Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Kátima san tarufudahabei Bíbülia?

Anihán san labusenrubei Bungiu?

Anihán san labusenrubei Bungiu?

ALIIHA humoun periodiku. Aríagua humá bigibigitu o aganbaha humá radiu. Anihein saragu ñunsu ñein luagu anarimeni, wuribu, luma anarimeni le anufudedagüdübaniñu gürigia. Agia hituróbulin? Gayarati nidiherigüda lumutün lan lisandi o lounwen aban hiduhe le hínsiñeti hun. Gayarati sandigua huma hungua kei Hobu, aban meha wügüri buiti le ariñagubei luagu hǘrü lan lásügürün “sügǘ lau lisagounte barana” (Hobu 6:2, 3).

Háfuga hálügüdagun hungua:

  • Anihán san labusenrubei Bungiu nun luma houn ha híbiri gürigia?

  • Halíaba gayara lan nadeirun ídemuei lun naranseruni nituróbulin?

  • Lachülürüba funa san dan lun ñein lan darangilaü ubouagu?

Rutu Bíbülia óunabagülei le aubei gufuruma wamá.

 ARUFUDAHATU BÍBÜLIA LADÜGÜBEI LAN BUNGIU ASANSIRUNI BURÍ LE UBOUAGU.

“Laragahabei sun háguira; úaalime óunweni ni ayahuni ni íruni ni igarigu.” (Arufudúni 21:4)

“Hachubahaba ha méibugunbaña kei usari.” (Isaíasi 35:6)

“Ariha hagíame ha marihinbaña.” (Isaíasi 35:5)

 Láguyuguagüdübaña Bungiu hilaaña. (Huan 5:28, 29)

“Mariñagunbei ni aban lílana fulasu: ‘Sándiñadina’.” (Isaíasi 33:24)

“Ñeinlá saragu türigu [o éigini] fulasurugu.” (Sálumu 72:16)

 RESIBI HUMÉI BUITI LE TARUFUDAHABEI BÍBÜLIA

Maritagua humá uénedü lan le arufudúbei lidan páhina 4 luma 5. Füramase laali Bungiu, ani afuranguagüda tumuti Bíbülia ida luba lan lagunfuliruni.

Gama lumoun, arufudahatu giñe Bíbülia woun ida luba lan wagundaarun lau aban lubuidun ibagari uguñe weyu. Samina humá luagun hituróbulin luma burí hidiheri. Háfuga luagu lan seinsu, hufamilia, hátuadi o luagu lounwen aban hiduhe. Gayarati tíderagunün Bíbülia ararama lun burí turóbuli le, rutu giñe iderebugu dan le tóunabuni álügüdahani burí le:

  • Ka uagu wasufurira?

  • Ida luba gayara lan wagagibudagun luma idiheri le lánina ibagari?

  • Ka gayarabei wadügün lun gunda lan wabagari kei familia?

  • Ka asuseredubei woun dan le wóunwegun?

  • Warihubaña funa san waduheñu ha hilaguaañabaña?

  • Ka uagu gayara lubéi wachoururuni lagunfulirubei lan Bungiu le füramase laalibei?

 Lau haliihañoun lan líburu to arufudati luagu busén humá hasubudiruni ka lan tarufudahabei Bíbülia. Tíderagubadün líburu to lun hasubudiruni. Harihiba anihein lan álügüdahani ǘnabu lidan páhina lun burí kada párafu. Hínsiñeti houn míñunu gürigia ida liña lan haturiahanu gefentiña luagu Heowá Bíbülia lau álügüdahani luma óunabagülei, ani agurabatiwa hínsiñebei lan giñe hun. Biní láamugaün Bungiu lidan lubuidun sügǘ le, lun hafurendeiruni létima tarufudahabei Bíbülia.

Lanwoun ariñahani

TATURIAHÓUN BÍBÜLIA

Ida liña wíchugun külase tídangiñeti Bíbülia?

Subudiwati lidan sun ubóu ru hamá gefentiña luagu Heowá külase tídangiñeti Bíbülia houn gürigia maguburahanga. Ariha huméi ida liña lan ladügǘn.