Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Kátima san tarufudahabei Bíbülia?

 LANWOUN ARIÑAHANI

Lidan san duusu-hati lágurahoua Hesusu?

Lidan san duusu-hati lágurahoua Hesusu?

MARIÑAGUN tumuti Bíbülia kátima lan dan lágurahoua Hesusu. Gama lumoun, rutu resun dügüdati lun wasaminarun mama lan lidan duusu-hati lasusereda.

Ida liña san ligaburi dan lidan duusu-hati Belén, ñein lubéi lágurahoua Hesusu? Hahatira huríu le gíribei Kisüléu héiguati laganagua unsu-hati luma duusu-hati, diliti ani húyougati. Ñéingiñe aban liabin hati le gíribei téwetü, laganagua duusu-hati luma eneru, ligía hati le dilitimabei lidan irumu ani héiguatu niewe lidan burí fulasu íñuti. Ariha waméi ka lan tariñagubei Bíbülia luagu ligaburi dan lidan fulasu ligía.

Ésüdürasi aban hádangiñe abürühatiña Bíbülia, arufuda lumuti aban lan meha hati diliti Kisüléu ani húyougati. Ariñagati óundaragua hamá saragu gürigia Herusalén “weyu wein lidan linefun hati [kisüléu] [...] lau adadagaruni [...] luagu huya le áhuyubei”. Ariñagati giñe adimureha hamá saragu gürigia ha damurigubaña ñein luagu ligaburi dan lidan hati burí ligía “meredeti láhuyun  huya le; siñati werederun bóugudi” (Ésüdürasi 10:9, 13; Heremíasi 36:22). Menefánti dan le ayarafadeina lan duusu-hati lidan fulasu ligía aba hebelaagüdüniña óunigirutiña mudún halügüniña mudún luéi hásügürüni áriebu bóugudi.

Gama lumoun, ariñagatu Bíbülia ñéinñanu lan hóuniri mudún áraabu óunigiraña halügüniña mudún áriebu le lágurahounbei Hesusu. Abahüdaguati Lúkasi, aban hádangiñe abürüdütiñu Bíbülia: “Áraabu bóugudi luéi Belén ñéinñanu hóuniri mudún, bou larugan hau óunigiraña halügüniña mudún” (Lúkasi 2:8-12). Ariha wamuti mámarügüñein lan wéyuagu houdin áraabu, ñein haganawa. Ígira hamutiña halügüniña mudún bóugudi áriebu. Anhein diliga lubéi meha Belén lidan duusu-hati ani húyougati, hawinwanduña hamuga san hóuniri mudún bóugudi? Uá. Ligíati, sun katei le asuseredubei dan le lágurahounbei Hesusu, arufudati mama lan lidan duusu-hati lasusereda. *

Arufuda tumuti Lererun Bungiu ídabuga lan lounwe Hesusu, ani murusunrügüñein ariñahani tíchugun luagu ídabuga lan lágurahoua. Haritaguagüda lumutiwa le, luagu lererun urúei Salomón: “Buítimati buidu lan ladimurehóuniwa luagu gürigia sügǘ lau ibiñein buiti. Buítimati luéyuri óunweni sügǘ lau luéyuri águrahouni” (Apurichihati 7:1). Ligía maweiridun tubéi wanigi ladüga gibe lan katei tariñagun Bíbülia luagu lani Kristu ministeriu luma lóunwen ani murusunrügüñein tadimurehan luagu luéyuri lágurahoun.

Dan le lágurahounbei Hesusu, ñéinñanu hóuniri mudún áraabu bou larugan hau halügüniña mudún

^ par. 1 Anhein busén hubéi lanwoun ariñahani, aliiha humoun líburu Razonamiento a partir de las Escrituras páhina 111-114, hadügün gefentiña luagu Heowá.