Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Kátima san tarufudahabei Bíbülia?

 LANWOUN ARIÑAHANI

Ka san Luéyuribei Aguseruni?

Ka san Luéyuribei Aguseruni?

LIDAN hisaminan, ida luba Luéyuri Aguseruni? Gíbetiña gürigia saminatiña tidinba lan saragu milu miñonu uani aban aban ligibugiñe Bungiu lun haguserawagüdün. Saminatiña giñe abanba lan ibagari buiti sielu hafayeiruaha fiú gürigia, ánheinti híbiri hasiadirúba lun hasufurirun lun súnwandan. Gama lumoun, ariñagatu Bíbülia mítaranbei lan Luéyuri Aguseruni: mamabei aban weyu lánina óunwenbu anufudei, láninabei emenigini luma laranserun sun katei.

Ariñaga lumuti apostolu Huan ida luba lan Luéyuri Aguseruni lidan Arufudúni 20:11, 12, “Ábati narihin aban óunwenbu lálana arúeihani haruti, luma le ñunbei luagu. Aba lagumuchagun sielu luma ubóu ligibugiñe, aba marihínhali lan. Aba narihiniña hilaguaaña, wéinamuhaña hama ñǘbürigiña rara ligibugiñe Bungiu; aba tadaarawagun burí líburu tuma ábanya líburu, tomeme líburu to lánina ibagari. Haguserawagüdüba hilaguaaña luagu burí katei le meha hadügübei, según le bürüwañubei tidan burí líburu tuguya”.

Heowá Bungiu Aguseragüdüti Suntigabafubei hani sun gürigia. Gama lumoun, ru laali kárugu lánina aguseragüdüni lun amu gürigia. Según Adügaü 17:31, ariñagati apostolu Pábulu: “Anúadiraali Bungiu aban weyu lun ligíaba lan weyu laguseragüdüniña gürigia ha ubouagubaña lau irichaü lau aban wügüri le anúadira láalibei”. Hesukrístu lárigiñe láguyugun aguseragüdüti ligía (Huan 5:22). Ídabati lagumesera Luéyuri Aguseruni ani átiribei lidura?

 Arufuda tumuti liliburun Arufudúni lagumeseruba lan Luéyuri Aguseruni lárigiñe wuribu Arümahedón, le lunbei lagumuchun lau ubóu lani Satanási (Arufudúni 16:14, 16; 19:19–20:3). * Lárigiñe Arümahedón ábame ladaürǘn Satanási hau lumáfianu lidan aban fusu mébehati, herederuba ñein milu irumu. Lidan dan ligía, haguseragüdübaña 144,000 ha gafanranbaña luma Kristu sielu gürigia, ani “harúeiha[ba] úara luma Kristu luagu milu irumu”. (Arufudúni 14:1-3; 20:1-4; Rómana 8:17). Kei warihini, mamabei aban dan lánina wadagimanu le adügǘti lau loufudagun le adurarubei 24 oura, lubaragiñe lira laduraruba milu irumu.

Lídanme milu irumu le, mosume “laguseragüdüniña Hesukrístu wínwangiña hama hilaguaaña” (2 Timotéu 4:1). Dimurei “wínwangiña” mini lan “saragu gürigia” ha lunbaña hásügürün lau ibagari lídangiñe Arümahedón (Arufudúni 7:9-17). Ariha lumutiña giñe apostolu Huan “hilaguaaña [...] rara ligibugiñe Bungiu”. Kei füramase lani Hesusu “lachülürüba dan lun haganbuni sun hilaguaaña numalali, ábame háfuridunga lídangiñe hamúaha” danme le háguyugun (Huan 5:28, 29; Adügaü 24:15). Kaba san lébuna haguserawagüdün sun gürigia hagía?

Lidan arufudúni le larihibei apostolu Huan “aba tadaarawagun burí líburu” ani “aba haguserawagüdün hilaguaaña luagu burí katei le meha hadügübei, según le bürüwañubei tidan burí líburu tuguya” (Arufudúni 20:12). Tadimurehaña san líburu burí to luagu katei le hadügübei gürigia lubaragiñe hounwen? Uá. Ida liña wasubudiruni? Ladüga ariñagatu Bíbülia: “Le hilaalibei, furihali lídangiñe figóu” (Rómana 6:7). Ha lunbaña haguyugun labulieiduwaba sun meha le hadügübei. Ligíati, chóuruti le lan mini tubéi líburu burí to, iseri adundehani lúmagiñeti Bungiu. Lun hawinwandun lun súnwandan, dandu ha águyugubaña kei ha mouwegunbaña lidan Arümahedón mosu gaganbadi hamá lun lugumadin Bungiu. Laganagua le, ñeinbei sun gumadi le labusenrun Heowá lafuranguagüdün lidan milu irumu. Ítarati, kada aban laguserawagüdüba luagu le ladügübei lidan Luéyuri Aguseruni.

Lidan Luéyuri Aguseruni, hibihuba saragu miñonu gürigia chansi luagu furumiñeti wéiyaasu lun hafurendeiruni lugundan  Bungiu lárigiñe ábame hadügüni. Lun lasuseredun lira mosu ladügǘniwa aban óunwenbu wadagimanu lánina arufudahani. Le linarün aban katei, “hafurendeirubei gürigia irichaü” (Isaíasi 26:9). Gama lumoun, mámaba sun gürigia abusenra hadügüni lugundan Bungiu. Lariñaga Isaíasi 26:10: “Íbini gudemehabu ban houn wuribatiña; hasigiruba adügei le wuribabei, mafurendeirun habéi le buídubei, wuribati hóuserun lidan hageira gürigia buítiña, ani meberesegúntiña lau luéirigun Wabureme”. Lagumuchuba hau gürigia wuribatiña lun súnwandan lidan Luéyuri Aguseruni (Isaíasi 65:20).

Danme le lagumuchun Luéyuri Aguseruni, gürigia ha ásügürütiña lau ibagari, resibi hamaalime ibagari sin figóu sunsuinagubei. Ligíati, lidan Luéyuri Aguseruni, habihibei gürigia ibagari sin figóu kei meha furumiñe (1 Korintuna 15:24-28). Lárigiñe ábame liabin aban lagumuhóun óuchawaguni. Lun lira, lígiragüdüwaba Satanási lun louchun leyeeduniña gürigia lagumuhóun wéiyaasu (Arufudúni 20:3, 7-10). Gürigia ha madügünbalin le labusenrubei Satanási harihubei lagunfulirun le füramase tubéi Bíbülia sunsuinagubei: “Galangantehabei gürigia buítiña múa, haganóuba giñe lidan súnwandan” (Sálumu 37:29). Chóuruti, luagu abanbei lan abinirúni Luéyuri Aguseruni houn sun gürigia ha úaraguabaña.

^ par. 1 Hadariruba lanwoun ariñahani luagu Arümahedón tidan Perspicacia para comprender las Escrituras, vol. 1, páhina burí 680, 681, 1086, 1087, tuma garüdia to gíriboun ¡Manténgase alerta!, páhina burí 12-19.