Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Le larufudahabei Bungiu nun tidan Bíbülia

 ARUFUDAHANI 64

Danieli lidan huyu le ñein habéi liñun

Danieli lidan huyu le ñein habéi liñun

Arúeihati giñe amu urúei médiana gíriti Daríu Babilónia. Ariha lumuti Daríu espechali lan Danieli. Ru lumuti lun larihin hau gürigia hátima súdinibaña Babilónia. Gimugatiña meha wügüriña hagía lun Danieli, ligía busén habéi meha háfaruni hilagubei. Kei subudi habalin furíei lan Danieli lun Heowá ǘrüwa wéiyaasu luagu weyu, aba hariñagun lun Daríu: “Urúei, adügüwalá aban lúrudu lun mayumuragun hamá sun gürigia lun amu, luéidigia bun. Le maganbaditi lun lúrudu ligía, lunti ladarún lidoun huyu le ñein habéi liñún”. Gúndaati Daríu lau saminaü le, ligía laseinirunbalin lúrudu.

Kei laganbun Danieli luagu iseri lúrudu ligía, aba lidin lúbiñoun. Aba láhuduragun lun lafurieidun lun Heowá ligibugiñe aban funedera le hunren liña. Sódini, aba hebelurun wügüriña gimugatiña hagía lúbiñoun Danieli, ábati hadariruni afurieida. Aba héibaagun ariñaga lun Daríu: “Maganbaditi Danieli bun. Furíeiti lun Lubungiute ǘrüwa wéiyaasu luagu weyu”. Mabusenrunti meha Daríu lounwen Danieli ladüga buiti meha léiguadun lun. Sun weyu lau Daríu asaminara ida luba lan lesefuruni Danieli. Kei ni lubéi meha urúei siñati lasansiruni lúrudu le seini láalibei, ligía mosu lubéi meha líchugun Daríu gumadi houn lubúeingu lun hádaruni Danieli lidoun huyu le ñein habéi liñún gáñitiña.

 Wéiriti lidiheri Daríu luagu Danieli áriebu ligía darí lun siñá lan larumugun. Larugan binaafin, aba léibaagun Daríu le ñeinhin lubéi huyu, ábati lagúaragun lidoun: “Danieli, sefu lumutibu san Bubungiute?”.

Aganbati Daríu aban umalali. Lumalali Danieli! Ariñagati lun: “Darú lumuti lani Heowá ánheli hayuma liñún. Madügüntiña ni kata nun”. Aba lagundaaragun Daríu saragu! Ruti gumadi lun lasagarún Danieli lídangiñe huyu. Úagubeiti ni murusun biti luagu Danieli dan láfuridunbei ñéingiñe. Lárigiñe, aba líchugun urúei gumadi: “Dawa hamá wügüriña ha íchugubaña lidurun Danieli lidoun huyu”. Hou hamutiña liñún wügüriña hagía kei hadagarun lidoun huyu.

Ru lumuti Daríu gumadi le houn lumutuniña: “Mosu inebe lan Lubungiute Danieli houn sun huguya. Ligía esefurubalin Danieli hawéi liñún”.

Furíeitibu san lun Heowá sagü weyu kei meha ladügüni Danieli?

“Salba lumutiña lubeiti Bungiu ha deregeguabaña houngua lun luéi óuchawaguni” (2 Féduru 2:9).