Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 49

Tabeichún aban urúei wuribatu

Tabeichún aban urúei wuribatu

Lúmagiñe meha tufunederan luban urúei Aabü uburugu Hesüreeli, gayaraati meha larihini lichari aban wügüri gíriti Nawotu, le ñein lubéi lábunagua beibei. Busén lumuti meha Aabü ichari ligía ani álugati lagañeihani lúmagiñe Nawotu. Máhati Nawotu ladüga mígirun lan Lilurudun Heowá lun laluguruni lalagante. Afiñetibu san inebe lan le desidírü lubéi Nawotu lun Aabü? Uá. Aba lagañidun Aabü. Wéiriti ligañi darí lun maha lan láfuridun lídangiñe lirumun ni leigin.

Tariñaga urúei wuribatu Hesawéli, to lani Aabü weiriou, lun: “Buguya lurúeitebei Ísüraeli. Gayaraati bibihini sun le babusenrun. Nibihaali lichari Nawotu bun”. Aba tabürühan gárada houn wéiyaaña mutu ha uburugubaña, tariñaga houn lun hariñagun íñaragua laali lan Nawotu Bungiu ani lunti lan hachamuragun dübü luagun lun lounwen. Adüga hamuti wéiyaaña le tariñagubei Hesawéli, ábati tariñagun lun Aabü: “Hilá Nawotu. Bánihali ichari”.

Mámarügüñein Nawotu gürigia madurunti táfaragüdün Hesawéli. Adügatu giñe lun hafarúniwa saragu amu gürigia ha únbaña hínsiñe lan Heowá. Huduguatu houn guáriua, adüga tuguya amu burí katei wuribati. Ariha lumuti Heowá sun wuribani ligía. Kaba méhati ladüga Heowá tun Hesawéli?

Fiu dan lárigiñe lounwen Aabü, aba lagumeserun Horamü, le lisaani, arúeiha. Óunahati Heowá aban wügüri gíriti Heú abeichoun Hesawéli hau sun tiduheñu.

Abugaha lumutu Heú likarün darí Hesüreeli, ñein lubéi tawinwanda Hesawéli. Ñǘdünti Horamü tidan likarün lubaroun Heú, ábati lálügüdüni: “Anihein san darangilaü wadan?”. Lariñaga Heú lun: “Siñati ñein lan darangilaü tau Hesawéli, to búguchu, adaagua wuribani”. Dan yebe lálugun  Horamü lagararaagun lun lanurahan tidan likarün, aba lachüürün Heú gimara luagun, aba lounwen.

Ábati lachülürün Heú túbiñoun Hesawéli. Dan taganbunbei anite lan, aba tefeindihani tigibu, aransehatéi tídiburi, ábati tagurabahan lubadu funedera le lídanbei aban rumu íñuti túbiñe. Dan lachülürünbei Heú, aba tabusurun Hesawéli lun lau éregu. Aba lagúaragun Heú houn tubúeingu ha rárabaña tubadu: “Chü humóun ǘnabun!”. Aba hádarunu Hesawéli luéigiñe funedera, ábati téiguadun, aba tounwen.

Lárigiñe lira, aba láfaraguniña Heú 70 lisaanigu Aabü, gidaléi áhuduraguni lun Baali fulasurugugiñe. Ariha bumuti san subudi lani Heowá sun katei ani chülǘ lan dan lun labeichuniña ha adügübaña katei wuribati?

“Irisini le ménrengubei libihíniwa, manügünti buiti houn gürigia” (Ariñawagúni 20:21).