Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

“Redei humá lidan línsiñehabu Bungiu”

 LANWOUN ARIÑAHANI

Ka tariñagubei Bíbülia luagu ígiraguni luma fánreinguaü?

Ka tariñagubei Bíbülia luagu ígiraguni luma fánreinguaü?

Agurabati Heowá hagunfuliruni maríeitiña füramasei le hadügübei danbei le hamarieidun. Dan le lamarieidagüdünbaliña furumiñetiña wagübürigu, ariñagati: “[Laganóuba wügüri] tuma lúmari, ábame hayabin lun ítara haba lan kei ábanrügü gürigia”.  Dan lárigiñe, ariñaga lumuti Hesukrístu ligiaméme dimurei, ani ariñagati giñe: “Ligía moun lubéi lafanreinraguni wügüri le ladunraguagüdübei Bungiu” (Agumesehani 2:24; Matéu 19:3-6). Kei warihini, dandu Heowá kei Hesusu ariha hamuti maríei kei aban óundaruni le lunbei ladurarun lun sun habagari maríeitiña, dánrügüñein lounwen aban hádangiñe lagumucha (1 Korintuna 7:39). Kei le aban lubéi óundaruni le sagüráuti, moun lumuti wóufudahan ígiragua lugundun iyereeguti ígiraguni le mébunati tidan Bíbülia lun Heowá (Malakíasi 2:15, 16).

Según Bíbülia, kárügüñein san resun uágubei gayara lan hígiragun maríeitiña? Ariñagaali Heowá iyereegu lan agabarahani luma magíaguni lidan agamariduni lun (Agumesehani 39:9; 2 Samueli 11:26, 27; Sálumu 51:4). Wéiriti liyereegun katei le lun, darí lun lígirun lun hígiragun gürigia dan le adügaali aban hádangiñe magíaguni lidan agamariduni. (Afuranguagüdawati lidan kapítulu 9, párafu 7 ka lan mini lubéi magíaguni lidan agamariduni.) Ígirati Bungiu lun gürigia lan le madurunbei anúadaha anhein hasigiruba lubéi hámagua o hígiraguba lan (Matéu 19:9). Anhein desidírü gürigia ligía lun hígiragun, mama ladügüña ni kata le iyereeguti lun Heowá. Gama lumoun, moun lumuti lidin ni aban hádangiñe lílana damuriguaü ariñaga lun, lun hígiragun, lugundun háfuga anihein katei le adügübei lun desidírü lan maríeiti le madurunbei hasigirun hámagua, dántima le larihin asakürihani inarüniti. Lau sun luwuyeri, le madurunbei, ligía lunbei desidírü lan kaba lan ladüga ani áfagaleime sun ñübuinti (Galasiana 6:5).

Gama lumoun, anihein burí turóbuli wéinamuti le ídanbei desidírü lan somu kristiánu lun hafanreinragun o hígiragun, íbini úagili lan ni aban hádangiñe adügüti magíaguni lidan agamariduni. Dan le lasuseredun ítara, ariñagatu Bíbülia le lan desidírübei lidin ‘lunti lerederun mámariga o larandarun tuma lúmari’ (1 Korintuna 7:11). Lidan burí sügǘ ítarati, úati líbüre lan kristiánu lun lagumeserun asubudira amu gürigia lun lamarieidun tuma (Matéu 5:32). Ariha wamá saragu turóbuli wéinamuti le adügübei lun hafanreinragun fiú.

Hamahadun hanuriahaniña haduheñu. Añahein wügüriña maríeitiña míchu hamuti le hemegeirubei haduheñu houn, ani mama ladüga siñá lan hadügüni, ladüga mabusenrun hamá, ábati hígiruniña haduheñu áfaga gudemei. Ka tariñagubei Bíbülia  hawagu? “Le maritagunti hawagu [...] liduheñu, yéeguaali lau lafiñen; wuribatimatiti sügǘ lau aban gürigia le mafiñenti.” (1 Timotéu 5:8.) Dan le maha lan aban gürigia ítarati lasansirun, mosu desidírü tan lani weiriou anhein mosu lubéi hígiragun lun masuseredun lan ni kata wuribati houn tisaanigu ni tun. Gama lumoun, dan le haganbun wéiyaaña lidan afiñeni luagu maha lan aban kristiánu letenirun houn liduheñu, mosu hakutihan buidu libügürü katei le lugundun gayarati labugún aban gürigia ítarati lídangiñe damuriguaü.

Lagayuahan tuagu lani weiriou. Añahein hagía fásitiña darí lun híchuguni tátuadi luma tibagari hani weiriou lidan peliguru. Anhein kristiánu lubéi gürigia le óuserubei ítara, mosu hakutihani wéiyaaña lidan afiñeni katei le buidu, lugundun gayarati labugún gürigia lídangiñe damuriguaü anhein hanarime lubéi lagañidun ani furunde ligía (Galasiana 5:19-21).

Peliguru sériuti lun wamadagua luma Heowá. Añahein gürigia maríeitiña houcha hamuti sun hayaraati lun meseriwidun hamá hánigu paaná lun Heowá o anihein dan hafosuruniña lun hadüraaguni lúrudu burí le tídanbei Bíbülia. Dan le lasuseredun ítara, mosu desidírü lan kristiánu anhein mosu lubéi hígiragun lun ‘ladügüni le lariñagubei Bungiu lubaragiñe le hariñagubei wügüriña’ (Adügaü 5:29).

Gama lumoun, íbini lidan turóbuli wéinamuti kei le uágubei wayanuha, moun lumuti wariñagun lun maríeiti le madurunbei lun hafanreinragun ni lun herederun hámagua. Íbini gayara lan hídehan wéiyaaña lidan afiñeni hama íbirigu ha derebuguhaña lidan hafiñen o híchugun lan adundehani tídangiñeti Bíbülia, lunti hasubudiruni Heowárügüñein lan asubudirei le asuseredubei haganagua maríeitiña. Anhoun íchiga aban kristiána o kristiánu lanwoun haturobulin lúnrügü hafanreinragun, mama harufuduña inebesei luagu maríei ni luagu Bungiu. Subudi lumuti giñe Heowá anhein heyeehaña lubéi gürigia, íbini haranseruni buidu. Le linarün katei, “furanguti sun katei lun le lunbei laguseragüdüniwa” (Ebüréu 4:13). Anhein asigira turóbuli ani wéiriti peliguru le gádanbaliña, moun lumuti wachuraguni kristiánu anhein desidírü lagumuhóun oura lun hafanreinragun, lugundun “sun wagía, wararamuba ligibugiñe [Bungiu] lun waguserun” (Rómana 14:10-12).