Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Kátima san tarufudahabei Bíbülia?

 KAPÍTULU 17

Yarafagüda lumutiwa afurieiduni lun Bungiu

Yarafagüda lumutiwa afurieiduni lun Bungiu
  • Ka uagu lunti lubéi wafurieidun?

  • Ka lunbei wadügüni lun laganbuniwa Bungiu?

  • Ida liña lóunabuni Bungiu wafurieidun?

Busenti “Le adügübalin sielu luma múa” laganbuni wafurieidun

1, 2. Ka uagu mosu lubéi warihini furíei kei aban óunwenbu chansi, ani ka uagu mégei wabéi wasubudiruni le tarufudahabei Bíbülia luagu furíei?

ANHEIN konpararü wamá ubóu tumoun bandi waruguma to siéluboun, ñǘraütimati ubóu. Le linarün aban katei, lun Heowá, “le adügübalin sielu luma múa”, ítara haña néchanigu kei aban lédederun duna lídangiñe aban búngidu (Sálumu 115:15; Isaíasi 40:15). Gama lumoun, ariñagatu Bíbülia: “Yarafati Aburemei houn ha agúahabaña luagu, houn ha agúahatiña luagu lau hanarün. Gúnfuli lumuti hayumahan ha inebehabubaña lun; dan hamuriahan luma lun líderaguniña, aganba lumutiña” (Sálumu 145:18, 19). Ka mini lubéi dimurei burí le. Suntigabafu le Adügübalin sun katei yarafati woun ani laganbubadiwa ánhawa ‘agúara lun lau sun wanarün.’ Ma lubuidun chansi lun gayara lan wafurieidun lun!

2 Gama lumoun, anhein busén wabéi laganbuni Heowá wafurieidun, mosu wadügüni kei aubei labusenra. Ani ida luba wadügüni anhein ibidiñe lubéi woun ka lan tarufudahabei Bíbülia luagu furíei? Súdiniti wasubudiruni, lugundun yarafagüda lumutiwa furíei lun Heowá.

 KA UAGU WAFURIEIDA LUN HEOWÁ?

3. Írida humá aban resun súdiniti le uágubei mosu lan wafurieidun lun Heowá.

3 Amisuraha lumutiwa Heowá lun wafurieidun lun, ligía súdini lubéi wadügüni. Ariñagatu Bíbülia: “Madiherida humá luagu ni kata, ariñagarügü huméi sun katei lun Bungiu súnwandan dan le hafurieidun; amuriaha humá luma, mabulieidagunga lun híchugun eteingiruni lun. Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan, ladüga lídanñadün aban luma Kristu Hesusu” (Filipuna 4:6, 7). Chóuruti mabusenrun wamá wamahadun lun aban amisurahani buiti lúmagiñe Urúei le Iñutimabei ligibuagu ubóu.

4. Ka uagu gayara lubéi hariñagun dan le lan wafurieidun lun Heowá sun oura ábatima lan labuidurun wamadagua luma?

4 Dan le wafurieidun sun oura, ábatima labuidurun wamadagua luma Heowá, ligía ábanya resun le uágubei wafurieida lun. Ha umadagu buitiña súnwandan hadimurehan hámagua, ladüga hínsiñegua hámagua mámarügü ladüga anihein lan hemegeirun. Ederebugudeina liña hamadagua  eibu hadimurehan hámagua tídangiñe sun hanigi luagu hasaminan, hadiheri luma le hasandirubei. Ítareina liña asusereduti lun wamadagua luma Heowá. Seremei líburu to, furendeihadün saragu luagu le tarufudahabei Bíbülia luagu Heowá, ligaburi luma lisuuni. Ariha humaali Bungiu kei aban Gürigia inarüniti. Ruti furíei chansi hun lun hariñaguni lun Bungiu le hasaminarubei luma le hasandirubei tidan hanigi. Ítara luba hayarafaduntima lun (Santiagu 4:8).

KA LUNBEI WADÜGÜNI?

