Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 12

Leresibiruni Hakobu alagan

Leresibiruni Hakobu alagan

Bián-wein meha irumu lau Isaakü dan le lamarieidunbei tuma Rebeka. Wéiriti meha tínsiñe lun. Lau lásügürün dan, aba gasaani hamá aban feru mádounu.

Esaú meha líribei íbugañaü, ánheinti amuleñein, Hakobu. Hésebeti meha Esaú áraabu ani géibaahati meha. Ánheinti Hakobu hésebetimati meha múnada.

Lidoun meha dan ligía, gíbetimati meha múa luma seinsu leresibirun isaani le íbugañaü sügǘ hau lamulenu dan le lounwen lúguchi. Alagan liña laguarún lun lira. Luáguba meha giñe le ibihiti liibe-agei alagan hadan liduheñu Isaakü lagunfulira füramasei le ladügübei Heowá lun Abüraámü. Meberesegunti meha Esaú lau füramasei ligía. Ánheinti Hakobu, subudi lumuti meha weiri lan lisudinin.

Aban weyu, chülüti Esaú lau lubucha uagu múnadoun lárigiñe léibaahan sun weyu. Aba lirimichuni líhemen éigini semeeti le lábougubei Hakobu, ábati lariñagun lun: “Láfaraadina nilama! Ruba murusun lídangiñe gisóu funati le búmabei ñein nun!”. Lariñaga Hakobu lun: “Rubei biricha keisi íbugañaü nun, furumiñe”. Aba lóunabuni Esaú: “Kámeñein alagan numa! Rédeiba lau! Neigin nabusenrubei”. Larufuduña san Esaú lichú aau lau lira? Uá. Lasansiruña meha aban katei le wéiriti lebegi luágurügü aban asiedu éigini.

 Dan le laweiyadunbei Isaakü, aba lachülürün dan lun labiniruni lisaani le íbugañaü. Ábati tíderaguni Rebeka Hakobu, tisaani le amuleñein, lun ligía lan eresibirei abinirúni. Dan lasubudirunbalin Esaú lira, aba lagañidun, ábati lasaminarun láfaruni lamulen hilagubei. Kei busén lan Isaakü tuma Rebeka hóunigiruni Hakobu, ariñagati Isaakü lun: “Beiba lúbiñoun biyaurite Lawán, le tati búguchu, berederame ñein darime lásügürün ligañi Esaú”. Adügati Hakobu gasu hau lagübürigu, ábati lanurahan luéi láfaruni líbugaña.

“Kagia hu lan lun gürigia lagañeiruni sun ubóu, leferidirounme luani? Úati ni kata lánina ubóu le, le gayaraati líchuguni gürigia luagu tesefurun luani” (Márükosu 8:36, 37).