hínsiñe lun luma lanarime lisudinin dimurei le lariñagubei guñoun ligía hagibugiñe fiú hádangiñe: ‘Mámaadün ubouaguna’ (Huan 15:19). Kei warihini, súdiniti meha lun Hesusu dise hamá lani disipulugu luéi ubóu.

2. Ka san ‘ubóu’ le meha uágubei layanuha Hesusu?

2 Ka san ‘ubóu’ le meha uágubei layanuha Hesusu? Layanuhaña hawagu sun gürigia ha dísebaña luéi Bungiu ani lábugiñeñanu lubafu Satanási le adügübei lun hawouguounrügü lan gürigia hasaminara ani barüguatiña houngua (Huan 14:30; Éfesuna 2:2; 1 Huan 5:19). Ligía tariñagunbei Bíbülia “anhein lan gamadagua hubéi luma ubóu, háganiñein lan Bungiu” (Santiagu 4:4). Kei le súngubei lubéi wagía busentiwa werederun lidan línsiñehabu Bungiu, buiti lunya wakutihani ida liña lan wawinwandun ubouagu ani lun madan lániwa ubóu. Ariha wamá seingü katei le lunbei líderaguniwa adügei: úaragua wamá lun Larúeihan Bungiu lúhaburugu Kristu ani mádaragun wagíame woungua lidoun polítika, máyeihan wamuti lani ubóu sífiri, waranseragun woungua keisi lubudubu, mabuinchagüdün  wamani wabagari lau saragu umegeguni ani daü wamounme daüguaü to líchuguboun Bungiu.

LUÉIGIÑE WAMÁ LÓUBADINA LARÚEIHAN BUNGIU

3. a) Ida liña meha larihini Hesusu polítika lidan lidaani? b) Ka uagu tagúaha Bíbülia houn lánigu Hesusu disipulu ha anúadiruañabaña wügüriña ha lóunahabaña? (Ariha huméi abürüdǘni.)

3 Lubaragiñe lebelurun lidoun polítika lidan lidaani, aba letenirun Hesusu apurichiha luagu Larúeihan Bungiu, arúeihani siélugiñeti le ñeinba lubéi Larúeiha (Danieli 7:13, 14; Lúkasi 4:43; 17:20, 21). Ligía gayara lubéi lariñagun ligibugiñe Pilatu le gumadan rómana: “Mama lánina ubóu le [N]arúeihan” (Huan 18:36). Lánigu disipulu ha úaraguabaña, súnwandan wasigiruni lani hénpulu lau úaragua wamá lun Kristu luma lun larúeihan ani apurichiha wagía luagu agumadihani le, lidan sun ubóu (Matéu 24:14). Ábati labürühan apostolu Pábulu: Wayabiña [...] keisi wügüriña ha lóunahabaña Kristu [...]. Ayumuraguatiwa lubeiti hun luéigiñe lóubadina Kristu: ‘Arandara humá luma Bungiu’” (2 Korintuna 5:20). *

4. Ida liña harufudun kristiánugu ha inarünitiña úaraguni lun Larúeihan Bungiu? (Ariha huméi kuaduru le lídanbei páhina 52.)

4 Gürigia ha óunahoubaña lidoun amu ageiraü lidan liri hageira, mádaraguntiña houngua lidoun luáguti ageiraü le ñeinhin lubéi hounahoua nadagimein. Gama lumoun, ténitiña lun luáguti hageira. Ítara liña giñe hóuserun kristiánugu ha anúadiruañabaña ladüga ‘siéluna hamá’ (Filipuna 3:20). Lau hapurichihan luagu Larúeihan Bungiu lau ubebeni, íderaguatiña saragu míñunu hádangiñe “amu mudún” lun harandarun luma Bungiu (Huan 10:16; Matéu 25:31-40). “Amu mudún” ha, hagía íderagubaliña líbirigu Hesusu ha anúadiruañabaña. Biángubei sétanu le, lidanñanu aban lun hawanseragüdüni Larúeihan Kristu ani mádaraguntiña houngua lidoun polítika, nírügü lun hayanuhan luagu (aliiha huméi Isaíasi 2:2-4).

5. Ka adügübei lun amu lan gádanti damuriguaü hani kristiánugu uguñe weyu hawéi binadu ísüraelina, ani ka lánibei le resultóu lidan habagari kristiánugu?

