Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Kátima san tarufudahabei Bíbülia?

 KAPÍTULU 19

Redei humá lidan línsiñehabu Bungiu

Redei humá lidan línsiñehabu Bungiu
  • Ka mini lubéi línsiñedun Bungiu woun?

  • Ida luba werederun lidan línsiñehabu Bungiu?

  • Kaba hafayeiruáha ha erederubaña lidan línsiñehabu Heowá?

Haramudaguagülebei san Heowá lidan dan peliguruti le?

1, 2. Halíaba wadarira aban aramudaguagülei chóuruti?

SAMINA humá hasaríñahaña lan, aba laburigadun, aba lagumeserun labirihaniga, wayuhururu luma aban lanarime huya. Aba héibaagun áluaha halíaba lan haramudagua. Ábati harihin nuhán lan aban dibasein loubuagu üma, mábeitu ani derebuguti tariyawagun. Ma lueirin hugundan lau hadarirunu!

2 Wawinwanduña lidan dan hénrenguti, ladüga sagü weyu wuribatimarügüti ubóu. Gama lumoun anihein aban aramudaguagülei chóuruti le lunbei ladouragun wau luéi dañu maransehati. Katei san? Arufudahatu Bíbülia: “Gayarati hariñagun lun Bungiu: ‘Buguya naramudaguagülebei, le óunigirubalina, Buguya Nubungiutebei, le uágubei nemenigida!’” (Sálumu 91:2).

3. Kaba wadüga lun Heowá lan waramudaguagüle?

3 Heowá, le Adügübalin sun katei, le Suntigabafu gayarati waramudaguagüle lan. Gabafutimati  Heowá luéi furumiñeguarügü gürigia o katei le asíadirutiwa. Íbini ladügǘn wuribani woun, gayarati laransehani Heowá sun damichi ligía. Kaba wadüga lun Heowá lan waramudaguagüle? Mosu wemenigidun luagu. Amisuraha tumutiwa giñe Bíbülia: “Redei humá lidan línsiñehabu Bungiu” (Húdasi 21). Ítara liña, mosu werederun lidan línsiñehabu Bungiu sigi wagíame lidan aban luma Wáguchi le siélubei. Anhein wadüga ítara, gayarati wachoururuni luagu ligíaba lan waramudaguagüle. Gama lumoun, ida luba wibihin aban lubuidun umadaguaü luma le Adügübalin sun katei?

ÓUNABA HUMÁ LUN LÍNSIÑEHABU BUNGIU

4, 5. Ka burí san fiú katei arufudubalin ínsiñeni le lasandirubei Bungiu wawagu?

4 Lun werederun lidan línsiñehabu Heowá mosu warihini ida liña lan larufuduni hínsiñe wamá lun. Samina humá luagun fiú arufudahani tídangiñeti Bíbülia le furendei humaalibei tidan líburu to. Ru lumuti Bungiu lubuidun Ubóu le lun waganoun ñein, buingüdalei lau saragu éigini, duna, animaalugu, fulasu buíduburiti luma amu burí katei naturáliti. Bungiu Abürügüdübarun Bíbülia, ariñaga tumuti ka lan liri luma ka lan ligaburibei. Afuranguagüdatu giñe, óunaha lani Bungiu Liráü le hínsiñebei lun ubouagun ani ígirati lun lasufurirun hilá ligía wawagu (Huan 3:16). Ítara liña líchugun aban óunwenbu idewesei woun, ligía anihein lubéi aban lubuidun emenigini wama lubá ámuñegü.

5 Lun lagunfulirun wemenigin mégeiwati amu katei le ladügübei Bungiu. Ruhali Heowá aban Arúeihani sielu, Larúeihan Mesíasi. Málübei Arúeihani le agumucha lau wasufurirun adügaleime Ubóu ábanme paraísu. Mame lubuidun! Wawinwanduba lidan ugundani luma darangilaü lun súnwandan! (Sálumu 37:29). Lidan wagurabahañein lan weyu ligía, líderagubadiwa leweridihan Bungiu lun buídutima lan wawinwandun. Ruti giñe Heowá amu idewesei woun:  furíei lun gayara lan wadimurehan luma. Nihán fiú manera le arufudubalin línsiñehabu Bungiu huagu luma hawagu sun gürigia.

