Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 17

Anúadirati Moisesi leseriwidun lun Heowá

Anúadirati Moisesi leseriwidun lun Heowá

Dan meha hawinwanduña lubéi liduheñu Hakobu Ehiptu, aba hasubudirúniwa kei ísüraelina. Lárigiñebei lounwen Hakobu luma Hosé, aba lagumeserun aban iseri faraón arúeiha. Hanufudeti meha faraón le luéi lachülürün dan lun héretima hamá ísüraelina hawéi ehiptuna. Ligía ladügünbei lun idamuni hamá. Fosu lumutiña meha lun hadügün ladüríyu luma lun hawadigimaridun áraabu. Lau sun meha wuribatima lan hóuseruniña ehiptuna ísüraelina, eibu meha dan haganwoundun. Kei meha magundan lan faraón lau lira, aba lóunahan áfaraguagüdaña sun wügüriña irahüñü ha figigiña hadan ísüraelina. Ma funa lueirin hanufude ísüraelina, adián?

Aba gasaani tan aban würi ísüraelina gíritu Hokawédi aban lubuidun irahü. Lun tóunigiruni, aba tíchuguni lidoun aban faniñe, ábati taramuduni labadinagua góunwenre-agei lidan duna Nilu. Aba terederun María, to litu irahü, yarafa lun tarihini kaba lan asusereda.

Aba tachülürün lisaani faraón ágawaha ñein,  ábati tarihini faniñe. Arihatu aban irahü ayahuaha lidan, aba lagudemedun tun. Ábati tálügüdünu María: “Busentibu nidin áluaha aban hiñaru to gayaraati tátagüdüni irahü le bun?”. Ariñagatu tun lun tadügüni, ábati tidin María agúara tun túguchu. Aba tariñagun lisaani faraón tun Hokawédi: “Barübei irahü le, góunigibei, nafayeirubadibu”.

Dan laweiridunbei irahü, aba tanügüni Hokawédi tun lisaani faraón. Aba tíchuguni lisaani faraón iri Moisesi luagu, ábati tanügüni tisaanime. Aba laweiridun Moisesi kei lisaani faraón ani gayaraati meha libihini sun le labusenrubei. Lau sun lira, mabulieidagunti luéi Heowá. Subudi lumuti meha Moisesi mama lan ehiptuna ligía, ísüraelina lan, ani anúadirati leseriwidun lun Heowá.

Dan le 40 lubéi irumu lau Moisesi, aba desidírü lan líderaguniña ísüraelina. Aban weyu, aba larihin Moisesi aban ehiptuna agayuaha luagu aban idamuni ísüraelina. Ábati labuleseiruni Moisesi ehiptuna ligía darí lun láfaruni hilagubei, ani aba laramuduni lúgubu lidan sagoun. Dan le lasubudirunbalin faraón, aba lálugun láfaruni Moisesi, ábati lanurahan Madiaun. Góunigi lumuti Heowá ñein.

“Lau lafiñen Moisesi [...] máhati lun lanügǘniwa keisi tiráü liráü lurúeite Ehiptu; himei lumuti lasufurirun hama lumutuniña Bungiu” (Ebüréu 11:24, 25).