 5 Mámarügüñein lun úaragua hamá kristiánugu inarünitiña lun Kristu mádaragun habéi houngua lidoun polítika.  Mítaranti wawinwandun kei meha binadu ísüraelina, ha meha aganóubaña lidan ábanrügü ageiraü le líchugubei Bungiu houn. Anheinti wagía añahein wíbirigu lidan sun Ubóu (Matéu 28:19; 1 Féduru 2:9). Ánhawa ñüdün luéigiñe lóubadina somu polítiku gayarabei weferidiruni úarani le wádanbei keisi kristiánugu luma furangu le aubei wanügei uganu luáguti Larúeihan Bungiu houn sun hawuyeri gürigia (1 Korintuna 1:10). Ani danme ñein lan wuribu, wageindaguña hamuga kóntüra wíbirigu ha uágubaña tariñaga Bíbülia lun hínsiñe hamá woun (Huan 13:34, 35; 1 Huan 3:10-12). Garichati Hesusu dan le lariñagun houn lani disipulugu lun hígirunu árüma ani lun hínsiñedun háganiñu houn. (Matéu 5:44; 26:52; ariha huméi kuaduru “ Mádaraguntina san nungua lidoun luáguti ubóu?”.)

6. Kei le deregeguaadiwa lubéi woungua lun Bungiu, ka lánibei le efekütu lidan wóuserun hama urúeigu?

6 Derege hamaali giñe kristiánugu inarünitiña habagari lun Bungiu, mama lun aban gürigia ni lun somu óundaruni hani gürigia o lun aban ageiraü. Ani ariñagati 1 Korintuna 6:19, 20: “Mama wagía laburiñabei wágubu [...] agañeiha lumutiwa Bungiu seru lun lánigu wamá”. Ítarati, íbini ru hamani lani “urúei” lun —inebesei, liseinsuna gumadi, luma hadügüni le lamuriahabei dan le gayara lan—, ha afalarubalin Hesusu ru hamuti “lani Bungiu lun Bungiu” (Márükosu 12:17; Rómana 13:1-7). Lidan burí katei “lani Bungiu” anihein áhuduraguni, ínsiñeni tídangiñe sun wanigi, gaganbadi, úaraguni, íbini wabagari anhein mégeiwa lubéi wadügüni (Lúkasi 4:8; 10:27; (aliiha huméi Adügaü 5:29; Rómana 14:8).

WARARAMUN LUN “SÍFIRI LÁNINA UBÓU”

7, 8. ‘Ka lánibei ubóu le sífiri’, ani ida liña ‘lawadigimaridun’ hadan gürigia?

7 Webedaagun lun lani ubóu le sífiri ligía amu manera lun wakipuragun woungua dise luéi ubóu. Ariñagati Pábulu: “Mama aban sífiri le lánina ubóu weresibirubei; [s]ífiri le ñǘbuinbei lúmagiñe Bungiu, ligía weresibirubei” (1 Korintuna  2:12). Ariñagati giñe houn Éfesuna: “Falá humuti meha lani ubóu le hénpulu, adügei lugundan sífiri le agumadihabei garabalirugu, le nadagimeinbei hádangiñe ha maganbadibaña lun Bungiu” (Éfesuna 2:2, 3).

8 Dimurei ‘garabali’ o sífiri, mini lan, aban erei marihúaditi le ínchahabaliña gürigia lun maganbadi hamá lun Bungiu, lun hafalaruni ‘luriban hayumahan, luma lun háfaagun lun habihini katei le harihubei’ (1 Huan 2:16; 1 Timotéu 6:9, 10). ‘Gumadi’ lumutiña sífiri le gürigia ladüga kei gafigoun wabéi, achawaha lumutiwa sin wasandiruni, ani anihein súnwandan lidan sun fulasu kei garabali. ‘Nadagimeinti’ hadan gürigia murusun murusun, adügati lun harufudun igaburi le mama lúmagiñeti Bungiu kéiburi, hawouguounrügü lan hasaminara, barüguaü unguaü, memenihabu, mabusenrun hamá lariñawagun ni kata houn luma maganbadi. * Lidan amu dimurei, adügati garabali le lun láhüchün ligaburi Mafia tidan hanigi gürigia (Huan 8:44; Adügaü 13:10; 1 Huan 3:8, 10).

