Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 9

Gasaanidügá meha aban irahü!

Gasaanidügá meha aban irahü!

Barühali meha Abüraámü saragu irumu maríeiñu tuma Sara. Ígira hamaaru meha tubuidun haban uburugu Uru lun hawinwandun tidan burí kianpu. Ani mekeharuntu Sara ladüga afiñe tan luagu Heowá.

Wéiriti meha tayumahan Sara gasaani tan, ligía tariñagunbei lun Abüraámü: “Anhein gasaani Agarü to nubúein bau, ítara luba kamá hamuga nisaani”. Lau lásügürün dan, aba gasaani tan Agarü aban irahü, ábati híchugun Ísümaeli luagu.

Saragu dan lárigiñe, dan le gádürü-wéinhali-disinéfu irumu lau Abüraámü, gádürü-wein-nefu tau Sara, chülütiña ǘrüwa wügüriña bisidaña. Amisuraha lumutiña Abüraámü eiga luma emeraagua lábugiñe aban tídibu wewe. Subuditi bun kátaña lan? Ánheligu meha. Ariñagatiña lun Abüraámü: “Le aban irumu, gasaanibadibu aban wügüri irahü tau Sara”. Taganbahaña meha Sara tídangiñe tikianpun, ábati téherahan tídangua, samina tuguya: “Gayaraabei funagia gasaani nan lau sun wéiyaadina lan?”.

Aban irumu lárigiñe, aba gasaani tan Sara aban irahü, kei füramase lani ánheli le lóunahabei Heowá. Aba líchugun Abüraámü Isaakü luagu, “éherahani” mini lan iri le.

 Dan le séingühali irumu lau Isaakü, arihatu Sara adaagua lan Ísümaeli bula lau. Kei meha busén tubéi tóunigiruni tisaani, aba tadimurehan luma Abüraámü, tariñaga lun: “Bugaboun Agarü luma Ísümaeli yáagiñe”. Mabusenrunti yebe Abüraámü ladügüni lira. Ligía lariñagunbei Heowá lun: “Adügabéi le tariñagubei Sara bun. Nóunigirubei Ísümaeli. Ánheinti füramasei le nadügübei bun, lídangiñeba Isaakü lagunfulira”.

“Lau giñe tafiñen Sara, [...] resibitu erei lúmagiñe Bungiu lun tagaraüdün [...] ladüga tafiñerun luagu lagunfulirubei lan Bungiu le füramase lubéi” (Ebüréu 11:11).