Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 3

Maganbadi lan Adán tuma Ewa lun Bungiu

Maganbadi lan Adán tuma Ewa lun Bungiu

Aban weyu, dan tábuguarügüñoun lan Ewa, aba tálügüdünu aban hewe: “Inarüni san mígirun lan Bungiu lun heigin furuda tídangiñe ni aban tídibu wewe?”. Tariñaga Ewa tun: “Gayaraati weigin furumiñeguarügü furuda, anhein tídangiñe aban tídibu wewe, siñati weigin. Ánhawa eiga tídangiñe, wóunweguba”. Tariñaga hewe tun: “Móunwegunbadün. Anhaün eiga, ábame ítara humá kei Bungiu”. Inarüni san lira? Uá. Íbini ítara, afiñe tumuti Ewa iyeeni ligía. Eibu meha tálüdün Ewa aríaguoun furuda tuguya, ábatima meha busén tan téiginu. Ligía tágürünbei murusun tídangiñe, ru tuguya lun Adán. Ani lau sun meha subudi lani Adán hóunweguba lan ánhaña maganbadi lun Bungiu, houti.

Weyuméme ligía, ñǘbuinti Heowá adimureha hama rábounweyu. Álügüda lumutiña ka lan uagu aba lubéi maganbadi hamá. Ru tumuti Ewa duru tuagun hewe, ánheinti Adán, ru lumuti duru tuagun Ewa. Aba labuguni Heowá Adán tuma Ewa lídangiñe fuluri-agei ladüga maganbadi hamá. Ruti giñe ánheligu lidan lebelaagüle fuluri-agei tuma aban eféin lautu watu lun mebeludigia hamá ñeinhin.

Ariñagati giñe Heowá labeichubei lan yeeti le adimurehabei tun Ewa. Le linarün katei, mama hewe ayanuhaboun tun Ewa. Madügün lumutiña Heowá hewe lun hayanuhan. Aban meha ánheli wuribati adügübei lun tayanuhan hewe tuguya. Busenti meha leyeedunu Ewa. Satanási, le Mafia, líribei ánheli ligía. Lagumuchuba Heowá lau Satanási yarafa madise. Ítara, masigihalime eyeedaña gürigia lun hadügün katei wuribati.

“Gáfarahadigubeiñein Mafia lúmagiñe furumiñeti dan. Márügüdünti luéigiñe inarüni, mariñagunti giñe inarüni” (Huan 8:44).