Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 72

Nibureinti Hesusu

Nibureinti Hesusu

Nasarétü meha lawinwanda Hosé tuma María lau Hesusu hama ha híbiri hasaanigu, wügüriña hama würiña irahüñü. Nadagimeinti Hosé kei sarafangei lun líchuguni hemegeirun liduheñu houn ani arufudahati houn luagu Heowá luma Lilurudun. Súnwandan meha houdin úara áhuduragua tidan haligilisin huríu, ñüdün hagía sagü irumu Herusalén lun hefeduhani Luéyuri Esefuruni.

Dan le 12 lubéi irumu lau Hesusu, adüga hamuti liduheñu limigifen wéiyaasu Herusaléun, kei hadügüni sagü irumu. Buin liña meha uburugu hau gürigia ha achülürübaña efeduhei Luéyuri Esefuruni. Lárigiñe fedu, giributi Hosé tuma María hábiñoun ani saminatiña yebe anite lan Hesusu úara hama ha híbiri aweiyasuhatiña. Danti le háluahanbalin hadan haduheñu, madari hamuti.

Aba hagiribudun uburugun Herusalén, ǘrüwañein weyu hau áluahei hasaani darí hadariruni ténpulurugu. Ñun liña meha Hesusu hadan máisturugu, aganbahaña luma adaagua lubuidun burí álügüdahani.  Wéiritu hanigi máisturugu lau Hesusu darí lun hagumeserun adaagua álügüdahani lun. Wéiritu giñe hanigi lau óunabagülei le líchugubei. Ariha hamuti meha gunfuranda lani Hesusu Lilurudun Heowá.

Wéiriti meha lidiheri Hosé tuma María. Ariñagatu María lun: “Niráü, áluaha wamaadibu lidan sun fulasu! Haliañadibu san?”. Lariñaga Hesusu tun: “Ibidiñeti lubéi hun mosu lan tidan nan luban Núguchi?”.

Giributi Hesusu hama lagübürigu hábiñoun uburugun Nasarétü. Arufudaha lumuti Hosé hawadigimari sarafangei lun Hesusu. Ka bisaminanbei? Ida liña funa san ligaburi Hesusu dan meha nibureingili? Dan le laweiridunbei Hesusu, ábatima aganwoundeina lan lichú lau ani gúndaatiña meha gürigia luma Bungiu lau.

“Nubungiute, hínsiñeti nun lun nadügüni bugundan, barǘ numuti barufudahan tidan nanigi” (Sálumu 40:8).

Lanwoun ariñahani

ARUFUDAHANI TÍDANGIÑETI BÍBÜLIA HOUN ISAANIGU

Súnwandan meha gaganbadi lan Hesusu

Anihein dan hénrengu lan gaganbadiwa lan houn agübürigu. Ida luba líderagunibu lani Hesusu hénpulu lun gaganbadi ban?