5. Ida liña wasubudiruni maganbun lani Heowá sun furíei?

5 Aganba lumuti san Heowá sun furíei? Ariha waméi le lariñagubei houn ísüraelina maganbaditiña ha awinwandubaña lidan lidaani profeta Isaíasi: “Íbini hafurieidun saragu, maganbun numutün. Dáseihali húhabu lau hitaü” (Isaíasi 1:15). Ítara liña, ánhawa óusera aban igaburi le mínsiñeti lun Bungiu, maganbun lubéi wafurieidun. Ligíati, lun laganbuni, mosu wagunfulirun lau fiú katei méiniti.

6. Lun laganbuni Bungiu wafurieidun, ka katei lunbei wadügüni ani ida luba warufuduni wadügüñein lan?

6 Furumiñeti katei le lunbei wadügüni, wafiñerun (aliiha huméi Márükosu 11:24). Abürühati apostolu Pábulu: “Siñati lagundaarun Bungiu wau anhein mafiñen wabéi luagu, lugundun lun wayarafadun lun, gasu wafiñerun luagu anihein lan ani líchuguba lan hafayeiruáha ha áluahabalin” (Ebüréu 11:6). Gama lumoun, lun inarüni lan wafiñen úati buídurügü lan wasubudiruni anihein lan Bungiu, aganba lániwa ani óunabalei wafurieidun. Arufuda wamuti wafiñen lau katei le wadügübei. Mosu larihín lidan ligaburi wawinwandun afiñe wamá (Santiagu 2:26).

7. a) Ka uagu mosu lubéi wadimurehan lun Heowá lau inebesei? b) Ida liña warufudun ǘnabuguni luma furangu dan le wafurieidun?

7 Amu katei le lamuriahabei Heowá, wafurieidun lun lau ǘnabuguni luma furangu. Ma inarüni anihein lan saragu resun lun wafurieidun lun Bungiu lau ǘnabuguni? Dan le  hadarirun gürigia chansi lun hadimurehan luma aban urúei, adüga hamuti lau inebesei ladüga subudi hamuti iñu lan lubara. Chóuruti garicha lan Heowá lun wadimurehan lun lau inebesei (Sálumu 138:6). Lau sun luwuyeri, ligía “Búngiubei le Suntigabafu” (Agumesehani 17:1). Lunti larufuduni ligaburi wadimurehan lun, subudi wamani luagu wéiri lan wǘnabun luéi. Lánhingichubadiwa giñe ǘnabuguni ligía lun furangu lan wafurieidun lun luma lun mariñagun wamani ligiaméme sagü dan (Matéu 6:7, 8).

8. Ida luba wawinwandun úara luma le wamuriahabei lidan wafurieidun?

8 Ámuya katei le mégeiwabei lun laganbuniwa Bungiu, wadügüni sun le wayaraati lun wawinwandun úara luma wafurieidun. Aban hénpulu, lun wamuriahan luma Heowá lun líchugunu “weigan fein to lánina sagü weyu”, mosu wawadigimaridun buidu lidan furumiñeguarügü wadagimanu le wadarirun gayararügaali ligía wadügüni (Matéu 6:11; 2 Tesalónikana 3:10). Ítarameme, ánhawa amuriaha luma lun líderaguniwa adiseda luéi aban débili, mosu wadisedun luéi katei le gayarabei lábürügüdüniwa lidoun óuchawaguni (Kolosana 3:5). Lau sun subudi wamaali lan ka lan lunbei wadügüni, mégeitiwa wasubudiruni lóunabagüle fiú álügüdahani luagu furíei.