9. Ida liña lebelurun lani ubóu le sífiri lidoun hasaminan gürigia luma tidoun hanigi?

9 Gayarati san labadülerun sífiri lani ubóu lidan wasaminan luma tidan wanigi? Gayarati lasuseredun ánhawa móunigiragun woungua (aliiha huméi Ariñawagúni 4:23). Dan le lagumeserun, masandi wamuti. Gayarati lachülürün sífiri le woun hámagiñe wánigu paaná ha afamurutiña gürigia hamá buítiña ani mínsiñeti Heowá houn (Ariñawagúni 13:20; 1 Korintuna 15:33). Gayarati giñe labadülerun lani Mafia sífiri wawagu tídangiñe garüdia to mabuiduntu, dan le táfuachun iyawaü lánina agamariduni lidan Internet o programa hani ha agarabaagubaña lun Bungiu (apóstatas), isebáhari le mígirunti ni kata buiti, huraraü lánina ásügüraguni, luma furumiñeguarügü katei o gürigia ha awanseragüdüti lisaminan Satanási luma ubóu le lábugiñebei lubafu.

10. Ida luba gayara lan webedaagun lun lani ubóu le sífiri?

 10 Ida luba gayara lan webedaagun lun lupeisinin sífiri lani ubóu le ani redei wagíame lidan línsiñehabu Bungiu? Mosu wayusuruni sun katei le líchugubei Heowá woun lun wéredagüdüni wamadagua luma ani amuriaha wagíame sífiri sandu luma sun oura. Íbini gabafu lan Mafia lau sun ubóu le lábugiñebei lubafu, gabafutimati Heowá (1 Huan 4:4). Ligía súdini lubéi werederun yarafa lun Heowá lau furíei.

 WARANSERAGUN WOUNGUA KEISI LUBUDUBU

11. Ka efekütu lánibei sífiri lani ubóu le lidan ligaburi hasansiragun gürigia?

11 Arihúati tuagu wadaüragun, waranseragun woungua luma waruman ka lan ani sífiri nadagimeinbei wadan. Lidan saragu ageiraü, wuribatimarügali hasansiragun gürigia darí lun lariñagun aban nadagimeinti lidan aban programa tidan bigibigitu ibidiñeli lan houn horu ida luba lan hasansiragun lun hasubudiruniwa hádangiñe ha híbiri gürigia. Según tariñagun aban periodiku, murusuntimarügütu daüguaü hadaürün gürigia lun harufudahani hara ani arihúati échuni le íbini hawagu würiña irahüñü. Gíbetiña giñe gürigia ayusurutiña tagübüri daüguaü to adügüboun lun harihín kei gürigia mousantiña ha marufuduntiña inebesei ni ínsiñeni hawougua.

12, 13. Ka inarüni méiniti lunbei ladundehani ligaburi wasansiragun luma waranseragun woungua?

12 Kei le weseriwiduña lubéi lun Heowá, busentiwa lun buidu lan wariawagún, tau daüguaü harumatu, to buiti tariawagún ani to lánina kada ókaasion. Lidan sun katei, lunti waranseragun woungua “keisi lubudubu” lugundun ligía igaburi le adügübei lun amu hamá gürigia ha “deregeguaañabaña houngua lun Bungiu” hawéi ha híbiri gürigia. Lugundun mama wáluahaña lun hetenirun gürigia woun, wáluahaña “[werederun] lidan línsiñehabu Bungiu” (1 Timotéu 2:9, 10; Húdasi 21). Le linarün katei, le lunbei súdinitima lan woun ‘lun tidan lan wanigi wewendeda lugundun ligía katei gebegibei saragu ligibugiñe Bungiu’ (1 Féduru 3:3, 4).