6. Ida luba gayara lan hóunabun lun ínsiñeni le arufuda laalibei Bungiu hun?

6 Guentoti, mosu hálügüdagun hungua: “Ida luba nóunabun lun línsiñehabu Heowá?”. Másiñanti hóunabun saragu gürigia: “Lau ínsiñeni lun Heowá”. Ítara liña san hasaminarun? Ariñagati Hesusu nihán lan gumadi wéritimabei: “Hínsiñela Babureme le Bubungiute bun tau sun banigi, tau sun buani luma lau sun bisaminan” (Matéu 22:37). Anihein saragu resun lun línsiñedun Heowá hun. Ani lun línsiñedun Bungiu woun tau sun wanigi, wawani luma wasaminan, buídurügüti san wasandiruni ínsiñeni ligía?

7. Lun línsiñedun Bungiu woun, buídurügüti san wasandirun murusun ínsiñeni luagu? Afuranguagüda huméi ka lan uagu hóunaba ítara.

7 Arufudatu Bíbülia úati lan buídurügü lan wasandirun ínsiñeni luagu Bungiu. Íbini súdini lan ínsiñeni ligía, lagumeseharügüñein aban ínsiñeni inarüniti. Aban hénpulu, lun hamuga busén humá aban mansana, gufurumabadün hamuga láurügü aban tila? Uá. Inarüni súdini lan ilaü lun táhüchün aban tídibu mansana, gama lumoun furuda habusenruboun. Ligiaméme asuseredubei luma ínsiñeni luagu Heowá: mosu laweiridun ani gin ligíame. Arufudahatu Bíbülia: “Ladügǘniwa le lubeibei Bungiu, ligía ínsiñehabunibei lun; ani ménrenguti lagunfulirúniwa lugumadin” (1 Huan 5:3). Ínsiñeni le inarüniti líchuguba furuda buiti, ani mosu warufuduni lau le wadügübei (aliiha huméi Matéu 7:16-20).

8, 9. Ida liña warufuduni hínsiñe lan Bungiu woun ani seremei waña lan lun luagu le ladügübei wawagu?

8 Warufuduña ínsiñeni lun Bungiu dan le gaganbadi wamá  lun lugumadin. Ménrengunti ladügǘn, lugundun mama aban ihürügu lilurudun Heowá, lubaragiñe lira adügüwati lun gunda lan wabagari (Isaíasi 48:17, 18). Dan le wígirun lun ladundehaniwa, arufudatiwa wéiri lan wateingiruni luagu sun le adüga laalibei wawagu. Híruti fiúrügüñanu lan gürigia adügei. Mabusenruntiwa mateingiradi wamá, kei fiú gürigia lidan lidaani Hesusu. Areidaguagüdati diisi gürigia gawagutiña lépüra, ani ábanrügüñein ñüdünti etengirei (Lúkasi 17:12-17). Chóuruti busén wamá ítara wamá kei gürigia ligía, mama kei nefu ha mateingiradibaña.

9 Kati lugumadin Heowá lunbei gaganbadi wamá lun? Afuranguagüdawati fiú tidan líburu to. Haritagua wama fiú lídangiñe, lugundun ánhawa gaganbadi lun lugumadin Bungiu, ménrengubei woun werederun lidan línsiñehabu.

AYARAFADEINA HUMÁ LUN HEOWÁ SAGÜ WEYU

10. Ka uagu súdini lubéi wasigirun asubudirei Heowá Bungiu?

10 Wasubudiruni Heowá buidu ligía aban  pasu súdinibei lúntima wayarafadun lun. Magumubei wasubudiruni Heowá. Samina humá áraabuñadün lan aban guñoun ani diligati, aba háfuragun watu lun habacharagun. Hígiruña hamuga san lun eñegucheina lan watu ligía murusun murusun? Uá. Hínchagubei yebe, lun lasigirun durungu, ladüga anhein eñegucha hóunweba. Ítara, kei mégei lan watu línchawagun, mégeitiwa ‘wasubudiruni Bungiu’ lun here lan ínsiñeni le wasandirubei luagu (Ariñawagúni 2:1-5).

