Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Kátima san tarufudahabei Bíbülia?

 KAPÍTULU 10

Ka efekütu hánibei sífirigu wawagu?

Ka efekütu hánibei sífirigu wawagu?
  • Íderagua hamutiña san ánheligu gürigia?

  • Ida liña hayusuruni máfianu habafu hawagu gürigia?

  • Mosu san wanufudedun hawéi máfianu?

1. Ka uagu mosu lubéi wasubudiruniña ánheligu buidu?

LUN wasubudirun aban gürigia, mosu wasubudirun somu katei hawagu lufamilia. Ítarameme, lun wasubudiruni Heowá mosu giñe wasubudirun hawagu lufamilia ha siélubaña. Ida liña san layusuruniña Heowá ánheligu lun lagunfuliruni lisuini? Gúnfulihaña funa san somu wadagimanu lidan habagari gürigia? Yusu hamuti san ánheligu habafu lidan wabagari? Anhein ítara liña lubéi, ida liña?

2. Ka san adügübaliña ánheligu ani átiriñanu?

2 Adimurehatu Bíbülia hawagu ánheligu saragu san wéiyaasu. Aríaaha wamá fiú lídangiñe lun wasubudiruniña buidu. Ka san adügübaliña ánheligu? Óunabati Kolosana 1:16: “Lídangiñe Kristu ladügei Bungiu sun katei le siélubei luma le ubouagubei”. Sun sífirigu ha gíribaña ánheligu adüga lumutiña Heowá Bungiu aban aban lídangiñe Hesukrístu liráü le ígiramaübei. Átiriñanu san ánheligu? Ariñagatu Bíbülia añahein lan saragu san míñunu, ani sun hagía gabafutiña (Sálumu 103:20). *

3. Ka larufudahabei Hobu 38:4-7 woun hawagu ánheligu?

3 “Dan le nadügünbalin ubóu [...] labadinagua hagundan  nani ánheligu” liña Bungiu tidan Lererun (Hobu 38:4-7). Arufudahati bérusu le woun añaheinhaña lan meha ánheligu saragu dan lubaragiñe ladügǘn wügüri, íbini lubaragiñe ladügǘniwa Ubóu. Arufudahati giñe woun luagu sanditiñu lan ánheligu ugundani, lugundun adimurehati luagu aban lan “hagunda[aragun]”. Ítara liña, lidan dan ligía sun meha ánheligu lidanñanu aban familia eseriwida lun Heowá.

ADOURAGUNI LUMA HÍDEHAN ÁNHELIGU

4. Ida liña san tarufuduni Bíbülia berese hamá ánheligu úaraguatiña lau le hadügübei gürigia?

4 Lúmagiñe harihini hadügǘn furumiñetiña wagübürigu, arufudatiña sífirigu úaraguatiña ha, wéiri lan hebereserun hau gürigia ha aganwoundeinabaña ubouagu luma luagu lagunfulirun lisuini Bungiu (Ariñawagúni 8:30, 31; 1 Féduru 1:11, 12). Ani, lau lásügürün dan ariha hamaali desidírü hamá hibe-agei gürigia meseriwidun hamá lun Bungiu le adügübaliña. Chóuruti hírugüda lániña katei le ánheligu úaraguatiña. Gama lumoun, dan le lagiribudun aban gürigia lun Heowá anihein “ugundani hadan lani Bungiu ánheligu” (Lúkasi 15:10). Ariha wamaali, busén hamá ánheligu buídumei houn lubúeingu Bungiu. Ligía maweiridun tubéi wanigi lau layusuruniña Heowá saragu wéiyaasu lun líchugun iderebugu luma lun ladouragun hau ha úaraguabaña lun ubouagu (aliiha huméi Ebüréu 1:7, 14). Ariha wamá fiú hénpulu.