13 Mosu giñe waritaguni gani lan ligaburi wasansiragun luma waranseragun woungua efekütu lidan le hasaminarubei gürigia luagu relihión le inarünibei. Lidan 1 Timotéu 2:9, 10 yusuwati dimurei “keisi lubudubu”. Gama lumoun dan le labürüdǘnbei bérusu le furumiñe lidan Güriegu, dimurei le ayusurúbei lun “keisi lubudubu” mini lan, mosu lan warufudun inebesei luagu le hasaminarubei amu. Dan le wanúadahanu wadaüragun moun lumuti wasaminarun gayara lan wasansiragun kei auti wabusenra, lunti wasaminarun kaba lan hariñaga  amu wawagu. Le súdinitimabei woun, wíchugun inebesei lun Heowá luma houn lumutuniña ani subudiwa wagíame keisi lánigu Bungiu minisi ha adügübalin sun katei “lun híchugun uéiriguni lun” (1 Korintuna 4:9; 10:31; 2 Korintuna 6:3, 4; 7:1).

Rútina san inebesei lun Heowá lau ligaburi naranseragun nungua?

14. Ka burí álügüdahani lunbei wadügüni wóuniwagua luagu arumani luma ida liña lan wariawagún?

14 Dan le wáfuridun apurichiha o woudin lidan adamuridaguni kristiánu, mósutima haruma wamá ani buidu ligíame waranseragun woungua. Ligía lunti lubéi wálügüdagun woungua: “Adügatu san nadaüragun luma liwiye nariawagún lun hayanuhan gürigia nuagu? Ruti san busiganu houn amu lun héibugun numa? Ka súdinitimabei nun: garicha nan lun naranseragun nungua kei auti nabusenra o nagunfulirun lau le mégeiwabei lun nibihin somu wadagimanu lidan damuriguaü?” (Sálumu 68:6; Filipuna 4:5; 1 Féduru 5:6).

15. Ka uagu mígirun lubéi Heowá aban lísüta lau lúrudu tuáguti daüguaü, arumani luma aranseraguni unguaü tidan Bíbülia?

15 Mígirunti Heowá aban lísüta tidan Bíbülia tuáguti daüguaü, arumani luma aranseraguni unguaü. Ladüga busenti lun líbüre wamá lun wanuadahan luma lun wasaminarun woungua. Busenti lun kristiánugu wamá ha wéinamuhaña lidan hafiñen, ha gayarati desidírü hamá buidu según inarüni méiniti le tídanbei Bíbülia ani ha ayusuruti iarani le hawagubei lun hasubudiruni “le buídubei lumoun le wuribabei” lun héchudagüdüni lun ítarameme lan asubudiragüdei houn (Ebüréu 5:14). Lóugiñe sun katei, busenti lun ladundehaniwa ínsiñeni le wasandirubei  luagu luma hawagu gürigia wáledi (aliiha huméi Márükosu 12:30, 31). Lidan wadügüni lugundan Bungiu, gíbeti luwuyeri aranseraguni unguaü tuma daüguaü to gayarati wayusurunu. Buídurügüti woudin lidan aban adamurini hani gefentiña luagu Heowá lidan furumiñeguarügü ageiraü lun warihin sun luwuyeri koloru daüguaü luma ugundani le hádanbei sun gürigia.

MABUINCHAGÜDA WAMÉI WABAGARI LAU SARAGU UMEGEGUNI

16. Ida liña amu lan larufudahan Hesusu luéi le arihíbei ubouagu, ani ka álügüdahani lunbei wadügüni wóuniwagua?

16 Yeeda lumutiña ubóu le gürigia, ínchaha lumutiña áluahei ugundani lidan seinsu luma umegeguni. Gama lumoun, ariñagati Hesusu: “Mama luéigiñe liibe lúmati gürigia labagarida” (Lúkasi 12:15). Mariñagunti Hesusu lun lan wawinwandun lidan lanarime gudemei lun siñá lan wibihini le wemegeirubei. Gama lumoun, arufudahati hárügübaña lan “asubudirubalin  luagu megei hamani lídehan Bungiu” ani mabuinchagüdün hamuti habagari lau saragu umegeguni lun gayara lan hetenirun lun sun le gánibei luma heseriwidun lun Heowá furumiñe adarira ugundani le inarüniti luma esefuruni (Matéu 5:3; 6:22, 23). Álügüdagua wamá woungua: “Afiñetina san tídangiñe sun nanigi luagu le larufudahabei Hesusu o anihein lani ‘lúguchi iyeeni’ efekütu nuagu?” (Huan 8:44). “Ka larufudubei ligaburi nayanuhan, le nasaminarubei nadügün, le anügübalin furumiñeti lúgaaru lidan nibagari luma ligaburi nawinwandun?” (Lúkasi 6:45; 21:34-36; 2 Huan 6.)

