Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Kátima san tarufudahabei Bíbülia?

 LANWOUN ARIÑAHANI

“Uani” luma “sífiri”: kátima san mini lubéi?

“Uani” luma “sífiri”: kátima san mini lubéi?

DAN le haganbuni dimurei uani luma sífiri, ka ñǘbuinbei lidoun hisaminan? Saragu gürigia afiñetiña aban lan katei le wanügübei wadan, le móunwedaditi ani marihúaditi giñe. Saminatiña dan lan wóunwegun aba lan láfuridun katei marihúaditi le luéi wágubu lun lasigirun awinwanda lidan somu fulasu. Kei aban lan saminaü komunti, wéiritu hanigi gürigia dan le hafurendeiruni marufudahan tani Bíbülia le. Katounti uani luma sífiri le uágubei tadimureha Lererun Bungiu?

DIMUREI “UANI” TIDAN BÍBÜLIA

Furumiñe adimureha wamá tuagu uani. Gayarati haritagua humani lidan lan ebüréu luma güriegu tabürüdüwa tibe-agei líburu to tídanboun Bíbülia furumiñe. Dan le hadimurehan tuagu uani, yusu hamuti abürühatiña Bíbülia dimurei ebüréu néfesch luma güriegu psykjé. Biángubei dimurei le lidan aban, fuati lóugiñe widü-san wéiyaasu tidan Bíbülia ani lidan burí abürüdǘni le tídanbei Traducción del Nuevo Mundo súnwandan hásügüragüdüni kei “uani”. Ida liña san layusurún dimurei “uani” tidan Bíbülia? Libe-agei dan tadimurehaña 1) hawagu gürigia, 2) hawagu animaalugu 3) habagari gürigia hama animaalugu. Ariha wamá fiú bérusu le arufuduti ǘrüwagubei layusurún.

 Gürigia.“Lidan lidaani Noé, [...] fiúrügüñanu gürigia, lidan amu dimurei, widü uani, esefurútiña luéi duna.” (1 Féduru 3:20TNM.) Furanguti yusuwa lan dimurei “uani” lidan bérusu le houn gürigia: Noé, lani weiriou, ǘrüwa lirahüñü hama hánigu lirahüñü weiriou. Rúati lúrudu le houn ísüraelina: “Budala kada aban hídangiñe tórügü lunboun léiginu hau sun tílana luban [‘uani’, TNM, abürüdǘni]” (Áfuriduni 16:16). Lidan amu dimurei, según átiriñanu lan gürigia hadan hafamilia. Ladimurehóuña giñe hawagu gürigia dan le layusurún dimurei “uani” lidan burí abürüdǘni le áfuachubei lidan Agumesehani 46:18; Hosué 11:11; Adügaü 27:37 luma Rómana 13:1 tidan Traducción del Nuevo Mundo.

Animaalugu. Lidan abahüdaguni tídangiñeti Bíbülia le luáguti ladügǘn sun katei aliihatiwa: “Aba lariñagun Bungiu: ‘Güriagualá duna sun hawuyeri animaalu [“uani”, TNM, abürüdǘni]” ha abagaridubaña lidan, ñein hamá giñe dunuru lun háhamahan garabalirugu. Ábati lariñagun Bungiu: ‘Ñein hamá sun hawuyeri animaalugu ubouagu, dandu ha ibiñanigu kéisigubeirügü ha áraabuna hama ha aduruuharügübaña múarugu.’ Aba lasuseredun ítara” (Agumesehani 1:20, 24). Lidan bérusu le wawati houn úduraü, ibiñanigu hama animaalu araabuna lau ligiaméme dimurei: “uani” o “alumagu”. Yúsuati giñe dimurei uani lun ladimurehóun hawagu dunuru luma hawagu amu animaalugu lidan burí abürüdǘni le áfuachubei lidan Agumesehani 9:10; Fádirigu 11:46 luma 1 Lúrudu 31:28 tidan Traducción del Nuevo Mundo.

Habagari gürigia. Anihein dan yusuwa lan dimurei “uani” lun ladimurehoun luagu habagari gürigia. Aban hénpulu, ariñagati Heowá lun Moisesi: “Hilagua sun buga ha abusenrubaña háfarunibu [‘ha áluahabarun buani’, TNM, abürüdǘni]” (Áfuriduni 4:19). Ka meha san háluahabei laganiñu Moisesi? Busentiña hagidaruni libagari. Aliihatiwa giñe saragu lan irumu lubaragiñe lira, dan le meha tágurahañein lan Rakeli tiráü le gíribei Benhamín, “yarafaaru buga lun tounwen [‘ladüga aba lan áfurideina tan tuani’, TNM, abürüdǘni]” (Agumesehani 35:16-19). Samina wamá giñe luagu le lariñagubei Hesusu: “Au hóuniribei mudún buiti; aban hóuniri mudún buiti derege lumuti libagari [‘luani’, TNM, abürüdǘni] hawagu mudún” (Huan 10:11). Derege lumutu Hesusu luani, o libagari hawagu sun gürigia. Lidan abürüdǘni burí le  áfuachubei tidan Traducción del Nuevo Mundo lidan sun bérusu le sun líñabei wakutihani, layusurúña dimurei “uani” lun ladimurehóun luagu habagari gürigia. Daritiwa amu burí hénpulu luagu ligaburi layusurún dimurei “uani” lidan 1 Urúeigu 17:17-23; Matéu 10:39; Huan 15:13 luma Adügaü 20:10 tidan Traducción del Nuevo Mundo lidan lan yebe bérusu o lidan abürüdǘni.