“Óunaha lumuti Nubungiute lani ánheli aba ladouruni hayuma liñún.” (Danieli 6:22)

5. Ka burí hénpulu wadeirubei tidan Bíbülia hawagu gürigia ha híderagubaña ánheligu?

5 Dan le lagumuchaguagüdǘnbalin Bungiu luriban uburugu Sodoma luma Gomora, redeiti Lotu hama lirahüñü würiña wínwanñu seremei hasagaruniña bián ánheligu ñéingiñe (Agumesehani 19:15, 16). Sígulu burí lárigiñe, aba lachüürǘn profeta Danieli lidoun aban fusu le ñein habéi liñún, ani masufurirunti dañu. Aba lariñagun: “Óunaha lumuti Nubungiute lani ánheli, aba ladouruni hayuma liñún” (Danieli 6:22). Lidan furumiñeti sígulu lidan wadaani, sagá  lumuti aban ánheli apostolu Féduru furisunrugúgiñe (Adügaü 12:6-11). Íderagua hamuti giñe ánheligu Hesusu dan le lagumeserunbei eseriwida lun Bungiu ubouagu (Márükosu 1:13). Ani murusun dan lubaragiñe lounwen, ñǘbuinti aban ánheli aba “líchugun erei lun” (Lúkasi 22:43). Ma funa lueirin dǘgüdaguaü le lasandirubei Hesusu lau libihin ídemuei lidan aban dan súdiniti lidan libagari!

6. a) Ida liña hadouragun ánheligu hau lumutuniña Bungiu uguñe weyu? b) Kaba burí álügüdahani ounabúa?

6 Uguñe weyu, marufudagunhaña sífirigu ha houngua houn lubúeingu Heowá ubouagu. Gama lumoun, añahagua ánheligu gabafutiña ha adouragua hau lumutuniña Bungiu, luéitima katei le íchugubalin hamadagua luma lidoun peliguru. Ariñagatu Bíbülia: “Góunigi lumutiña lani Aburemei ánheli ani sefuláña sun ha íchugubaña inebesei lun Aburemei” (Sálumu 34:7). Ka uagu gayara lubéi líchugun dimurei burí le saragu dǘgüdaguaü woun? Ladüga añahein sífirigu wuribatiña ani peligurutiña, ha busenbaña hagumuchun wau. Kátaña san? Halíagiñe hayabin? Ida liña hálugun hadügün dañu woun? Lun wasubudiruni, ariha waméi katei le asuseredubei dan le hagumeserunbei gürigia ubouagu.

SÍFIRIGU HA WAGANIBAÑA

7. Átiriñanu san gürigia libihin Satanási hadireirun luéi Bungiu?

7 Furendeitiwa lidan kapítulu 3, ígiraguagüda lan meha aban ánheli lungua lun ayumahani lun lagumadiruniña gürigia, ítara liña lagarabaagun luagun Bungiu. Dan lárigiñe, subudiwati lau iri Satanási luma Mafia (Arufudúni 12:9). Lidan disisi sígulu, lárigiñe leyeedunu Ewa, ibihati lun hadisedun hibe-agei gürigia luéi Bungiu. Fiúrügüñanu úaraguatiña lun Heowá: Aweli, Enoku, luma Noé (Ebüréu 11:4, 7).

8. a) Ida liña hadügagun fiú ánheligu houngua máfianume? b) Ka meha hadügübei máfianu lun móunwegun hamá lidan Guran?