17. Írida humá fiú lídangiñe abinirúni le lanügübei mabuinchagüdün wamani wabagari lau saragu umegeguni.

17 Ariñagatu Bíbülia woun: “Adüga huméi le tariñagubei Lererun Bungiu” (Santiagu 1:22). Ka buiti habihibei gürigia ha mabuinchagüdünbalin habagari lau saragu umegeguni? Daritiña awalidaguni le inarüniti lidan heseriwidun lun Bungiu (Matéu 11:29, 30). Séfutiña luéi saragu idiheri luma igarigu (aliiha huméi 1 Timotéu 6:9, 10). Gadaanitimatiña houn hafamilia luma houn íbirigu lidan damuriguaü, lugundun gufurumatiña lau hibihini le hemegeirubei. Arumugatimatiña giñe buidu (Apurichihati 5:12). Gúndaatimati giñe habagari, lugundun yusu hamuti hadaani luma hemegen lun híderagun amu (Adügaü 20:35). Ani “buinñu [haña] lau emenigini”, ñuruguatu hanigi ani gúndaatiña (Rómana 15:13; Matéu 6:31, 32). Le linarün katei, wéiriti lebegi abinirúni burí le.

WADAÜRÜNU SUN “DAÜGUAÜ LÁNINA ASUDARAHANI”

18. Ka tariñagubei Bíbülia hawagu wáganiñu, luagu ligaburi hagayuahan luma ageindaguni le gadanbadiwa?

18 Ánhawa eredera lidan línsiñehabu Bungiu, wounigirúba luéi Satanási le áfaagubei lun lararamuni weseriwidun lun Bungiu, ani busenti lun weferidiruni wagundan luma ibagari magumuchaditi (1 Féduru 5:8). Ariñagati Pábulu: “Mama hama gürigia ha láutiña ǘgürügü luma abun wageindagua, hama burí sífirigu gabafutiña ha lánina wuribani yágüta iñu wageindagua, luma hama gumadi, lúrudugu luma ubafu lánina luburiga lidan  ubóu le” (Éfesuna 6:12). Dimurei güriegu le ásügürawagüdübei kei ‘ageindagua’ adügati lun wasaminarun hawagun bián gürigia árügüdagua ageindagua. Dan le layanuhan Pábulu hawagu áganiñu ha lídanbaña ubóu hani sífirigu, ayanuhati hawagu “gumadi”, “lúrudugu” luma “ubafu lánina luburiga lidan ubóu le”. Ka larufudahabei le woun? Samina hamani máfianu buidu ani aranseha haméi ida luba lan hagayuahan.

19. Ariñaga huméi ida tiña lan ladaüragun kristiánu to lánina asudarahani.

19 Íbini gibe lan wadebilin ani gíbeti katei wásiñarun adüga, gayarati wagañeirun. Ida? Dan wadaürünu ‘sun daüguaü lánina asudarahani to líchuguboun Bungiu woun’ (Éfesuna 6:13). Ariñawagúati ida tiña lan daüguaü tugía lidan Éfesuna 6:14-18: “Derebugu humá lubeiti, daügu lau inarüni keisi lau aban béliti le güragu umuti buidu luagu hiranaagua, areidúañu lau ísuruni kei lau katei le adouragubei lau laniguagu súdara. Aranseñu humá súnwandan lun hapurichihani uganu luáguti Wasalbaragüle, le íchugubei darangilaü, keisi laranserun súdara dan le ladaürünu lisabadun. Lóugiñe sun katei, barǘ huméi hafiñen kei lárügüdüni súdara lidaüdina ligibugiñe, lun hararamunu sun gimara durunguatu to lachüühaboun Mafia huagun. Barǘ huméi hemenigidun luagu hasalbarun kei ladaürüni súdara lubunidin lun lóunigiruni lichügü; barǘ humeime Lererun Bungiu kei eféin to líchuguboun [s]ífiri hun. Adüga huméi sun le lau saragu ayumuraguni lun Bungiu lun líderagunün; afurieida humá lun Bungiu súnwandan lau lubafu [s]ífiri”.

