Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 82

Larufudahan Hesusu ida liña lan lafurieidúniwa

Larufudahan Hesusu ida liña lan lafurieidúniwa

Sun meha le hadügübei fariséugu, adüga hamuti meha lúnrügü harihiniña gürigia. Ánhaña meha adüga somu katei buiti, kéiburi hafurieidun, adüga hamuti meha le ñein hamuti bandi gürigia. Ábaha hafurendeirun furíei miginaguti lun hariñaguni bandi wéiyaasu tidan burí haligilisin huríu o ǘmadarugu lun haganbuniña gürigia. Ligía taweiridunbei hanigi gürigia lau lariñagun Hesusu: “Mafurieidabá kei hadügüni fariséugu. Heyeedaguña houngua lau hasaminarun gunda lan Bungiu lau bandi dimurei le hariñagubei. Bayanuhaña luma Heowá dan le bafurieidun. Mariñagabéi ligiaméme sagü bafurieidun. Busenti Heowá lun bariñaguni lun ídatima liña lan basandiragun bungua”.

Ariñagati Hesusu lunti lan hafurieidun ítara: “Wáguchi le siélubei, inebewalá biri. Ñǘbuinla barúeihan.  Adügüwalá bugundan ya ubouagu kei ladügǘniwa sielu”. Lárigiñe, aba lariñagun lunti lan hafurieidun amuriahei heigin le lánina sagü weyu, ferudunawa lan hafigoun luma amu burí katei le hemegeirubei.

Ariñagati giñe Hesusu: “Furieibá súnwandan. Sigiba amuriaha katei buiti luma Búguchi Heowá. Sun agübürigu, busentiña híchugun katei buiti houn hasaanigu. Anhein amuriaha bisaani fein buma, míchugunbadibu dübü lun, adián? Anhein amuriaha aban úduraü buma, míchugunbadibu aban hewe lun, adián?”.

Ábati lariñaguni Hesusu houn ka lan labusenrubei larufudahan: “Anhein ru bubéi idewesei buiti houn bisaanigu, busentimabei Búguchi Heowá líchugun sífiri sandu bun”. Adüga bumuti san le lariñagubei Hesusu? Ka burí katei bamuriahabei luma Heowá dan le bafurieidun?

“Hamuriaha, ábame lichugún hun; háluaha, ábame hadarirun, daün humá luagu bena, ábame ladaarúniwa hubá” (Matéu 7:7).