Afuranguagüdati meha apostolu Pábulu lau lídehan lani Bungiu sífiri sandu, anihein lan dan mosu lan hadouragun würiña lau hachügü lidan heseriwidun lun Heowá. Ka idan ani ka uagu mosu lubéi hadügüni? Akutiha waméi dimurei le lariñagubei lidan 1 Korintuna 11:3-16 lun warihin fiú adundehani le lunbei líderaguniwa lun desidírü wamá buidu ani ru wagíame inebesei lun Bungiu. Ayanuhati Pábulu luagu ǘrüwa katei le lunbei gabaroun wamani: 1) wadagimanu le ídanbei mosu lan tadourun lau tichügü; 2) halía lan tadügei, luma 3) lébuna tagunfuliruni lúrudu le.

Wadagimanu. Íridati Pábulu biama: afurieiduni luma layanuhóun uganu lúmagiñeti Bungiu (bérusu 4, 5TNM). Subudi wamuti ka lan afurieidunibei, wayanuhan luma Heowá. Ánheinti layanuhóun uganu lúmagiñeti Bungiu, yúsuati uguñe weyu lun wadagimanu lánina arufudahani tídangiñeti Bíbülia le hadügübei minisi kristiánugu. Mosu san hadouragun würiña lau hachügü sagü hafurieidun o harufudahan tídangiñe Bíbülia? Uá. Según halía lan hadügei.

Halía lan hadügei. Ayanuhati Pábulu luagu biama lídangiñe: hábiñe luma lidan damuriguaü. Abürühati: “Wügüri tichügüdina[bei] lúmari [...]. Nibusigarídünati giñe lun madouragun tan würi lau tichügü dan le tafurieidún [...] o dan le ladimurehan Bungiu tiyumulugugiñe” (bérusu 3, 5). Írida laali Heowá wügüri maríeiti tichügüdiname lúmari. Ligíati, anhoun adüga aban wadagimanu le lunti ladügüni tichügüdina ani marufuduntu inebesei luagu lilurudun tani weiriei tanügagüdübei busiganu.  Kéiburi dan le tidin íchiga aturiahani tídangiñeti Bíbülia úara luma tani weiriei, mosu tadourun lau tichügü lun tarufuduni inebe lan lilurudun tani weiriei tun, dandu anhein badiseihali lubéi o mabadiseirungili lan lugundun ligía tichügüdinabei. * Ánheinti mosu lubéi tarufudahan aban würi kristiánu o tafurieidun ligibugiñe aban tisaani ñǘraügili ani badiseihali? Íbini mama lan ligía hachügüdinabei tiduheñu, mosu tadourun úguchuru lau tichügü lugundun inebehabutu lun lúrudu le ibiha hamaalibei wügüriña lidan damuriguaü.

Ariñaga lumuti giñe Pábulu ka lan lunbei tadügüni lidan damuriguaü: “Anhein anihein lubéi busenti lasigenehan luagu katei le, lunti lasubudiruni luagu ni lan wagía, ni ha híbiri tílana liligilisin Bungiu, masubudiruntiwa amu igaburi luéi lira” (bérusu 16). Rúhali Heowá wügüriña ha badiseihaña lun hanügüni ubaraü lidan damuriguaü (1 Timotéu 2:11-14; Ebüréu 13:17). Wügüriñarügüñanu lígira Heowá lun hiridún keisi wéiyaaña lidan afiñeni o ídehatiña lidan damuriguaü lun hóunigiruniña lílana damuriguaü (Adügaü 20:28). Gama lumoun, anihein dan mosu lan tadügüni aban kristiána wadagimanu le yebe lunti ladügüni aban wügüri badiseihali ani aranseli lun ladügüni. Kéiburi aban adamuridaguni lubá háfuridun apurichiha, ladüga ua lan ni aban íbiri le gayarati ladügüni. Adamuridaguni le, aban giñe programa lánina arufudahani le lídangiñeti damuriguaü ani lunti ladügüni aban íbiri. Mosu giñe tadourun lau tichügü anhoun ñüdün íchiga aturiahani tídangiñe Bíbülia úara luma aban wügüri le badiseihali. * Ladüga gunfuranda tumuti tadügüña lan aban wadagimanu le lunti yebe ladügüni aban wügüri.

