Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 80

Lanúadiruniña Hesusu duusu apostolugu

Lanúadiruniña Hesusu duusu apostolugu

Lárigiñe meha apurichihaali lan Hesusu kéiburi irumu dimí, mosu meha desidírü lan aban katei súdiniti. Kaba meha lanúadira lun hawadigimaridun úara luma, adundeha hamañame lílana lani damuriguaü? Busén lumuti meha Hesusu ladundehan Heowá lun buidu lan lanúadahan. Ligía lídinbei lábuguarügü luagun aban wübü, ábati lafurieidun ñein sun áriebu. Larugan binaafin, aba lóundaraguniña Hesusu lani disipulugu ani anúadirati 12 hádangiñe lun lánime apostolugu. Ka hiri apostolugu baritagubei? Anihán híribei: Féduru, Andürési, Santiagu, Huan, Felipe, Barütolumé, Tomasi, Matéu, Santiagu le lisaani Alüféu, Tadéu, Simón luma Húdasi Isükarióte.

Andürési, Féduru, Felipe, Santiagu

Aweiyasuhatiña meha dúusugubei luma Hesusu. Lárigiñe larufudahan houn, óunaha lumutiña apurichiha. Ruti Heowá ubafu houn lun hasagahan sífirigu wuribatiña hawéi gürigia luma lun hareidaguagüdün sánditiña.

Huan, Matéu, Barütolumé, Tomasi

Lumadagu meha Hesusu 12 apostolugu ani afiñeti meha hawagu. Saminatiña meha fariséugu furumiñeguarügü lan gürigia  apostolugu ani ibidiñe lan ni kata houn. Ánheinti Hesusu, masaminarunti meha hawagu ítara. Arufudaha lumuti houn buidu ida luba lan hadügüni hawadigimari. Lúmabaña meha lidan burí dan le súdinitimabei lidan libagari, kéiburi lubaragiñe lounwen luma lárigiñe láguyugun. Kei Hesusu, galiléana meha giñe hiibe-agei apostolugu. Ani añahein meha hádangiñe maríeitiña.

Santiagu le lisaani Alüféu, Húdasi Isükarióte, Tadéu, Simón

Charatiña meha apostolugu ladüga gafigoun hamá. Anihein meha dan wuriba lan desidírü hamá o masaminarun hamá lubaragiñe hayanuhan. Anihein meha dan, magurabaguadi hamá. Asigenehatiña meha íbini luagu ka lan hádangiñe súdinitimabei. Íbini ítara, gürigia meha buítiña hagía ani hínsiñeti meha Heowá houn. Hagíaba meha furumiñetiña lílana lani Hesusu damuriguaü danme le úaali ubouagu.

“Nanügünün kei numadagu ladüga subudigüda naali sun le lariñagubei Núguchi nun hun” (Huan 15:15).