ÁLUGÜDAHANI LUAGU FURÍEI

9. Kaba un wafurieida ani ka idan iri?

9 Kaba san un wafurieida? Arufuda lumuti Hesusu houn lani disipulugu ida luba lan hafurieidun: “Wáguchi Bungiu le siélubei” (Matéu 6:9). Ligía mosu lubéi lúnrügüba lan Heowá Bungiu wafurieida. Gama lumoun, busenti lun wasubudiruni lubara Liráü le ábanrügüti, Hesukrístu. Kei warihini lidan kapítulu 5, óunaha lumuti Heowá Hesusu ubouagun lun ligía lan ebegi le afayeirubei lun wasalbarun lídangiñe figóu luma óunweni (Huan 3:16; Rómana 5:12). Írida lumuti kei Fádiri Íñutimati luma Aguseragüdüti (Huan 5:22; Ebüréu 6:20). Ligía tariñagunbei Bíbülia  lun wafurieidun lidan liri Hesusu. Ligía guanarügü ariñagati: “Au ǘmabei, au inarüni, au ibagari. Ani úati achülürüti lumoun Bungiu Úguchili anhein mama lubéi nuéigiñe” (Huan 14:6). Lun laganbuni Heowá wafurieidun, mosu lúnrügüba lan wafurieida lidan liri Liráü.

10. Ka uagu mama lubéi mosu wesetirun lidan aban manera espechaliti lubá wafurieidun?

10 Mosu san wasetirun lidan aban manera espechaliti? Uá. Mamuriahanti Heowá lun wasetiruni wahabu o wágubu lidan somu manera. Arufudatu Bíbülia anihein lan ámuñegueinarügü esetiruni buiti lun wafurieidun. Gayarati hadügüni ñuruñu, bulugu, hudugu o rara (Neemíasi 8:6; Danieli 6:10; Márükosu 11:25). Mama wesetirun súdinitimabei lúnrügü harihiniwa amu, súdinitimati wafurieidun lau igaburi le richabei. Gayarati wafurieidun lidan wasaminan lidan furumiñeguarügü fulasu, dandu anhein wadügüñein lubéi wafisiute o anhein asusereda aban katei le magurabunti. Gayarati ua lan íchuguti fe wafurieiduña lan, ánheinti Heowá aganba lumutiwa (Neemíasi 2:1-6).

11. Ka burí katei gayarabei wamuriahani wawougua luma Bungiu?

11 Ka burí katei gayarabei wíriduni lidan wafurieidun? Óunabatu Bíbülia: “Ánhawa [...] amuriaha furumiñeguarügü katei keisi lugundan [Heowá], laganbubadiwa” (1 Huan 5:14). Gayarati wamuriahan furumiñeguarügü katei le úarati luma lugundan. Busenti san Bungiu wadimurehan lun luagu wadiheri? Anha. Dan le wadimurehan lun Heowá ítara liña kamá hamuga wadimurehaña luma aban wamada le buiti. Gayarati ‘wafurieidun lun lau sun wemenigin’, lidan amu dimurei, wariñaguni sun le wasandirubei lun (Sálumu 62:8). Buiti giñe wamuriahan luma lun líderaguniwa lau lani sífiri sandu lun wadügüni le buidubei (Lúkasi 11:13). Amuriahatiwa giñe luma lun ladundehaniwa lun desidírü wamá buidu, ru ligíame erei woun lun wawanduni turóbuli (Santiagu 1:5). Dan le wafigouhan, mosu wayumuragun lun, lun feruduna lániwa luagu lubafu lani Kristu  sákürifisiu (Éfesuna 1:3, 7). Mámarügüla wawougua wafurieida, furíei wamá giñe hawagu amu, keiburi waduheñu o wíbirigu lidan afiñeni (Adügaü 12:5; Kolosana 4:12).

