Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 52

Bandi lisudaranigu Heowá ha tuágutiña karü lautu watu

Bandi lisudaranigu Heowá ha tuágutiña karü lautu watu

Súnwandan meha lábürühan Ben-adadü le lurúeite Siria luagun Ísüraeli. Sagü meha lasuseredun, lawisaruni profeta Eliséu lurúeite Ísüraeli lun lesefurun. Ligía lálugunbei Ben-adadü lárügüdüni Eliséu. Danti lasubudirunbalin anihein lan Eliséu uburugu Dotán, aba lóunahan súdaragu síriana árügüdei.

Guñoun hachülüra síriana uburugun Dotán. Dan le láfuridunbei lubúein Eliséu larugan binaafin, arihati bandi súdara geyegu lau uburugu. Ábati lagúaragun buin lau anufudei: “Eliséu, kaba san wadüga?”. Lariñaga Eliséu lun: “Gíbetimatiña súdaragu wama hawéi”. Ouraméme ligía, aba ladügün Heowá lun larihin lubúein Eliséu saragu gabayu tuma burí karü lautu watu luagu burí wübü le geyegubei lau uburugu.

Dan hálugunbei súdaragu síriana hárügüdüni Eliséu, aba lafurieidun: “Heowá, adügabá lun marihin hamá”. Sódini, aba ibidiñeeli lan houn súdaragu halíañanu lan lau sun ariha hamá.  Ariñagati Eliséu houn: “Mama uburugu le háluahabei. Nanügaadün lumoun wügüri le háluahabei”. Aba lanügüniña Eliséu Samarioun, le ñein lubéi lawinwanda lurúeite Ísüraeli.

Tárühali hasubudiruni síriana halíañanu lan. Aba lálügüdüni lurúeite Ísüraeli Eliséu: “Áfaraguanaña san?”. Kei busén habéi meha gürigia ha háfaruni Eliséu hilagubei, larihibei funa san lira kei chansi lun lafayeirun wuribani luagu wuribani? Uá. Aba lariñagun Eliséu lun: “Úa, máfaraguabaña. Ruba heigin, ábameti bóunahaniña hageiroun”. Ligía ladügünbei urúei aban óunwenbu adineruni houn, lárigiñe, aba lóunahaniña hábiñoun.

“Hemenigitiwa luagu Bungiu, lugundun subudi wamuti luagu ánhawa lan amuriaha furumiñeguarügü katei keisi lugundan, laganbubadiwa lan” (1 Huan 5:14).