Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 83

Líchugun Hesusu heigin saragu milu gürigia

Líchugun Hesusu heigin saragu milu gürigia

Murusun dan lubaragiñe lefeduhóun Luéyuri Esefuruni le lánina irumu 32, buchá meha hawagu apostolugu ladüga sun liña lan hagiribudun lídangiñe hapurichihan lidan bandi fulasu. Ligía ládinunbei Hesusu hau tidoun aban ugunei lun houdin emeraagua Betüsáida. Dan tayarafadunbei ugunei larun barana, aba larihin Hesusu ñǘdünha lan bandi milu gürigia hárigi ñeinhin. Lau sun busén lan yebe Hesusu lerederun lábugua hama lani apostolugu, resibi lumutiña gürigia lau ínsiñeni. Areidaguagüda lumutiña ha sándibaña, arufudaha ligía houn. Rédeiti Hesusu sun weyu arufudaha houn luagu Larúeihan Bungiu. Dan le laguñeedunbei, aba hayabin lani apostolugu ariñaga lun: “Mósutia lamaaña lan gürigia ha. Óunaha baña áluaha heigin”.

Lariñaga Hesusu houn: “Uá, mídinbaña, ru humá éigini houn”. Ábati hariñagun apostolugu lun: “Busentibu woudin agañeiha fein houn?”. Ariñagati aban hádangiñe apostolugu gíriti Felipe: “Íbini hamuga gibe lan seinsu wama, siñabei hamuga wagañeihan fein houn sun gürigia ha”.

Aba lálügüdahan Hesusu: “Ka éigini wámabei ya?”. Lariñaga Andürési: “Anuhein seingü fein wama hama bián harahüñü úduraü. Lóuguabei lira”. Lariñaga Hesusu houn: “Barǘ humóun fein hama úduraü nun”. Ábati lariñagun houn gürigia lun hañuurun ligibuagu sagadi lidan burí sétanu le ñein hamuti 100 o 50 gürigia. Aba lárügüdünu Hesusu fein hama úduraü, aba larihin sielun, furíei ligía. Lárigiñe, aba líchuguni éigini houn apostolugu  lun hafanreinhani houn gürigia. Hóutiña 5,000 wügüriña bóugudin hawéi würiña hama irahüñü darí hakimuledun. Lárigiñe, aba habudahani apostolugu sun le ígiragubei luéi lagurúniwa. Buíngüdatiña 12 faniñe! Wéiriti lubuidun milaguru le, adián?

Wéiritu hanigi gürigia luagu milaguru le darí lun busén hamá hadügüni Hesusu urúeime. Kei meha subudi lubalin Hesusu machülügili lan dan le lanúadirubei Heowá lun lagumeserun arúeiha, aba lóunahaniña gürigia hábiñoun. Ábati lariñagun houn lani apostolugu lun houdin luagun le aban oubaü libiti duna Galiléa. Aba hádinun tidoun hagune, ánheinti Hesusu, aba lidin lábugua luagun aban wübü. Ka uagu? Ladüga meha busén lan lasagarun dan lun lafurieidun lun Lúguchi. Meberesenga meha anhein gibe lubéi lunti ladügüni Hesusu, súnwandan meha ladarirun dan lun lafurieidun.

“Madiherida humá luagu éigini le gagumuchaditi; áluaha huméi éigini le lánina ibagari magumuchaditi. Ligía éigini le lunbei níchuguni hun, au le Liráü Wügüri” (Huan 6:27).