Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 100

Pábulu luma Timotéu

Pábulu luma Timotéu

Aban meha íbiri nibureingili le lídangiñeti damuriguaü le Lísütürabei Timotéu. Güriegu meha lúguchi, ánhounti Eunise to lúguchu huríu. Arufudahatu meha lúguchu tuma Loida, to lagütü, lun luagu Heowá lúmagiñe liñüraü.

Ñǘdünti Pábulu Lísütüra lidan libiaman wéiyaasu lánina apurichihani le ladügübei, ábati larihini weiri lan hínsiñe íbirigu lun Timotéu ani súnwandan lan meha busén lan líderaguniña. Amisuraha lumuti Pábulu Timotéu lun laweiyasuhan luma. Lau lásügürün dan, arufudahati Pábulu lun Timotéu lun buidu lan lapurichihan luma larufudahani uganu buiti luáguti Bungiu.

Adundeha lumuti sífiri sandu Pábulu luma Timotéu le ñeinhin lumuti houdin. Aban áriebu, arihati Pábulu aban arufudúni le ídanbei lariñaga aban wügüri lun lun lidin Masedónia lun líderaguniña lílana. Ábati lidin Pábulu, Timotéu, Sílasi luma Lúkasi apurichiha ñein luma lun hagumeserun burí damuriguaü.

Lidan uburugu masedóniana le gíribei Tesalónika, gíbetiña wügüriña hama würiña adügagutiña houngua kristiánugume. Añahein meha hádangiñe huríu ha ñéinbaña, gimugatiña meha lun Pábulu luma houn lupaanágu. Óundaraguatiña bandi gürigia wuribatiña lun hanügüniña íbirigu aduruuheina hagibugiñoun gumadimatiña ha uburugubaña. Ábati hagúarahan huríu: “Láganiñu lurúeite Roma wügüriña ha!”. Kei gayara lubéi meha leferidiruni Pábulu luma Timotéu habagari, aba hanurahan áriebu ligía uburugun Beréa.

Busentiña meha gürigia ha Bereabaña haganbuni uganu buiti luáguti Bungiu ani ánhatiña bandi güriegu hama huríu lun inarüni. Danti hachülürünbei fiu huríu Tesalónikagiñe agubuha turobuli, aba lidin Pábulu uburugun Atenasi. Rédeiti Timotéu luma Sílasi Beréa lun híchugun erei houn íbirigu. Lau lásügürün dan, óunaha lumuti Pábulu Timotéu lunya lidin Tesalónika íderaguaña íbirigu lun hawanduni lanarime éibaahouni le  ñeinbei. Lárigiñe, aba lóunahani Pábulu Timotéu bisidaña lílana amu burí damuriguaü lun líchugun erei houn.

Ariñagati Pábulu lun Timotéu: “Héibaahouba sun ha busenbaña heseriwidun lun Heowá”. Éibaahouati Timotéu ani dáwati furisunrugun luagu lafiñen. Lau sun lira, gúndaati meha lau larufuduni úaragua lan lun Heowá.

Ariñagati Pábulu houn filipuna: “Nóunahaali Timotéu hun. Larufudubei hun ida luba lan hapurichihan luma hawinwandun keisi lubúeingu Heowá”. Subudi lumuti meha Pábulu gayara lan lafiñerun luagu Timotéu. Seriwitiña lun Bungiu úara luagu bandi irumu ani buiti meha hanaagun houngua.

“Úati amu numa le asaminaruti kei au, le áfaaguti lun buidu lan lidin hun; súngubei hawouguarügüñein haritagua, mama le labusenrubei Kristu Hesusu” (Filipuna 2:20, 21).