Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 28

Tadimurehan aban burigü

Tadimurehan aban burigü

Barühaña meha ísüraelina yarafa lun 40 irumu lidan fulasu mageirawati. Ragühaña meha saragu uburugu. Ani ru hamaaru meha hakianpun-agei lidan fulasu mawübüriti le gíribei Moabü, luagun oubaü le ñéingiñe lubéi laboucha weyu libiti duna Hordán. Dánhali meha lun hebelurun lidoun Fulasu Füramasewati. Hanufudeti meha Balakü, le lurúeite Moabü, hagidaruni ísüraelina lufulasun luéi. Ligía lóunahanbei agúara lun aban wügüri gíriti Balaamü lun lidin Moabü íñaraguaña ísüraelina o ariñaga lau umalali héreti ayumaha lan katei wuribati houn.

Lariñaga Heowá lun Balaamü: “Moun lumuti bíñaraguniña ísüraelina”. Ligía maha lubéi Balaamü lidin. Ábaya lagúarun urúei Balakü lun luagu libiaman wéiyaasu ani füramaseti lun líchuguba lan furumiñeguarügü katei le labusenrun lun. Ni ítara, mídinti Balaamü. Ábati lariñagun Bungiu lun: “Beiba, ani lérügübei nariñagun bun bariñaga”.

Aba ládinun Balaamü tuagun lilügün burigü, ábati lidin Moabün. Saminagili meha líñaraguniña ísüraelina, íbini ariñagaali lan Heowá lun lun madügün lani. Ǘrüwañein wéiyaasu lararamun lani Heowá ánheli ǘmada. Siñati larihini Balaamü ánheli, ánhounti lilügün burigü, ariha tumuti. Furumiñe, aba tegeyedun burigü luéigiñe üma lun áraabun. Lárigiñe, aba tegeyedun luagun aban baríeiru lauti dübü, ábati lámurudun lugudi Balaamü luagu. Lagumuhóun, aba tarounrun burigü lamidangua üma. Sagü tegeyedun burigü luéi üma, labeichunu Balaamü lau aban wewe.

Lidan lǘrüwan labeichunu, aba ladügün Heowá lun tadimurehan burigü. Ábati tálügüdüni burigü Balaamü: “Ka san uagu babeichana?”. Lariñaga Balaamü tun: “Adügatibu lun narihíniwa kei ibidiougua tau. Lun hamuga anuhein lan gusiñu numa, náfaraadibu hamuga hilagubei”. Tariñaga burigü lun: “Nuguya bilügünboun burigü lúmagiñe furumiñeti dan. Adügañaha naali san le bun?”.

Aba lígirun Heowá lun larihini Balaamü ánheli. Ábati lariñagun ánheli lun: “Wéridi láadibu Heowá lun míñaragun bániña ísüraelina”. Lariñaga  Balaamü: “Wuribati le nadügübei. Buítimati lun nagiribudun núbiñoun”. Aba lariñagun ánheli lun: “Gayaraati bidin Moabü ani lérügübei lariñagun Heowá bun bariñaga”.

Afiñetibu san furendei lan Balaamü lídangiñe le asuseredubei? Uá, ladüga ǘrüwañein wéiyaasu lálugun líñaraguniña ísüraelina, gama lumoun adügati Heowá lun labiniruniña lubaragiñe líñaraguniña. Lau lásügürün dan, aba hageindagun ísüraelina hama lílana Moabü, ábati lafarúniwa Balaamü hilagubei. Buítimati hamuga meha gaganbadi lan Balaamü lun Heowá, adián?

“Góunigigua humá hungua luéi igaaduaü, ladüga mama luéigiñe liibe lúmati gürigia labagarida” (Lúkasi 12:15).