8 Lidan lidaani Noé ebedaaguatiña meha amu ánheligu lun Heowá. Ígira hamuti hafulasun hadan lufamilia Bungiu sielu, aba hararirun ubouagun aba hadügün hágubu kei gürigia.  Ka uagu? Aliihatiwa lidan Agumesehani 6:2: “Aba harihin lirahüñü Bungiu luagu buidu burí hamá würiña hagía, aba burí hanúadahan hádangiñe, lun hamarieidun hama”. Hagadeiruñanu meha ánheligu hagía gürigia, ani mawandun lubéi buga Heowá katei le luagu saragu dan. Ligía lóunahanbei aban guran le agumuchubei hau sun gürigia wuribatiña ubouagu; lubúeingurügüñanu ha úaraguabaña asalbara (Agumesehani 7:17, 23). Lun herederun ánheligu ha ebedaagubaña, o máfianu hagía wínwanñu, mosu meha hígiruni hágubu le hadügübei aba hagiribudun sielun kei sífirigu. Arufudatiña ítara luéigiñe haaña lan lóubadina Mafia, ítara liña ladügagun lungua “hábuti sífirigu wuribatiña” (Matéu 9:34).

9. a) Ka asuseredubei houn máfianu dan le hagiribudunbei sielun? b) Kaba wakutiha hawagu máfianu?

 9 Dan le hagiribudunbei ánheligu maganbaditiña hagía sielun, mígirun laaña meha Bungiu lun hasigirun keisi lufamilia ha siélubaña, ítara kei ladügün lun Satanási (Húdasi 6). Íbini siñaali lan hadügün úgubu kei hani gürigia uguñe weyu, yusu hamagili habafu hawagu gürigia. Lau hídehan máfianu anihagua Satanási “eyeehei sun ubóu” (Arufudúni 12:9; 1 Huan 5:19). Ida liña san hadügüni? Gíbeti manera hayusurun máfianu lun heferidiraguagüdüniña o heyeeduniña gürigia (aliiha huméi 2 Korintuna 2:11). Akutiha wamá fiú lídangiñe.

IDA LIÑA HAMAÑOUNHAN MÁFIANU

10. Ka abiñarahanibei?

10 Yusu hamuti máfianu abiñarahani lun hamañounruniña gürigia. Ligía sun échuni le adügübei lun hádaragun gürigia houngua hamoun máfianu o lau lídehan aban buyei. Siadi tumuti Bíbülia échuni le, ani wéridi tumutiwa lun wadisedun luéi (2 Lúrudu 18:10-12; Galasiana 5:19-21). Gayarati konpararua lan abiñarahani luma emei le hayusurubei óuchahatiña. Ítara kei layusurun óuchahati ámuñegueinarügü emei lun lárügüdün ámuñegueinarügü hawuyeri úduraü, ítara liña hayusuruni máfianu amu burí luwuyeri abiñarahani, lun hábürühan ámuñegueinarügü gürigia lábugiñoun habafu.

11. Ka burí échuni lídanbei egesihani, ani ka uagu mosu lubéi wadisedun luéi?

11 Egesihani aban luwuyeri emei le hayusurubei máfianu. Ka egesihanibei? Sun burí échuni le aubei háluga gürigia hasubudiruni le lunbei lasuseredun o le aramudañubei. Kéiburi aturiahatiña waruguma, bali to lánina ubunuruni, tayusurun bará —kéiburi lani tarot—, laliihoun lurageirugu úhabu luma laluahóun lanichigu uénedü. Íbini afiñe hamá saragu gürigia madügün lan burí échuni le dañu, arufudatu Bíbülia hawadigimariduña lan garíaahatiña hama máfianu.  Ariñagati Adügaü 16:16-18 adüga lan “aban sífiri wuribati” lun gabafu tan aban nibureintu “lun tegesihan”. Ligíati, lúmagiñe lasagaruniwa sífiri wuribati ligía tuéi aba teferidiruni iarani ligía.

