Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 87

Lagumuhóun ladinerun Hesusu

Lagumuhóun ladinerun Hesusu

Sagü meha irumu hefeduhani huríu Luéyuri Esefuruni weyu 14 lidan hati le gíribei Nisán. Haritaguagüda lumuti fedu le houn sefu lániña Heowá lídangiñe hamudirawagun Ehiptu, barǘ laña lidoun Fulasu Füramasewati. Lidan irumu 33, efeduha lumuti Hesusu Luéyuri Esefuruni hama lani apostolugu lidan aban rumu íñuti Herusalén. Dan héigiña lan, aba lariñagun Hesusu: “Lalugurubadina aban hídangiñe”. Aba taweiridun hanigi apostolugu, ábati hálügüdüni Hesusu: “Katei san?”. Lariñaga Hesusu: “Le unti níchigoun murusun fein to”. Ábati líchugunu lun Húdasi Isükarióte. Ouraméme ligía, aba láfuridun Húdasi ñéingiñe.

Lárigiñe lafurieidun Hesusu, aba lamurusuhanu fein, ábati líchugunu houn apostolugu ha erederubaña luma. Aba lariñagun houn: “Hou humóun fein to. To ítaraboun kamá hamuga núgubu, le lunbei nederegeruni huagu”. Ábati lafurieidun tuagu diwéin, aba líchugunu houn lani apostolugu. Lariñaga: “Gurá humóun diwéin to. To ítaraboun kamá hamuga nita, le lunbei náwiyuruni lun ferudunawa lan figóu. Füramasetina hun harúeihaba lan numa sielu. Adüga huméi le sagü irumu lun haritagun nuagun”. Añahagua lani Hesusu disipulugu adügei adamuridaguni le aban rábounweyu luagu irumu. Ladinerun Aburemei líribei adamuridaguni le uguñe weyu.

 Lárigiñe heigin, aba hasigenehan apostolugu luagu ka lan hádangiñe súdinitimabei. Ábati lariñagun Hesusu houn: “Le súdinitimabei haganagua ligía anaagubei lungua kei le ñǘraügilibei, le maweirinbei isudinin”.

Ariñagati giñe Hesusu houn: “Numadagu huguya. Ligía nariñagunbalin sun le labusenrubei Núguchi lun nariñaguni hun. Yarafaali dan lun nidin sielun lumoun Núguchi. Herederuba ya ani hasubudirubei gürigia nani humá disipulugu lau hínsiñegua humá húmagua. Lunti hínsiñegua humá húmagua ítara kei hínsiñe nun”.

Ábati lafurieidun Hesusu amuriaha luma Heowá lun lóunigiruniña sun disipulugu. Amuriahati giñe luma Heowá lun líderaguniña awadigimarida lidan darangilaü luma úarani. Furíeiti amuriaha lun louserúniwa liri Heowá lau inebesei. Ábati leremuhan Hesusu úara hama lani apostolugu lun halawahani Heowá, lárigiñe, aba háfuridun. Layarafaduña meha dan lun ladaürǘniwa Hesusu.

“Manufudeda humá, nirahüñü; lau sun mibe humá, gúndaati Bungiu lun líchuguni larúeihan hun” (Lúkasi 12:32).