Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 39

Furumiñeti urúei Ísüraeli

Furumiñeti urúei Ísüraeli

Rúhali meha Heowá alidihatiña lun hadundehaniña ísüraelina, íbini ítara, busentiña meha aban urúei. Ligía hariñagunbei lun Samueli: “Garúeitetiña lílana sun néchani, busentiwa giñe aban”. Saminati meha Samueli mabuidun lan le hamuriahabei. Ligía lafurieidunbei lun Heowá, ábati lóunabuni Heowá: “Mama buguya mabusenrun habéi gürigia ha, au mabusenrun habéi. Ariñagabá houn gayara lan garúeite hamá ani lamuriahaba lan urúei ligía bandi katei hama”. Íbini ítara, ariñagatiña: “Meberesegúntiwa! Busentiwa warúeite!”.

Ábati lariñagun Heowá lun Samueli ábanba lan wügüri gíriti Saulu furumiñeti lurúeite Ísüraeli. Dan lídinbei Saulu arihei Samueli Ramá, aba lanúadiruni Samueli Saulu lau léserun agülei lábulugun lun larufuduni ligíaba lan urúei.

Lárigiñe, aba lóundaraguniña Samueli ísüraelina lun larufuduni iseri harúeite houn. Dan háluahanbalin Saulu madari hamuti. Subuditi bun ka lan uagu? Ladüga laramudagun lidan bandi ílagu. Dan hadarirunbalin, aba hasagaruni ñéingiñe, ábati hararamagüdüni hamidangua sun gürigia. Gágubuti meha hawéi sun ha ñéinbaña, magadiñe ligía. Lariñaga Samueli: “Ariha huméi urúei le lanúadirubei Heowá”. Aba hagúarahan gürigia: “Gabagarilá urúei!”.

Furumiñe, adüga lumuti meha Saulu le lariñagubei Samueli lun, gaganbadi ligía lun Heowá. Lárigiñe, aba lasansirun. Aban weyu, ariñagati Samueli lun Saulu lun lagurabahani lun hadügün aban sákürifisiu. Michugúnti meha üma lun urúei lun ladagaragüdün. Kei ladarasaragun Samueli, aba ladügüni Saulu adagaragüdüni lábugua. Ka ladügübei Samueli? Ariñagati lun Saulu: “Mosu yebe buga gaganbadi ban lun Heowá ani madügün bumuti”. Furendei lumuti san Saulu mosu lan gaganbadi lan lun Heowá súnwandan?

Lárigiñe, ñǘdünti Saulu ageindagua hama amaléküna, ariñagati Samueli lun lun mígirun lan ni aban hádangiñe wínwanñu. Madügünti Saulu gasu, ígira lumuti urúei Agagü wínwanñu. Lariñaga Heowá lun  Samueli: “Ígira láadina Saulu, madügün laali le nariñagubei lun”. Aba lírudun Samueli saragu, ábati lariñagun lun Saulu: “Lanúadira Heowá amu urúei ladüga maganbadihaadibu lan lun”. Dan lagararaagunbei Samueli lun lidin, aba lárügüdün Saulu luéigiñe taru ladaüragun, ábati laheiridagunu. Aba lariñagun Samueli lun Saulu: “Ítara luba lagidaruni Heowá arúeihani buéi”. Mini lan lira, líchugubei lan meha Heowá arúeihani lun amu gürigia le hínsiñehabuti lun ani gaganbadi ligía.

“Gebegitimati gaganbadiwa lan [...] sügǘ lau lichugún adagaragüdüni” (1 Samueli 15:22).