12. Ida luba wadüga lun katei lan luáguti Waguchi le siélubei anügei lúgaaru le súdinitimabei lidan wafurieidun?

12 Katei burí luáguti Heowá lunbei súdinitima lan lidan wafurieidun. Ígiraguati resun lun walawahani luma lun wíchugun seremei lun tídangiñe sun wanigi luagu óunwenbu lareini (1 Krónikasi 29:10-13). Lidan Matéu 6:9-13 darí wamuti furíei le ladügübei Hesusu lun wáyeihani. Lidan, arufudahóuati woun lun wamuriahan lun inebewa lan liri Bungiu, mini lan le lun louserún kei sánduti o sagüráuti (aliiha huméi). Lárigiñe aba wamuriahani liabin Larúeihan Bungiu luma lun ladügǘn lugundan ya ubouagu keisi ladügǘniwa sielu. Ariha wamuti lárigiñe lan ladimurehan Hesusu luagu katei burí súdiniti le luáguti Heowá, ligía líriduni katei burí le lunbei wamuriahani wawougua. Ánhawa ígira lun Bungiu lan anügei lúgaaru le súdinitimabei lidan wafurieidun, arufuda wamuti mámarügüñein lan wawouguoun wasaminara.

13. Ka tariñagubei Bíbülia luagu átiribei lan dan lidura furíei?

13 Átiribei san dan lidura wafurieidun? Mariñaguntu Bíbülia átiribei lan dan lidura aban furíei, dandu anhein wabuaguarügü lubéi o hama amu. Gayarati chati lan, kei le wadügübei lubaragiñe wéigin, o migife lan kei dan le wíchuguni wawaguti lun Heowá wabuguarügü (1 Samueli 1:12, 15). Siadi lumutiña meha Hesusu ha afamurubaña sandu hamá ani adügatiña furíei miginaguti lun hariaguniña gürigia (Lúkasi 20:46, 47). Maweiriduntu lanigi Heowá lau le. Súdiniti hafurieidun gürigia tídangiñe sun hanigi, según wamegeirun luma gadantiwa ítara luba lidura wafurieidun.

Aganba lumuti Bungiu wafurieidun lidan furumiñeguarügü ókaasion

14. Ariñaga huméi ka lan mini lubéi dimurei tídangiñeti Bíbülia “Afurieida humá lun Bungiu sun dan” ani ka abinirúni weresibirubei?

14 Átiribei san wéiyaasu wafurieidun? Ariñagatu Bíbülia:  “Afurieida humá lun Bungiu sun dan” (Rómana 12:12; 1 Tesalónikana 5:17). Mama larufuduña le mosu lan wasügürüni wein-gádürü oura afuríeida. Mini lan le mosu lan wafurieidun lun Heowá sagü weyu luagu buiti le ladügübei woun luma lun wamuriahan luma lun ladundehaniwa, líchugun gurasu woun luma erei. Ma lubuidun abinirúni! Ígira lumutiwa Heowá lun wafurieidun lun le oura wabusenrun ani gayarati ladurarun le dan wabuserun. Ánhawa hínsiñehabu lun chansi le wibihibei lun wadimurehan luma Wáguchi le siélubei, wadariruba saragu ókaasion lun wadügüni.

15. Ka uagu lunti lubéi wagumuchuni furíei dandu le wadügübei wabuguarügü kei úara hama amu gürigia lau dimurei “ítarala”?

15 Ka uagu lunti lubéi wagumuchuni furíei lau dimurei “ítarala”? Anihein hénpulu burí tidan Bíbülia le arufuduti buidu lan lagumuchún furíei dandu le wadügübei wabuguarügü kei dan le wafurieidun hama amu lau dimurei “ítarala” (1 Krónikasi 16:36; Sálumu 41:13). Dan le wariñagun “ítarala” wabuguarügü, wachoururuñein lau lan wanarün wadimureha. Dan le wariñaguni hagibugiñe saragu gürigia (tidan yebe wanigi o lau umalali héreti), arufuda wamuti úara wamá luma le ariñawagubei (1 Korintuna 14:16).

IDA LIÑA LÓUNABUNI BUNGIU WAFURIEIDUN?

16. Ka wemenigibei dan le wafurieidun lun Bungiu?

16 Inarüni san óunaba lani Heowá wafurieidun? Chóuruti óunaba lani! Gíbeti resun buiti lun wemenigidun “aganba lani Bungiu wafurieidun” ani óunaba lani afurieiduni le hadügübei miñonu gürigia tídangiñe sun hanigi (Sálumu 65:2). Ani gayarati lachülürün lóunabagüle woun lidan ámuñegueinarügü manera.