Ítara liña ínsiñehabuni luagu Heowá kei watu gemeti: mosu línchawagun lun, lun méñeguchun lan

11. Ka meha efekütu lánibei larufudahan Hesusu hawagu lani disipulugu?

11 Busenti meha Hesusu hakipuruni lani disipulugu ínsiñeni luagu Heowá luma tuagu Lererun to inarüniboun. Lárigiñe láguyugun afuranguagüda lumuti houn bián lánigu disipulu fiú profesía le agunfulirubei luagu tídangiñe líburu burí to abürüdüboun lidan ebüréu. Ka lanibei efekütu? Dan lárigiñe, ariñagatiña: “Ma sanditiwa tádühan wanigi le wagundan dan le adimureheina lubéi woun ǘmada, ariñagaléi tila Lererun Bungiu woun?” (Lúkasi 24:32).

12, 13. a) Hadan hibe-agei gürigia ubouagu, ka san asuseredubei lun ínsiñeni le hasandirubei luagu Bungiu luma tuagu Bíbülia? b) Kaba wadüga lun madilirun lan wínsiñehabu?

12 Dan le afurendeireina humani kátima lan tarufudahabei Bíbülia, ma ádühatu hanigi lau ugundani luma ínsiñeni luagu Bungiu? Chóuruti itara liña lan. Susereti giñe houn saragu gürigia. Guentó lunti wakipuruni ínsiñeni ligía wínwanñu adüga wagíame lun lawanserun. Mabusenruntiwa wasigiruni igaburi le ubouagubei uguñe weyu. Ariñagati Hesusu: “Ladiliruba hínsiñehabu saragu” (Matéu 24:12, RVA). Kaba hadüga lun madilirun lan ínsiñeni le hasandirubei luagu Heowá luma luagu inarüni le tídanbei Bíbülia?

13 Sigi humá afurendeira luagu Heowá Bungiu luma luagu Hesukrístu (Huan 17:3). Hulili lan hisaminan luagu le hafurendeirubei tídangiñe Bíbülia, hálügüdaguame hungua: ‘Ka larufudahabei le nun luagu Heowá? Ruti san somu resun nun, lun línsiñedun nun tídangiñe sun nanigi, nisaminan  tuma nuani?’ (aliiha huméi 1 Timotéu 4:15). Anhadün asaminara ítara, hérebei ínsiñeni le hasandirubei luagu Heowá.

14. Ka uagu súdini lubéi wafurieidun lun wakipuruni ínsiñeni le wasandirubei luagu Heowá wínwanñu?

14 Furíei ligía amu manera lun wakipuruni ínsiñeni luagu Heowá (1 Tesalónikana 5:17). Lidan kapítulu 17 furendeitiwa aban lan idewesei gebegiti lúmagiñe Bungiu furíei. Dan le yarafagua lan wadimurehan hama gürigia ani adüga wamuti tídangiñe sun wanigi, ábatima labuidurun wamadagua hama. Ítarameme, wamadagua luma Heowá lasigiruba wínwanñu ánhawa afurieida lun sun dan. Lunti mariñagun wamani ligiaméme sagü wafurieidun, masaminarunga luagun le wariñagubei. Mosu wayanuhan luma Heowá kei ladimurehan aban irahü luma lúguchi. Mosu wadügüni lau inebesei, mosu giñe wadaarunu wanigi lun Heowá (Sálumu 62:8). Lun wáhuduragun lun Bungiu, súdiniti waturiahanu Bíbülia afurieida wagíame lun tídangiñe wanigi. Ítarati ménrengubei werederun lidan línsiñehabu Bungiu.