Gama lumoun, gíbeti amu katei gayarati tadügüni würi lidan táhuduragun sin tadouragun lau tichügü. Kéiburi lubá tóunabun lidan damuriguaü, táfuridun apurichiha (íbini úara luma tani weiriei o luma amu wügüri badiseihali) luma dan le taturiahan o tafurieidun hama tisaanigu ha mabadiseirungiña. Ánheinti  machoururun tubalin kaba lan tadüga lidan somu kesi? Mosu takutihan luagu katei ligía buidu. * Anhein machouruméme tágili lubéi ani ariñaga lumuti tisaminan tun lun tadouragun lau tichügü, gayarati tagürünu tumusuete kei íbiri to tídanboun iyawaü.

Lébuna. Lidan bérusu 10 daritiwa biama resun le ádahabaliña würiña kristiánu lun hadouragun lau hachügü: “Hawagu ánheligu, lunti tadouragun würi lau tichügü [...] keisi liseinin tagunfuliruni lagumadihan wügüri”. Le furumiñeti resun sagawati lídangiñe dimurei “liseinin [...] lagumadihan wügüri”. Musue to auboun tadouragua íbiri lau tichügü, aban seini luagu inebehabu tan lun lúrudu le ru laalibei Heowá houn wügüriña badiseihaña lidan damuriguaü. Ítara liña tarufuduni tínsiñehabu luma úaragua tan lun Heowá. Kati libiamanbei resun? Según bérusu le wakutihabei, “hawagu ánheligu”. Kaba san lani tadouragun würi lau tichügü efekütu hawagu sífirigu gabafutiña ha?

Ariha hamutiña ánheligu sun ha lídanbaña óundaruni le lani Heowá, dandu sielu kei ubouagu, ani ariha hamuti anhein arufuda habéi inebesei lun lilurudun Bungiu. Sagatiña buiti lídangiñe hénpulu lánina gaganbadi le harufudubei gürigia gafigountiña. Lau sun luwuyeri, mosu giñe harufuduni sífirigu ha, gaganbadi hamá lun lilurudun Bungiu, katei le madügün habéi meha fiú hádangiñe lidan binadu dan (Húdasi 6). Uguñe weyu, ibihatiña aban buiti hénpulu sagü harihini terederun aban kristiána lau sun tugundan lábugiñe lugumadin aban íbiri le badiseihali, íbini lütimaharu lan eseriwida sügǘ lau, gíbeti tisubudin luéi, ani chutimaati tau luéi. Ani wéiritimati lani efekütu hawagu dan le hádangiñetu lan kristiánugu ha anuadirúaña, lugundun ámuñegü hádangiñeboun ha lunbaña harúeihan luma Kristu sielu, lidan  aban ubaraü íñutimaati hawéi ánheligu. Kei aubei warihei ibihatiña würiña kristiánugu aban óunwenbu chansi lun harufuduni gaganbadi hamá. Lau úaragua hamá lidan hóuserun ani redei hagía lábugiñe lilurudun Bungiu, rútiña aban buiti hénpulu lánina ǘnabuguni luma gaganbadi hagibugiñe saragu míñunu ánheligu.

^ par. 3 Siñati tafurieidun aban würi kristiána lau umalali héreti ligibugiñe tani weiriei anhein kristiánu lubéi giñe ligía, ánheingubeirügü sandi lubéi ani siñá layanuhan.

^ par. 1 Mama mosu tadouragun aban íbiri lau tichügü dan le tíchuguña lan aturiahani tídangiñeti Bíbülia ligibugiñe aban apurichihati le mabadiseirungili anhein mama lubéi tani weiriei.

^ par. 2 Lun hadarirun lanwoun ariñahani, aliiha humoun La Atalaya to lánina 15 lidan sedü-hati irumu 2002, páhina 26, 27, tuma to lánina 15 lidan sedü-hati irumu 1977, páhina 445-448.