Yúsutiña máfianu ámuñegueinarügü katei lun heyeeduniña gürigia

12. Ka uagu peliguru lubéi wóuchun lun wálügüdahan hama hilaaña?

12 Amu manera le hayusurubei máfianu lun hamañounruniña gürigia hínchahaniña lun hayanuhan hama hilaaña. Ariñawagúati houn gürigia ha féridihaña haduheñu lidan óunweni iyeeni hawagu hilaaña. Gayarati ladimurehan aban buyei lau umalali lenege lumalali hilaali o líchugun ariñahani espechaliti luagu. Adügati le lun hasaminarun saragu gürigia winwan hamá hilaaña ani heresibirúba lan dǘgüdaguaü ánhaña adimureha hama. Ani mama inarüni lira, peliguruti giñe. Ka uéigiñe? Ladüga gayarati háyeihani máfianu hamalali hilaaña ru hagía ariñahani houn búyeigu hawagu (1 Samueli 28:3-19). Gama lumoun, kei wafurendeirun lidan kapítulu 6, dan lounwen aban gürigia aba lagumuchagun (Sálumu 115:17). Eweridihatu Bíbülia:  “Málügüdahan huguyame [...] hama hilaaña”, sun le adügüti katei le amañounra hamaali sífirigu wuribatiña ani kóntürati luagu lugundan Bungiu (aliiha huméi 2 Lúrudu 18:10, 11; Isaíasi 8:19). Áfaagua humá lubeiti, hadisedun luéi emei peliguruti le hayusurubei máfianu.

13. Ka ibiha hamaalibei saragu gürigia ha meha hanufudebaña hawéi máfianu?

13 Mama eyeedarügü hamutiña máfianu gürigia, hanufudedagüda hamutiña giñe. Subudi lumuti Satanási hama lumáfianu “murusunrügaali lan” hadaani, málühaña agidarúa; ligíati furundetimahaña lubéi (Arufudúni 12:12, 17). Íbini ítara, saragu milu gürigia ha meha awinwandubaña lau anufudei hawéi máfianu ibihaaña halíbürerun hawéi. Ida liña hadügüni? Ka gayarabei ladügüni aban gürigia íbini dáguali lan lungua lidoun abiñarahani?

IDA LUBA WARARAMUN KÓNTÜRA MÁFIANU

14. Ida luba gayara lan walíbürerun hawéi sífirigu wuribatiña, lun wasigiruni hani kristiánugu éfesuna hénpulu?

14 Ariñaga tumuti Bíbülia ida luba lan múaradun wamá hama máfianu ani ida luba lan walíbürerun hawéi. Ariha waméi hénpulu hani kristiánugu éfesuna ha awinwandubaña lidan furumiñeti sígulu. Fiú hádangiñe, gabiñarahatiña meha lubaragiñe hadügün kristiánugume. Ka hadügübei dan le desidírü habéi hígiruni échuni ligía? Ariñagatu Bíbülia: “Saragu [...] burí hádangiñe ha meha gabiñarahadibaña, aba hanügünu burí haliburun, aba hágudunu hagibugiñe súngubei” (Adügaü 19:19). Gudá hamutu haliburun to lánina abiñarahani, ítara liña híchugun aban hénpulu houn ha busenbaña múaradun hamá hama máfianu uguñe weyu. Ha busenbaña heseriwidun lun Heowá mosu hagünrinchaguni sun katei lánina abiñarahani. Kéiburi líburu, garüdia, pelikula, músika le ínchahabaliña gürigia lun habiñarahan o le arufuduti abiñarahani kei aban katei buiti. Íbini lúyawa uraü o amu katei le hanügübei gürigia lun hadouragun hougua luéi wuribati (1 Korintuna 10:21).

15. Ka lunbei wadügüni lun wararamun kóntüra sífirigu wuribatiña ha?

 15 Fiú irumu lárigiñe hágudunu kristiánugu éfesuna haliburun lánina abiñarahani, abürühati apostolu Pábulu houn: “Hama burí sífirigu gabafutiña ha lánina wuribani [...] wageindagua” (Éfesuna 6:12). Arufudahati le, añahagua lan meha máfianu áluga herederun kristiánugu lábugiñe habafu. Ka meha lunbei hadügüni lanwoun le adüga hamaalibei? “Lóugiñe sun katei —liña Pábulu—, barǘ huméi hafiñen kei lárügüdüni súdara lidaüdina ligibugiñe, lun hararamunu sun gimara durunguatu to lachüühaboun Mafia huagun” (Éfesuna 6:16). Eibume léredun lidaüdina wafiñen buídutimabei wararamun kóntüra máfianu ha (Matéu 17:20).