20. Ka idan amu wamá hawéi súdaragu ubouaguna?

20 Kei lúmagiñetu lubéi Bungiu daüguaü lánina asudarahani to, súnwandan tíderagubadiwa lan. Gama lumoun, mosu wayusurunu súnwandan. Ka uagu? Ladüga wageindaguña aban wuribu lánina óunweni o ibagari, ani siñati wemeraagun lugundun magumubei wuribu le darime lagumuchun Bungiu lau ubóu le lani Satanási ani dagua láñame sun máfianu lidoun fusu mébehati, ánheinti súdaragu, dan le lagumuchun aban wuribu aba hemeraagun darí lagumeserun ámuya wuribu (Arufudúni 12:17; 20:1-3). Ligíati anhein háfaaguña lubéi kóntüra somu débili o luriban ayumahani, mabuchadalá huagu. Sun wagía gayarati  wariñagun mosu lan wabeichuni wágubu, lun úaragua wamá lun Heowá (1 Korintuna 9:27). Anhein mama lubéi wáfaaguña, anati ñein mosu nidiheri wamá.

21. Katei san ábanrügü manera lun wagañeiruni wuribu?

21 Chóuruti magañeirunbadiwa lan lau wabafu guánarügü. Ligía laritaguagüdünbadiwa Pábulu luagu megei wamá ‘wafurieidun lun Bungiu súnwandan lau lubafu sífiri’. Mosu giñe waganbuni lumalali Bungiu lau waturiahanu Lererun ani yusu waméi sun chansi le wadarirun lun wadamuridagun hama wánigu paaná lidan áfaaguni, lugundun mama wábuguarügüñadiwa (Filemón 2; Ebüréu 10:24, 25). Ánhawa arufuda úaraguni lidan katei burí le, mámarügübei agañeiruni wibiha, gayarabei giñe wóunabuniña ha ayanuhatiña luagu wafiñen.

ARANSEÑU LUN WÓUNABUN LUAGU WAFIÑEN

22, 23. a) Ka uagu lunti lubéi aranseñu wamá lun wóunabun luagu wafiñen, ani ka burí álügüdahani lunbei wadügüni wóuniwagua? b) Kaba uagu wayanuha lidan le aban kapítulu?

22 Ariñagati Hesusu: “Ligía hiyereegunbei lun ubóu ladüga mámaadün lan ubouaguna” (Huan 15:19). Ligía lunti lubéi aranseñu wamá súnwandan lun wóunabun luagu wafiñen lau inebesei luma darangilaü (aliiha huméi 1 Féduru 3:15). Álügüdagua wamá woungua: “Gúnfuranda numuti san ka lan uagu anihein lubéi dan amu lan hóuserun gefentiña luagu Heowá hawéi híbiri gürigia?”. “Dan le lunti lan nóuserun ítara, chouru numuti san inarüni lan le tariñagubei Bíbülia luma musu úaraguati?” (Matéu 24:45; Huan 17:17.) “Dan le lunti lan nadügüni lugundan Heowá, arufudarügü numuti san mítaran nan kei ha híbiri odi arufudatina giñe gunda nan lau amu nan?” (Sálumu 34:2; Matéu 10:32, 33.)

23 Yusuti giñe Mafia sádara lau sumadi lun lóuchaguniwa anhein inarüni lubéi desidírühadiwa lan werederun dise luéi ubóu. Kei hénpulu, kei buga aubei wariñagei houchati Satanási lachawahaniña lubueingu Heowá ubouagun lau isebáhari le wuribati. Kaba íderaguawa anúadira isebáhari le buiti, le lunti líchugun erei woun ani redei wagíame lau aban saminaü darangilati? Wayanuhaba luagu katei le lidan le aban kapítulu.

^ par. 3 Lúmagiñe Pentekosutesi, irumu 33 lidan wadaani, larúeihañein Kristu damuriguaü hani kristiánugu anúadiruaña le ubouagubei (Kolosana 1:13). Ani lidan irumu 1914 resibi lumuti ubafu kei urúei luagu “larúeihan ubóu”. Ligíati, kristiánugu anúadiruaña ha, seriwitiña giñe keisi óunahoutiña lidan liri Larúeihan Kristu (Arufudúni 11:15).

^ par. 8 Ariha humoun líburu Razonamiento a partir de las Escrituras, páhina 140-144, hadügün gefentiña luagu Heowá.