Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 38

Adügati Heowá lun here lan Sansón

Adügati Heowá lun here lan Sansón

Ábaya háhuduragun saragu ísüraelina houn guáriua, ligía lígirunbei Heowá lun hárügüdüni filistéana hamúan. Añahein meha giñe ísüraelina ha únbaña hínsiñe lan Heowá. Manóa aban hádangiñe. Masaaniti meha tuma lani weiriou. Aban weyu, óunahati Heowá aban ánheli ayanuha tuma lani Manóa weiriou. Lariñaga tun: “Gasaanibadibu aban irahü. Ligíaba esefuraña ísüraelina hawéi filistéana. Ábanbei nasaréu”. Subuditi bun kátaña lan nasaréu? Lubúeingu Heowá ha espechalitiña ani siñati meha hásaruni hádiburi.

Lau lásügürün dan, aba nasirua lan lisaani Manóa, aba líchugun Sansón lírime. Dan laweiridunbei Sansón, adügati Heowá lun weiri lan lere. Gayaraati meha láfarun Sansón liñún láurügü lúhabu. Aban weyu, áfarati 30 filistéana ligía lábugua. Iyereeguti meha Sansón houn filistéana ani áluahatiña meha háfaruni hilagubei. Aban guñoun, rédeiti Sansón arumuga uburugu Gasa. Ábati houdin láganiñu agurabahei lubadu lubenari uburugu lun háfaruni larugan binaafin. Sarati Sansón dan le áriebugili, aba lagidaruni lubenari uburugu luéigiñe baríeiru. Aba líchuguni légewagu ani aban lidin lau lábulugun aban wübü yarafa lun uburugu Ebürón.

Lárigiñe, aba houdin filistéana ariñaga tun Dalila, to ladari Sansón: “Wíchuguba bandi seinsu bun ánhabu ibiha lun lariñaguni Sansón bun ka lan uagu weiri lubéi lere. Wárügüdübei lun wádaruni furisunrugun”. Ánhatu Dalila ladüga busén tani seinsu. Máhati yebe Sansón lariñaguni tun ka lan uagu weiri lubéi lere. Keiti mígirun tubalin lungua, aba lariñaguni tun: “Masarúngili nídiburi ladüga nasaréu lan au, anhein asarúa nídiburi, neferidirubei nere”. Wuribati ladüga Sansón lau lafiñerun tuagu, adián?

Lau lóufudagun, aba tidin Dalila ariñaga houn filistéana: “Subudi naali ka lan uagu here lubéi Sansón”. Adügatu lun larumugun balañu  luagu tiyada, luma lun lasarúniwa lídiburi. Ábati tagúaragun: “Sansón, añahán filistéana ya!”. Méreeli meha Sansón dan le lagagudunbei. Ábati hárügüdüni filistéana, aba hasagaruni lagu, da haméi furisunrugun.

Aban weyu, óundaragu haña saragu milu filistéana tidan litenpulun Dagón, le habungiute, agúaraha: “Rula wabungiute Dagón wágani Sansón wáhaburugun! Barǘ huméi Sansón ñahoun! Adüga wamaamuga bula lau”. Adügatiña lun lararamun Sansón labadinagua bián wagabu, ábati hadügün bula lau. Aba layumuragun Sansón: “Heowá, adügabá fulesei nun, ruba erei nun ábanya wéiyaasu”. Lumoun dan ligía, hüchayaali meha lídiburi Sansón. Aba ládaruni tuágaburi ténpulu lau sun lere. Ábati téiguadun ténpulu hawagun sun ha ñéinbaña, hilatiña súngubei, íbini Sansón.

“Lun larihíniwa luagu lúmagiñe lan Bungiu liabin óunwenbu ubafu le wawagubei” (2 Korintuna 4:7).