Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 51

Irahü to íderagubalin wuriburuguna

Irahü to íderagubalin wuriburuguna

Anuhein meha aban irahü ísüraelina awinwanda Siria dise tuéi haban luma hawéi tiduheñu. Súdaragu síriana anügübarun ñeinhin ani teseriwiduña meha tun lani Naamán weiriou, le hábuti lisudaranigu Siria. Huduguatu irahü tuguya lun Heowá, íbini madügün hamani gürigia ha geyegubaña tau.

Anihein meha aban luriban sandi luagu lura Naamán ani gáriti meha lun. Busentu meha irahü tuguya tíderaguni. Ligía tariñagunbei tun lani Naamán weiriou: “Subuditina aban gürigia le gayaraabei ladügün lun lasandiragun hani weiriei lungua buidu. Anihein aban lani Heowá profeta gíriti Eliséu Ísüraeli. Gayaraabei ladügün lun lareidagun hani weiriei”.

Abahüdagua tumuti lani Naamán weiriou lun ka lan tariñagubei irahü. Aranseñu liña méhati Naamán lun ladügün furumiñeguarügü katei, ligía lídinbei Ísüraeli lúbiñe Eliséu. Agurabati yebe Naamán láfuriduba lan Eliséu eresibirei kei aban gürigia súdiniti. Mídinti Eliséu  ayanuha luma, óunaharügü lumuti lubúein eresibirei luma íchigei uganu le lun: “Beiba abulucha sedü wéiyaasu lidan duna Hordán. Ábameti bareidagun”.

Wéiriti magundan lan Naamán lau lira. Lariñaga: “Nariñaga yebe liábinba lan profeta le areidaguagüdana lau lagúahan lun Lubungiute luma lau lánhinhani lúhabu yarafa nun. Óunaharügü lana lidoun aban duna Ísüraeli. Buítimati duna le wámabei Siria. Siñati funagia nidin ágawa ñein?”. Aba lidin Naamán lúbiñegiñe Eliséu buin lau igañi.

Adügatiña lubúeingu Naamán lun lasansiruni lisaminan. Hariñaga lun: “Ma hadügüña hamuga furumiñeguarügü katei lun hareidagun? Mama katei hénrenguti lamuriahabei profeta huma. Ka uagu madügün hubalin?”. Adügati Naamán gasu hau. Ábati lidin lidoun duna Hordán, aba labuluchun sedü wéiyaasu lidan. Lárigiñebei lisedün wéiyaasu, areidaguaali Naamán láfuridunbei dúnarugugiñe. Le lueirin leteingiradi, aba lagiribudun íchiga seremei lun Eliséu. Ariñagati lun: “Guentó, subudi naali Heowá lan Búngiubei le inarüniti”. Ida liña funa san tasandiragun irahü ísüraelina tungua dan le tarihinbalin areidaguaali lan Naamán dan lagiribudunbei lúbiñoun?

“Chülüti buéirigun yagürounméme luéi sielu ani irahüñü ñǘbürigiña hama ha machularungiña eremuhabalin” (Matéu 21:16).