RUTI ÁHUDURAGUNI LUN HEOWÁ UGUNDANI

15, 16. Ka uagu mosu lubéi warihini lapurichihóun luagu Larúeihan Bungiu kei aban lubuidun chansi luma aban irisini?

15 Taturiahoun Bíbülia luma afurieiduni ligía burí áhuduraguni lun Heowá le wadügübei wabuguarügü. Guentó ayanuha wamá luagu le wadügübei hama amu gürigia: wadimurehan luagu wafiñen. Adimurehadün san luma somu gürigia luagu le tarufudahabei Bíbülia? Anhein ítara liña lubéi, ruhali Heowá aban lubuidun chansi hun. Dan le wadimurehan luagu le furendei wamaalibei luagu Heowá Bungiu, gúnfulitiwa lau wadagimanu súdiniti le resibi hamaalibei kristiánugu inarünitiña: lapurichihóun uganu buiti luagu Larúeihan Bungiu (aliiha huméi Matéu 24:14; 28:19, 20).

16 Wéiriti meha lebegi apurichihani lun apostolu Pábulu darí lun lariñagun aban lan irisini (2 Korintuna 4:7). Úati wadagimanu buitimaati luéi ladimurehóun luagu Heowá luma  lisuuni. Leseriwidúniwa lun iyubudiri le buitimabei, barüti buiti resultóu. Dan le wapurichihan, íderagua wamutiñu ha harumabaña anigi ayarafada lun Wáguchi le siélubei lun hebelurun lidoun üma le anügübei lidoun ibagari magumuchaditi. Anihein funa san amu wadagimanu íchuguti ugundani  kei le? Dan giñe wadimurehan luagu Heowá luma tuagu Lererun, ábatima laganwoundun wafiñen luma línsiñe woun. Gebegiti áfaaguni le wadügübei lun Heowá (Ebüréu 6:10). Wakipuragun woungua lidan wadagimanu le, íderagua lumutiwa lun werederun lidan línsiñehabu Bungiu (aliiha huméi 1 Korintuna 15:58).

17. Ka uagu aban lubéi wadagimanu lunti ladügǘn lau loufudagun apurichihani?

17 Súdiniti waritaguni lunti lan lapurichihóun luagu Larúeihan Bungiu lau loufudagun. Ka uagu? Óunabatu Bíbülia: “Yarafaali lanarime luéyuri Wabureme! Yarafaali, furesegueina liña liabin!” (Sofoníasi 1:14). Ayarafadeina liña weyu lun lagünrinchaguni Heowá ubóu le. Mosu hasubudiruni gürigia! Mosu gunfuranda hamani nihán lan lidaani gaganbadi hamá lun Heowá, kei le garichabei lun larúeihan, ladüga lagumuchun ubóu le “lachülürüba lidan dan” (Abakúku 2:3).

18. Ka uagu lunti lubéi wáhuduragun lun Heowá úara hama kristiánu inarünitiña?

18 Busenti Heowá wáhuduragun lun hama kristiánugu inarünitiña. Ligía tariñagunbei Lererun: “Lunti giñe wáfaagun wíderaguniña wíbirigu lun hínsiñehabu hamá, luma lun hadügüni le buídubei. Wagía afiñetiña, moun lumuti wafalaruni hénpulu hani ha héchubaña lun midin hamá lidan wadamuridagun, lubaragiñe lira, ru wamá gurasu houn wíbirigu, guentotima lau ariha wamani luagu yarafaali lan luéyuri” (Ebüréu 10:24, 25). Dan le wadamuridagun hama wíbirigu alawaha wamuti Bungiu hudugua wagía lun. Rutiwa giñe iderebugu luma gurasu wouniwagua.

