Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 90

Lounwen Hesusu lidan fulasu le gíribei Gólugota

Lounwen Hesusu lidan fulasu le gíribei Gólugota

Barǘ hamuti hábutigu fádirigu Hesusu ligibugiñoun Pilatu le gumadan. Ábati lálügüdüniña: “Ka san lidurunbei wügüri le?”. Hariñaga lun: “Ariñagati luougua urúei lan!”. Ábati lálügüdüni Pilatu Hesusu: “Buguya san harúeitebei huríu?”. Lariñaga Hesusu: “Mama lánina ubóu le narúeihan”.

Lárigiñe, óunaha lumuti Pilatu Hesusu lun Erodesi, le gumadanbei Galiléa, lun larihini anhein adarira lidurun. Ruti Erodesi fe madügün lan Hesusu ni kata wuribati, ábayati lóunahani lun Pilatu. Lariñaga Pilatu houn gürigia: “Ni au, ni Erodesi, madaritiwa lidurun wügüri le. Nígiragüdaali”. Ábati hagúarahan gürigia: “Áfarabei! Áfarabei hilagubei!”. Aba habeichuni súdaragu, suegua hamuti ani bulesei haméi. Rútiña aban ridi lauti hiiyu lábulugu, adüga hagía bula lau, ariñageina: “Buiti binaafin, harúeite huríu!”. Lariñaga Pilatu houn gürigia: “Ariha numuti madurun lan wügüri le”. Ábati hagúarahan: “Dáguabei luagu wagabu!”. Aba lederegeruni Pilatu Hesusu houn lun háfaruni hilagubei.

Barǘ hamuti súdaragu Hesusu lidoun fulasu le gíribei Gólugota. Ábati hádaraguni luagu aban wagabu ani ígira hamuti dibiñu ñein. Furíeiti Hesusu lun Heowá: “Núguchi, ferudunabaña ladüga ibidiñeti houn ka lan hadügübei”. Adügatiña gürigia bula lau Hesusu, ariñageina: “Anhein Lisaani bubéi Bungiu, rariba luéigiñe wagabu, sálbagua báamuga bungua!”.

Ariñagati aban hádangiñe gürigia wuribatiña ha dibiñubaña lóubagiñe Hesusu lun: “Haritaguabá nuagun danme bagumeserun arúeiha”. Füramaseti Hesusu lun: “Númabadibu lidan Paraísu”. Rábounweyu ligía, aba laburigadun luagu ǘrüwa oura. Rédeitiña hádangiñe lani Hesusu disipulugu rara yarafa lun wagabu, íbini María to lúguchu. Amuriahati Hesusu luma Huan lun lóunigirunu María kamá hamuga lúguchu.

Lagumuhóun, aba lariñagun Hesusu: “Gúnfuliha sun katei!”. Ábati labuluchagun, aba lounwen. Oura ligía, dagati aban óunwenbu hárabaganali. Ani héiriguatu korutína to afanreinragubalin fulasu le Sándubei luéi le Sándutimabei ténpulurugu, tamidan túmagua. Ligía lariñagunbei hábuti súdaragu: “Inarüni Lisaani lan Bungiu wügüri le”.

“Lidan Kristu lagunfulira sun le füramase lubéi Bungiu houn lánigu” (2 Korintuna 1:20).

^ par. 12 Ariñagatu Bíbülia garifuna lidan burí bérusu le hilá lan Hesusu luagu aban gurúa. Gama lumoun, dan le tabürüdǘnbei Bíbülia furumiñe, dimurei staurós áfuachubei lidan güriegu ani wagabu mini lubéi dimurei le.