Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 67

Lubarieirun Herusalén

Lubarieirun Herusalén

Lidan meha lidaani Ésüdürasi, wínwanti meha aban ísüraelina gíriti Neemíasi lidan uburugu pérüsiana le gíribei Susa. Leseriwiduña meha lun urúei Árütaherühesi. Aban weyu, aba lachülürün aban líbiri Neemíasi uburugugiñe Hudá lau uganu wuribati le: “Hawinwanduña ísüraelina ha agiribudubaña Herusaléun lidan machouruni. Maranserúnwagili lubarieirun luma burí lubenari uburugu le hagünrinchagubei babilóniana”. Ábati lírudun Neemíasi saragu. Busenti meha lídehan, ligía lafurieidunbei lun Bungiu amuriaha lun lígiruni urúei lun lidin uburugun Herusalén.

Dan lárigiñe, aba larihini urúei hiru lan Neemíasi. Lariñaga lun: “Híruti narihinibu. Ka mégeibei?”. Lariñaga Neemíasi: “Ida luba mirun nan? Gádeiñu liña Herusalén le nageira”. Ábati lálügüdahan urúei: “Ka gayaraabei nadügüni lun níderagunibu?”. Ouraméme ligía, aba lafurieidun Neemíasi tidan lanigi. Lárigiñe, aba lariñagun: “Gayaraati hígirunina lun nidin Herusalén aranseha náamugei lubarieirun?”. Ariñagati urúei Árütaherühesi lun Neemíasi gayara lan lidin. Ru lumuti giñe urúei sun le mégeiwabei lun lun masuseredun lan ni kata wuribati lun Neemíasi lidan lidise luéiyasun. Írida lumuti giñe Árütaherühesi Neemíasi kei gumadimati Hudá, ru ligía fulansu lun lun ladügüni lubenari uburugu.

Dan lachülürünbei Neemíasi Herusaléun, aba lidin arihei ídatima liña lan baríeiru. Ábati lóundaraguniña fádirigu hama gumadimatiña lun lariñagun houn: “Wéiriti luriban katei ya. Mosu wagumeserun awadigimarida!”. Gúndaatiña gürigia lau saminaü le, ábati hagumeserun aransehei baríeiru.

Añahein meha hádangiñe háganiñu ísüraelina adügütiña bula hau, ariñaga hagía: “Íbini aban ounli áraabuna lágurubei baríeiru le hadügübei”. Madügüntiña nadagimeintiña gasu hau ani sigitiña awadigimarida. Eibu meha dan íñutima lan baríeiru derebugu ligía.

Desidírütiña áganiñu ha lídangiñetiña ámuñegueinarügü fulasu hábürühan luagun Herusalén sódini. Dan híchugunbei huríu fe, aba habuinchun lau anufudei. Lariñaga Neemíasi houn: “Manufudeda humá. Anihein Heowá wama”. Anúadirati wügüriña lun hóunigiruniña nadagimeintiña, ligía siñá lubéi hábürühan áganiñu hawagun.

 Aransehóuati lubarieirun uburugu luma burí lubenari lidan 52 weyu. Barǘ lumutiña Neemíasi lewitagu uburugun Herusalén lun hefeduhani sun hamá lan wadagimanu. Aba lafanreinraguniña lidan bián sétanu lun heremuhan. Ésüdürasi lidan aban sétanu, Neemíasi lidan le aban. Ábati léibugun aban sétanu ligibuagu baríeiru luagun aban oubaü, leti aban sétanu éibuga luagun le aban oubaü darí hegeyedaguni uburugu. Íñaaheina haña fidu, áfareina pülatíyu tuma árüpa luma eremuheina lun Heowá darí hóundaragun ténpulurugu. Adügatiña wügüriña, würiña hama irahüñü adagaragüdüni lun Heowá, ábati hefeduhan. Ma meha lueirin hagundan darí lun aganbúa lan hamalali lúmagiñe dísegiñe.

“Úagili ni aban adügütu áruma to lunboun tagünrinchagunibu” (Isaíasi 54:17).