Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 68

Gasaani tan Isawéli aban irahü

Gasaani tan Isawéli aban irahü

Wínwanti meha aban fádiri gíriti Sakaríasi tuma Isawéli, to lani weiriou, yarafa lun uburugu Herusalén. Sügühali meha kéiburi 400 irumu lúmagiñe laransehóun lubarieirun Herusalén. Íbini meha sügühali lan bandi irumu lúmagiñe hamarieidun, masaanitiña meha. Aban weyu, dan le aniha lan Sakaríasi águdaha kupali lidan Fulasu Sánduti ténpulurugu, aba larufudagun ánheli Gabüriéli lungua lun. Ábati lanufudedun Sakaríasi saragu, lariñaga Gabüriéli lun: “Manufudedabá. Barütina ñunsu buiti lúmagiñe Heowá bun. Gasaaniboun Isawéli to bani weiriou aban irahü, bíchigame Huan luagu. Anúadira laali Heowá Huan lun ladügün aban wadagimanu espechaliti”. Lariñaga Sakaríasi: “Dandu nani weiriou kei au wéiyougaadiwa lun gasaani wamá, ida lubati nafiñerun bun?”. Lariñaga Gabüriéli lun: “Bungiu óunahabalina íchigei ñunsu le bun. Kei mafiñen bubéi, beredera mererunga darime nasirua lan irahü”.

Wéiriti lilü Sakaríasi lidan Fulasu Sánduti. Danti le láfuridunbei ñéingiñe, busentiña gürigia ha agurabahabaña bóugudi hasubudiruni ka lan asuseredubei. Siñá meha ladimurehan Sakaríasi. Láurügaali meha seini gayara lan ladimurehan. Ábati hasubudiruni gürigia resibihali lan Sakaríasi aban uganu lúmagiñeti Bungiu.

Lau lásügürün dan, aba tadageinadun Isawéli, ábati gasaani tan aban wügüri irahü, ítara kei lariñaguni ánheli. Ñǘdüntiña tumadagu hama tiduheñu arihei irahü, ábati hagundaarun tuma. Ariñagatu Isawéli: “Huanba liri”. Hariñagati tun: “Úati ni aban biduhe gíriti Huan. Ruba Sakaríasi luagu kei liri lúguchi”. Ábati labürüdün Sakaríasi: “Huan líribei”. Ouraméme ligía, aba gayaraahali lan ladimurehan Sakaríasi. Aganbúati luagu irahü le lidan sun Hudéa, ábati hálügüdagun gürigia houngua: “Káteibei funa san irahü le danme laweiridun?”.

Aba labuinchun Sakaríasi lau sífiri sandu. Ábati lariñaguni profesía le: “Alawaha waméi Heowá. Füramaseti  meha lun Abüraámü lóunahabei lan Mesíasi, aban asalbaragülei lun lesefuruniwa. Ani ábanbei profeta Huan, le lunbei lawisahan anite lan Mesíasi”.

Susereti giñe aban katei espechaliti tun aban tiduhe Isawéli gíritu María. Warihibei lidan le aban kapítulu.

“Siñati hasalbaragun gürigia houngua; anhein Bungiu, gayara lumuti sun katei adüga” (Matéu 19:26).

Lanwoun ariñahani

LE LARUFUDAHABEI BUNGIU NUN TIDAN BÍBÜLIA

Lapurichihani Huan anite lan Mesíasi

Profeta Huan ani awisahati anite lan Mesíasi. Ida liña hóunabun gürigia lun uganu ligía?