16. Ida luba gayara lan wederebudagüdüni wafiñen?

16 Ida lubati gayara lan wederebudagüdüni wafiñen? Lau taturiahoun Bíbülia. Lun derebugu lan aban baríeiru, súdiniti lun here lan lebu. Ítarameme, lun derebugu lan wafiñen, mosu here lan lebu, mini lan le: lasubudirúniwa inarüni le tídanbei Bíbülia. Anhoun waliiha sagü weyu, ani aturiaha wamounme derebugubei wafiñen. Kei aban baríeiru derebuguti, leseriwiduba woun kei idaüdinaü kóntüra máfianu (1 Huan 5:5).

17. Ka lunbei wadügüni lun wadouragun wougua hawéi máfianu?

17 Kati amu katei lunbei meha hadügüni kristiánugu éfesuna? Kei hawinwanduña lan lidan aban uburugu buin lau afiñeni hawagu máfianu, mégeitimatiña meha ladourawagun hau. Ligía lariñagunbei Pábulu houn: “Lau saragu ayumuraguni lun Bungiu [...]; afurieida humá lun Bungiu súnwandan lau lubafu [s]ífiri” (Éfesuna 6:18). Kei wawinwanduña lan giñe lidan aban ubóu buin lau afiñeni hawagu máfianu, lun wararamun houn mosu wayumuragun lun Heowá lun ladouragun wau. Súdiniti wíriduni liri Heowá lidan wafurieidun (aliiha huméi Ariñawagúni 18:10). Mosu webegirun lun lun ‘ladísedagüdüniwa luéi’ Satanási (Matéu 6:13). Chóuruti, lóunabubei lan wayumuragun (Sálumu 145:19).

18, 19. a) Ka uagu gayara lubéi wachoururuni luagu wagañeirubei lan wuribu kóntüra sífirigu wuribatiña? b) Kaba álügüdahani ounabúa lidan kapítulu 11?

 18 Inarüni peliguru hamá máfianu, gama lumoun mama mosu wawinwandun lau anufudei hawéi. Ánhawa ayarafada lun Bungiu lau wadügüni Lugundan, wararamuba lun Mafia (aliiha huméi Santiagu 4:7, 8). Gébehati habafu máfianu, ladüga lidan lidaani Noé, aba habeichún, ani haguseragüdǘwaba lidan luéyuri aguseruni (Húdasi 6). Haritagua humá giñe darugua hamá lani Heowá ánheligu gabafutiña wau (2 Urúeigu 6:15-17). Beresetiña lau wageindagun kóntüra máfianu ani busentiña lun wagañeiruniña. Ítara liña kamá hapouhañein háhabu lun híchugun dǘgüdaguaü woun. Ligíati, sigí wama úara luma Heowá luma hama lufamilia sífiri úaraguatiña. Dise wamá giñe luéi sun luwuyeri abiñarahani, sigí waméime teweridihan Bíbülia (1 Féduru 5:6, 7; 2 Féduru 2:9). Ítara luba chouru lan wagañeinruni ageindaguni kóntüra máfianu.

19 Gama lumoun, ka san uagu lígirunbei Bungiu lun lasigirun dandu wuribani, kei máfianu, ha anügübaña saragu asufuriruni? Lidan kapítulu 11 lóunabuba álügüdahani le.

^ par. 2 Ariñagati Arufudúni 5:11 hawagu ánheligu richaguatiña: “Ñéinñanu míñunu míñunu ánheligu”. Ligíati, kei tariñaguni Bíbülia, adügati Bungiu saragu san míñunu ánheligu.