Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 54

Gaguraasunti Heowá lubá Honasi

Gaguraasunti Heowá lubá Honasi

Wéiriti meha hariban lílana aban uburugu asiriana gíriti Níniwe. Ariñagati Heowá lun profeta Honasi lun lidin Níniwe ariñaga houn gürigia mosu lan hasansirun. Ábarüga lanurahan Honasi lidoun le aban oubaü. Aba ládinun tidoun aban ugunei to lunboun tidin lidoun aban uburugu gíriti Tárüsisi.

Dan baranahañoun lubéi ugunei, aba ladagarun aban óunwenbu luriban dan, ábati hanufudedun mádulungu. Furíeitiña houn habungiutegu lun hálügüdüniña: “Ka san uagu lasusereda le?”. Lariñaga Honasi houn: “Au gadurunbei. Nanurahaña luéi nadügüni le lariñagubei Heowá nun. Fui humana baranahoun, gáluma láamuga luriban dan”. Máhatiña yebe mádulungu hachüürüni Honasi baranahoun, keiti sigí lan ariñaga houn lun hachüürüni, aba hachüürüni. Gálumati luriban dan kei ladagarun Honasi baranahoun.

Saminati yebe Honasi lounwe lan. Furíeiti lun Heowá eibu abulucheina lan baranahoun. Óunahati Heowá aban óunwenbu udu lun láhuluchuni Honasi sin láfaruni hilagubei. Aba lafurieidun Honasi lurageirugugiñe udu, lariñaga: “Heowá, lúmagiñe guentó, gaganbadi háadiname bun”. Kipu lumuti Heowá Honasi wínwanñu lurageirugu udu luagu ǘrüwa weyu, lárigiñe, adügati lun lewerehani udu Honasi múarugun.

Mámaali meha san mosu lidin Honasi Níniwe lárigiñe lesefuruni Heowá? Uá. Óunahaya lumuti Heowá Honasi ñeinhin. Anati guentó, adügati Honasi gasu. Ñǘdünti ñein ariñaga houn gürigia wuribatiña  hagía: “Lagünrinchagubei Heowá Níniwe 40 weyu lárigiñe le”. Susereti aban katei le magurabúnti: adügatiña níniwena gasu ani sansi hamuti hagaburi. Ariñagati lurúeite Níniwe houn lumutuniña: “Ayumuragua humá lun Bungiu, asaküriha huguyame. Háfuga magünrinchagun lániwa”. Dan larihinbei Heowá asakürihaaña lan gürigia, aba magünrinchagun laali lan Níniwe.

Aba lagañidun Honasi ladüga magünrinchagun lani Heowá Níniwe. Saminabá san: gaguraasunti meha Heowá lubá Honasi gudemehabu ligía lun. Ánheinti Honasi magudemehábuti houn lílana Níniwe. Ábarüga láfuridun uburugugiñe, aba lañuurun lábugiñe tamuñadina aban híduru, ábati líchugun luriban igibu. Danti lásaürünbei híduru ligía, aba lasafaragun Honasi. Ligía lariñagunbei Heowá lun: “Súdinitimati híduru le bun sügǘ hau níniwena. Séfutiña ladüga gudemehabu nan houn”. Ka labusenrubei Bungiu larufudahan lun Honasi? Súdinitima hamá lílana Níniwe sügǘ lau furumiñeguarügü nadü.

“Gaguraasunrügüti [Heowá] habá gürigia ladüga mabusenrunti lun leferidirun ni aban hádangiñe; labusenrun lun hasakürihan sun gürigia” (2 Féduru 3:9).