19. Ka lunbei wadügüni lun weredagüdüni wínsiñehabu lidan damuriguaü kristiánu?

19 Dan le wadamuridagun hama amu lubueingu Heowá, aban laweiridagun wínsiñehabu luma wamadagua lidan damuriguaü. Súdiniti warihini lubuidun hagaburi ha híbiri, ítara kei larihini Heowá lubuidun wagaburi. Magurabaha wamá macharabaña lan wíbirigu. Haritagua humá sun lan  wagía charatiwa ani ámuñegueinarügü lan wawanserun (aliiha huméi Kolosana 3:13). Anhadün áluaha umadaguaü hama ha hínsiñehabubaña lun Heowá lau sun here, laganwounduba hisubudin luagu. Ánhadün áhuduragua lun Heowá úara hama híbirigu, herederuba lidan línsiñehabu. Guentó ariha wamá ida liña lan líchuguni Heowá hafayeiruáha ha áhuduragubaña lun lau úaraguni ani redei hagía lidan línsiñehabu.

ÁFAAGUA HUMÁ LUAGU “IBAGARI LE INARÜNITI”

20, 21. Katei san “ibagari inarüniti” ani ka uagu aban lubéi emenigini buiti?

20 Ibagari, ligía afayeiruahaü le líchugubei Heowá houn lubueingu ha úaraguabaña, kati luwuyeri ibagari? Hibe-agei gürigia gayarati wariñagun gabagari wamá, ladüga awaraguatiwa, houtiwa ani gurá wagía. Dan le buidu lan lidin woun gayarati ariñaga wamá: “Nihán ibagaribei!”. Arufudatu Bíbülia ua lan gürigia gabagariti le tímatimaati.

Busenti Heowá lun hagundaarun lau “ibagari inarüniti”. Agia hugía, hibihubei san?

21 Amisuraha tumutiña Bíbülia sun gürigia lun “habihini ibagari magumuchaditi [o inarüniti]” (1 Timotéu 6:19). Dimurei “ibagari le inarüniti” mini lan ibagari le wagurabubei wibihin ámuñegü. Danme le mafigounhadiwa, gayara halime wariñagun gabagari wamá, ladüga wawinwanduba kei aubei labusenrei Bungiu furumiñe. Danme lidanhadiwa Paraísu ubouagu, wagundaaruba lau lubuidun átuadi, darangilaü luma ugundani dayarüti, ibiha wamaalime “ibagari magumuchaditi [o inarüniti]” (1 Timotéu 6:12). Ma lubuidun emenigini!

22. Ida luba gayara lan hibihini “ibagari magumuchaditi [o inarüniti]”?

22 Ida luba wibihin “ibagari magumuchaditi [o inarüniti]”? Emeneha lumutiña Pábulu kristiánugu “lun risi hamá lidan le buídubei, lun buidu lan hóuserun” (1 Timotéu 6:18). Mini lan, mosu wadügüni le wafurendeirubei tídangiñe Bíbülia. Lariñaguña san Pábulu lauba lan buiti le wadügübei wagañeirei “ibagari magumuchaditi [o inarüniti]”? Uá, wibihibei  ladüga “lugudemenehabu” Bungiu (Rómana 5:15). Ani gúndaati Heowá líchuguni hafayeiruaha ha eseribidubaña lun lau úaraguni. Busenti hibihin “ibagari magumuchaditi [o inarüniti]”, lau ugundani luma darangilaü. Ligía ibagari le agurabubaliña ha erederutiña lidan línsiñehabu Bungiu.

23. Ka uagu súdini lubéi werederun lidan línsiñehabu Bungiu?

23 Buiti wálügüdagun woungua: “Náhuduraguña san lun Bungiu kei lariñaguni tidan Bíbülia?” Ánhawa óunaba anha sagü weyu buiti üma le wárügüdübei ani waramudaguagülebei Heowá. Ladouraguba hau lumutuniña ha úaraguabaña luéi peliguru lidan lagumuhóun dan le. Lebelaagüdübadiwa giñe lidoun iseri ubóu le yarafaalibei. Buidubei weyu ligía! Óunwebu wagundan luagu warügüdüni emeri le buidubei lidan lagumuhóun burí weyu le! Anhadün desidírü buidu guentó, hagundaaruba lun súnwandan lau “ibagari magumuchaditi [o inarüniti]”, le labusenrubei Heowá woun lúmagiñe furumiñeti dan.