17. Ka uagu gayara lubéi lariñawagun yusu lániña Bungiu ánheligu hama gürigia lun lóunabuni wafurieidun?

17 Lun lóunabuni wafurieidun, yusu lumutiña Heowá  lani ánheligu hamá giñe gürigia ha eseriwidubaña lun (Ebüréu 1:13, 14). Gíbetiña gürigia furieihaña lun Bungiu amuriaha ídemuei lun gunfuranda hamanu Bíbülia ani murusun oura lárigiñe chülüti somu lubuein Bungiu bisidaña. Sügǘ libeina le arufudati ánheligu lan adundehabalin lapurichihoun uganu buiti luagu Larúeihan Bungiu (Arufudúni 14:6). Luagu amu oubaü, dan le anihein lan wemegeirun, gayarati lóunabuni Heowá wafurieidun lau layusurun aban íbiri kristiánu lun líderaguniwa (Ariñawagúni 12:25; Santiagu 2:16).

Gayarati lóunabuni Heowá wafurieidun lau layusurun aban íbiri kristiánu lun líderaguniwa

18. Ida liña layusuruni Heowá lani sífiri sandu tuma Lererun lun lóunabuni hafurieidun lubueingu?

 18 Óunaba lumuti giñe Heowá Bungiu hafurieidun lubueingu lau lani sífiri sandu luma tau Lererun. Dan le wamuriahan ídemuei luma lun wáfuridun lídangiñe aban turóbuli, gayarati ladundehaniwa ani ru ligíame dǘgüdaguaü woun lau lani sífiri sandu (2 Korintuna 4:7). Dan le wafurieidun lun lubá desidírü wamá, saragu dan óunaba lumutiwa tau Bíbülia. Gayarati wadarirun bérusu burí le lunti líderaguniwa dan le waturiahanu Bíbülia wabuguarügü o dan le waliihan amu agumeiraguagüdüni kristiánu kei burí líburu to. Dan le woudin lidan adamuridaguni kristiánu o dan le leweridiruniwa aban wéiyaali lídangiñe damuriguaü le nidiheriti wawagu, gayarati laritaguagüdüniwa luagu somu bérusu tídangiñeti Bíbülia le lunti gabaroun wamani (Galasiana 6:1).

19. Ka lunbei gabaroun wamani ánhawa asaminara móunabun lani Bungiu wayumuragun?

19 Anihein dan genege lan woun darasa lan lóunabuni Heowá wayumuragun, marufudunti le siñá lan lóunabuni. Haritagua waméi lóunabubadiwa lan Heowá lau manera luma lidan dan le buítimabei lun. Subudi lumuti buidu ka lan wemegeirubei ani subudi lumuti giñe sügǘ wau ida luba lan líchuguni woun. Gíbeti dan ígira lan lun wasigirun “amuriaha”, “áluaha” luma “adaünha”  (Lúkasi 11:5-10). Anhein wadüga ítara, warufuduñein lun weiri lan wayumahan ani inarüniti lan wafiñen. Gayarati giñe marihin wamani furangu ida liña lan lóunabuniwa. Kéiburi dan le wafurieidun luagu somu turóbuli, gayarati lubaragiñe lan lagidaruni, aba líchugun erei woun lun wawanduni (aliiha huméi Filipuna 4:13).

20. Kei ruhali lubéi Bungiu chansi woun lun wafurieidun lun, ka uagu lunti lubéi wadügüni?

20 Wéiriti weteingiruni le Adügübalin óunwenbu ubóu, ladüga yarafati houn ha agúarubalin dan le hafurieidun lun kei aubei labusenra (aliiha huméi Sálumu 145:18). Kei resibi wamaali lubéi óunwenbu chansi lun wafurieidun, adüga waméi. Ladüga, buidubei wasandiragun woungua lau wasubudiruni gayara lan wayarafaduntima lun Heowá, le Aganbubalin wafurieidun.