Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

“Redei humá lidan línsiñehabu Bungiu”

 LANWOUN ARIÑAHANI

Ida luba wóuserun aban gürigia le bugawaali lídangiñe damuriguaü

Ida luba wóuserun aban gürigia le bugawaali lídangiñe damuriguaü

Míbeti katei gáriti ubouagu kei barihin aban bumada o biduhe le úmabei buídutima lan banaagun bungua abugúa lídangiñe damuriguaü ladüga masakürihan lan luagu lifigoun. Gama lumoun, arufuda lumuti ligaburi wóunabun lun adundehani le tídanbei Bíbülia anhein weiri lubéi línsiñe Heowá woun luma úaraguni le warufudubei lun aransehani le ladügübei. * Akutiha wamá fiú álügüdahani le gayarati liabin lidoun wasaminan.

Ida luba wóuserun luma aban gürigia bugawaali? “[Móundara] humá luma ni aban le ariñaguti luagu iduhei lan luéigiñe Hesukrístu ani gámariti mamarieidunga, o igaaduati, o huduguati houn guáriua, o marasualuguti, bacharuati o híweruti. Moun lumuti nírügü lun heigin luma iduhei le ítarati.” (1 Korintuna 5:11.) Wéridi tumutiwa giñe Bíbülia: “Furumiñeguarügü le adireiruti ani meredeti lidan larufudahan Kristu [...], meresibira huméi húbiñe, mabusurun huguyame lun; lugundun le abusuruti lun, gadan lumuti giñe wuribani le ladügübei” (2 Huan 9-11). Ariñagatu La Atalaya to lánina 15 lidan unsu-hati irumu 1981, páhina 19: “Láurügü wariñagun lun aban gürigia ‘ida biña?’, gayarati ligía lan furumiñeti pasu lun lachawaragun wayanun o lun latatirun aban umadaguaü. Busenbadiwa hamuga san wíchuguni furumiñeti pasu le luma aban bugawaali?”. Ligíati, dan le labugún aban gürigia mamadaguaadiwa luma ani mayanuhan wagía luma luagu katei le lánina weseriwidun lun Heowá.

Mosu funa san louserúniwa ítara? Anha, ani anihein saragu resun lun wadügüni. Le furumiñeti, úaraguni lun Bungiu luma tun Lererun. Wéiriti línsiñe Heowá woun darí lun busén wamá gaganbadi wamá lun súnwandan, íbini dan le hénrengu lan woun. Ani chouru wamuti richá lan hínsiñehabu ligía, ani lunti lan wabuidun sun lilurudun (Isaíasi 48:17; 1 Huan 5:3). Libiaman, dan le wígiruni wamadagua luma aban afigouhati le masakürihanti,  wóunigiraguña woungua luéi laluguruniwa lau luriban lusan luma luéi lagadeiruni wamadagua luma Bungiu, ani kipu wamuti giñe damuriguaü harumañu (1 Korintuna 5:6, 7). Lǘrüwan, dan le labugún gürigia, sagati buiti lídangiñe. Ida? Anhein wagunfulira inarüni méiniti le tídanbei Bíbülia lau úaraguni ani arufuda waméime luéigiñeñadiwa lan hóubadina wéiyaaña lidan afiñeni ha adamuridagubaña luma, háfuga tañuludagun lanigi afigouhati le máhagilibei lun hídehan wéiyaaña lidan afiñeni. Danme le larihini féridi laali lan lubuidun lumadagua hama liduheñu habu lumadagu, háfuga “lasaminarun”, gunfurandaleime weiri lan lifigoun ani ábame ladügüni le mégeiwabei lun lagiribudun lun Heowá (Lúkasi 15:17).

Anheinti aban lubéi waduhe abugúbei? Gayarati hénrengubei lan woun wakipurun úaraguni lun Heowá dan le waduhe lan abugúbei. Ida lubati wóuseruni gürigia ligía? Íbini siñá lan wakutihani ida luba lan wóuserun lidan kada kesi, wakutihaba biama le komuntimabei.

Anihein dan hama lan liduheñu bugawaali ligía lawinwanda múnada. Kei meferidirun lubéi iduheguaü dan le labugún aban gürigia, mamahaduntiña liduheñu lun lasigirun ídeha lidan beresegu múnada. Gama lumoun, lun hakipurun úaraguni lun Heowá siñati hayanuhan luma luagu ni kata luáguti heseriwidun lun Heowá lugundun desidírühali gürigia ligía ladüraaguni lumadagua luma Heowá luma hama liduheñu. Háfuga hígiruni lun ñein lan hama lidan guñoun lánina háhuduragun lun Bungiu kei iduheñu sin laliihan o lóunabun ni kata. Gama lumoun, anhein lábugiñegili lubéi hererehan lagübürigu, gayarati híchugun adundehani lun tídangiñe Bíbülia lugundun hani buligasion harufudahan lun, erereha hagíame lun (Ariñawagúni 6:20-22; 29:17). *

Anhein lúnguaali lubéi bugawaali ligía, kristiánugu ha úaraguatiña aba manarimeli lan hayarafahoun lun, luéidigia dan le mosu lan haransehan somu turobuli hadan haduheñu. Máluahantiña lébuna hóundaragun. Ladüga úaragua hamá lun Heowá luma lun  óundaruni, inebeti le tariñagubei Bíbülia houn luagu abugúni. Busentiña buiti lun haduhe, ani lau úaraguni le harufudubei háfuga híderaguni asagara buiti lídangiñe labeichún (Ebüréu 12:11). *

^ par. 1 Inarüni le tídanbei Bíbülia le ayanuhabei luagu ida luba lan wóuserun hama ha bugawaañabaña lídangiñe damuriguaü, huuti giñe lun ítara lan wóuserun hama ha mabusenrunhaña hasubudiruniwa kei gefentiña luagu Heowá.

^ par. 2 Lun hadarirun lanwoun ariñahani hawagu abugútiña ha lábugiñegiña hererehan hagübürigu, ariha humoun La Atalaya lánina 1 lidan diisi-hati irumu 2001, páhina 16, 17, tuma to lánina 15 lidan unsu-hati irumu 1988, páhina 20.

^ par. 3 Lun hadarirun lanwoun ariñahani luagu inarüni méiniti le tídanbei Bíbülia luáguti ida luba lan houserún iduheñu ha bugawaaña, aliiha humoun La Atalaya to lánina 15 lidan gádürü-hati irumu 1988, páhina 26-31, tuma to lánina 15 lidan unsu-hati irumu 1981, páhina 20-25.