Anhadün asigira aturiahoun Bíbülia, harihiba ua lan ni aban bérusu le amigisiruti dimurei “uani” luma amu burí dimurei kei “móunwedaditi” o “magumuchaditi”. Lubaragiñe lira, arufuda tumuti Bíbülia góunwedadi tan uani (Esekiéli 18:4, 20, RVA). Afuranguagüdati le, tadimurehaña lan Bíbülia luagu aban hilaali lau dimurei “uani hilaaru” (Fádirigu 21:11, TNM, abürüdǘni).

KA SAN “SÍFIRIBEI”?

Ariha waméi ida liña lan tayusuruni Bíbülia dimurei “sífiri”. Saragu gürigia saminatiña yusuwa lan dimurei sífiri dan le ladimurehoun tuagu “uani”. Ani mítaranti. Furanguti tarufuduni Bíbülia mama lan ligiaméme “sífiri” tuma “uani”. Ida liña amu lan sífiri tuéi uani?

Yusu hamuti abürühatiña Bíbülia dimurei ebüréu rúaj luma dimurei güriegu pnéuma lun hadimurehan luagu “sífiri”. Afuranguagüda tumuti Bíbülia ka lan mini lubéi. Ariñagatu: “Anhein bagidara hani sífiri [rúaj], hawéi hóunwegun, ábaya hasaliragun kalikime” (Sálumu 104:29, NC). Ariñagatu giñe: “Hilañu liña úgubu sin sífiri [pnéuma]” (Santiagu 2:26, RVA). Yusu lumuti bérusu burí le dimurei “sífiri” lun ladimurehan luagu erei le íchugubei ibagari lun úgubu, ladüga sin lira úati ibagari. Ligíati, dimurei rúaj mamarügüñein kei “sífiri” tásügüragüdei Bíbülia sügügüda tumuti giñe kei “erei” o erei le íchugubei ibagari. Ariñagati Bungiu luagu Guran le lidaaniwagubei Noé: “Nóunaha aban guran ligibuagun ubóu lun lagumuchun lau sun le awaragubei [rúaj] le íchugubei ibagari” (Agumesehani 6:17; 7:15, 22, TNM). Ligíati, dimurei “sífiri” mini lan aban erei marihúaditi, igemeri lánina ibagari le adügübei lun lánhigichun sun le gabagaribei.

Mama tugíameme uani luma sífiri. Mégei lumuti úgubu sífiri lun lánhigichun, ítara kei mégei tan radiu elekütrisida lun tuadigimaridun. Samina wamá tuagun aban radiu to gayarati wanügünu lidoun furumiñeguarügü fulasu. Dan le wíchugun bateria  tidoun, elekütrisida le lídanbei, adügati lun tuadigimaridun. Dan le ua lan bateria tidan mawadigimariduntu. Ítara tiña giñe radiu dan le konektarua tan lun tibihin elekütrisida. Ligiaméme asuseredubei luma sífiri: erei le íchugubei ibagari lun úgubu. Ítara kei elekütrisida, masanditi ni kata masaminarun ligía. Aban erei sífiri, mama aban gürigia. Gama lumoun, dan le uaali sífiri o erei le lánina ibagari lidan wágubu, susereti le lariñagubei abürühati Sálumu: “Aba hóunwegun ábaya hasaliragun kalikime”.

Ariñagati Apurichihati 12:7 dan lan lounwen wügüri “ábame lagiribudun kaliki [le lani úgubu] lárigoun múarugun, giribu ligíame sífiri lárigoun lun Bungiu le íchugubalin”. Dan le láfuridun sífiri o erei lánina ibagari lídangiñe úgubu, aba lounwen úgubu ábati lagiribudun lárigoun lidoun múa. Ítara giñe, erei lánina ibagari giributi lun Bungiu le úmagiñebei liabin (Hobu 34:14, 15; Sálumu 36:9). Mama larufuduña le ñüdün lan erei lánina ibagari darí sielu. Le mini lubéi, dan le lan lounwen aban gürigia, Heowá desidírübei anhein labagaridayaba lubéi ámuñegü o mabagaridunhali lan. Lúhaburuguñein Bungiu libagari. Lubafurügüñein Bungiu lun lagiribudagüdüni sífiri, o erei lánina ibagari, lun gayaraya lan lawinwandun gürigia.

Wéiriti darangilaü le wasandirubei dan le wasubudiruni ligíaba lan ladüga Bungiu hau gürigia ha emeraagubaña lidan “hamúaha”! (Huan 5:28, 29). Danme le lachülürün oura lun láguyuguagüdüniña Heowá, ladügüba iseri úgubu houn ani ladügüba giñe lunya habagaridun lau líchuguni sífiri o erei lánina ibagari houn. Wéiribei ugundani ligía.

Anhein busén hubéi laganwoundun hufurenden luagu layusurún dimurei “uani” luma “sífiri” tidan Bíbülia, hadariruba ariñahani le huuti tidan garüdia ¿Qué nos sucede cuando morimos? Luma tidan líburu Razonamiento a partir de las Escrituras páhina 32 darí 36 luma 136 darí 140. Biángubei, hadügün gefentiña luagu Heowá.