Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 32

Aban iseri alidihati hama bián würiña ganigitiña

Aban iseri alidihati hama bián würiña ganigitiña

Adundeha lumutiña Hosué lumutuniña Heowá luagu bandi irumu darí lounwen dan le 110 lubéi irumu lau. Sun meha wínwangili lan Hosué, huduguatiña ísüraelina lun Heowá. Lárigiñe lounwen, aba háhuduragun houn guáriua, kei hadügüni kananna. Kei ígira hamani ísüraelina Heowá, aba lígirun lun líchugun Habín, aban urúei kananna, lidere dan houn. Ábati hayumuragun lun Heowá lun líderaguniña. Ligía líchugunbei Heowá aban iseri alidihati gíriti Barakü houn. Ligíaba meha íderaguaña agiribuda lun Heowá.

Óunahatu Débora, aban würi profeta, agúara lun Barakü. Ábati tíchuguni uganu lúmagiñeti Heowá le lun: “Barüba 10,000 wügüriña, beiba adunragua hama lisudaranigu Habín lubadu duna Kisón. Ñeinba bagañeirei Sísara, le hábuti lisudaranigu Habín”. Aba lariñagun Barakü tun Débora: “Nídiba ánhabu ñüdün numa”. Tariñaga lun: “Nídiba buma. Ani subudibéi mámaba lan buguya áfarei Sísara hilagubei. Ariñagaali Heowá ábanba lan hiñaru áfarei”.

Ñǘdüntu Débora, Barakü hama lisudaranigu luagun wübü Taworu lun haranserun lubá wuribu. Kei lasubudiruni Sísara lira, aba lóundaraguniña lisudaranigu tau burí karü lánina wuribu, ábati lidin luagun fulasu wayati.  Tariñaga Débora lun Barakü: “Líchigaali Heowá agañeiruni bun uguñe”. Ábati lararirun Barakü hama 10,000 lisudaranigu luéigiñe wübü lun ladunragun hama lisudaranigu Sísara ha hérebaña.

Adügati Heowá lun lafuluduhan lidunari Kisón. Ábati táhürüdagun hakarün lidan múa. Ígira lumutu Sísara likarün, ábati léibaagun ñéingiñe. Gañei lumuti Barakü hama lisudaranigu wuribu hama lisudaranigu Sísara, ánheinti Sísara, anurahati! Éibaaguati dise ani aba lidin aramudagua tidan tikianpun aban würi gíritu Haeli. Rutu luniñe míligi, darugua tuguya lau tau aban sidi. Le lubucha luagu wuriburuguna le, aba larumugun. Ábati tiabin Haeli maniñu luagun, aba tádaragun aban pegi tídangiñeti tikianpun lábulugu. Aba lounwen.

Ñǘdünti Barakü áluahei Sísara. Ábati táfuridun Haeli tídangiñe tikianpun ariñaga lun: “Beluba, narufudaali eyeri le báluahabei bun”. Dan lebelurun Barakü, aba larihini Sísara múarugu, hilaali. Aba leremuhan Barakü tuma Débora lun halawahani Heowá luagu líderaguniña ísüraelina lun hagañeiruniña háganiñu. Lárigiñe lira, wínwantiña ísüraelina lidan darangilaü luagu 40 irumu.

“Ruti Bungiu aban uganu; saragu haña würiña ariñaguti” (Sálumu 68:11).

Lanwoun ariñahani

GARÜDIA AWISAHATU

“Aba násaarun kei aban úguchuru Ísüraeli”

Ka wafurendeirubei luagu ganigi luma afiñeni lídangiñe abahüdaguni tídangiñeti Bíbülia tuáguti Débora?