Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Kátima san tarufudahabei Bíbülia?

 KAPÍTULU 4

Ka Hesukrístubei?

Ka Hesukrístubei?
  • Ka ubaraü espechaliti lagunfulirubei Hesusu?

  • Halíagiñe san liabin?

  • Ka meha san luwuyeri gürigia ligía?

1, 2. a) Ligiaméme san haganbun luagu aban gürigia famosuti kei hasubudiruni buidu? b) Ka hasaminarubei gürigia luagu Hesusu?

GÍBETIÑA gürigia famosutiña ubouagu. Añahein hádangiñe subudiwatiña buidu lidan uburugu, néchani le ñein lubéi haganawa o lidan sun ubóu. Gama lumoun, mama ligiaméme hasubudiruni liri aban gürigia famosuti kei hasubudiruni le winwan laalibei o ida liña lan ligaburi.

2 Adimurehouati luagu Hesusu íbini sügühali lan bián milu irumu lúmagiñe lawinwandun ubouagu. Gama lumoun, íbidiñeti houn saragu gürigia ka lan meha Hesusubei. Añahein ariñagutiña aban lan meha wügüri buiti o aban profeta. Añahein gürigia afiñetiña Bungiu lan ani mosu lan láhudurawagun lun. Inarüni funa san?

3. Ka uagu súdini lubéi hasubudiruni Heowá Bungiu luma Hesukrístu buidu buidu?

3 Súdiniti hasubudiruni inarüni luagu Hesusu. Ka uagu? Ladüga ariñagatu Bíbülia: “Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti, luma lun hasubudirunina, au Hesukrístu le bóunahabei” (Huan 17:3). Ítara liña, gayaraabei ladügün hasubudiruni Heowá Bungiu luma Hesukrístu buidu buidu lun hawinwandun lun súnwandan lidan aban paraísu ubouagu (Huan 14:6). Ru lumuti giñe Hesusu hénpulu le buídutimabei luagu ida luba lan wabagaridun luma  ida luba lan ligaburi wóuseruniña gürigia (Huan 13:34, 35). Lidan furumiñeti kapítulu tidan líburu to, furendei wamuti inarüni luagu Bungiu. Guentó warihali ka lan tarufudahabei Bíbülia luagu Hesukrístu.

MESÍASI LE FÜRAMASEWABEI

4. Ka mini lubéi iri Mesíasi? Ka mini lubéi iri Kristu?

4 Saragu dan lubaragiñe nasirua lan Hesusu, ariñagatu Bíbülia lachülürüba lan le lóunahabei Bungiu, le gíribei Mesíasi o Kristu. Iri Mesíasi (lídangiñeti ebüréu) ani iri Kristu (lídangiñeti güriegu) mini lan “Anuadirúaali”. Ligía lanuadirúaba lubéi le füramase lubéi Bungiu lóunahabei lan, mini lan lira, líridubei lan lun aban ubaraü espechaliti. Lidan amu burí kapítulu tidan líburu to,  wafurendeiruba luagu ubaraü súdiniti lani Mesíasi lidan lagunfulirun lani Bungiu füramasei. Warihubei giñe gayara lan labiniruniwa Hesusu íbini uguñe weyu. Háfuga gíbetiña gürigia álügüdagutiña houngua lubaragiñe nasirua lan Hesusu: “Kaba funa san Mesíasi?”.

5. Ka meha hachoururubei lani Hesusu disipulugu?

5 Lidan furumiñeti sígulu lidan wadaani, chouru hamuti lani Hesusu disipulugu ha Nasarétüna luagu ligía lan Mesíasibei le füramasewabei (Huan 1:41, RVA). Aban hádangiñe, Simón Féduru ariñagati furangu: “Kristu [...] buguya” (Matéu 16:16). Ka meha uagu chouru habalin lani Hesusu disipulugu ligía lan Mesíasi le füramasewabei? Ani ka uagu gayara lubéi wachoururuni?

6. Ka uma gayara lan konpararü wamani ida liña lan líderaguniña Heowá gürigia ha úaraguabaña asubudirei ka lan Mesíasibei?

6 Ariñaga hamuti meha lánigu Bungiu profeta ha awinwandubaña lubaragiñe Hesusu katei burí le lunbei lídehan asubudirei ka lan Mesíasibei. Konpararü waméi: samina humá, lun hamuga mosu lan hidin anüga aban gürigia íbidiñeti hun ñein lubéi tachülüra busu. Ma megeibadün yebe lariñawagun hun ida liña lan gürigia ligía lun gayara lan hasubudiruni? Ítara liña giñe, ariñagati Heowá hámagiñe lánigu profeta saragu profesía luagu le lunbei ladügüni Mesíasi luma le lunbei lásügürüni. Dan le harihini gürigia ha úaraguabaña lagunfulirun profesía burí le, aba hasubudiruni ligía lan Mesíasibei.

7. Ariñaga humá bián profesía agunfuliruti luagu Hesusu.

7 Ariha wamá bián hénpulu. Anihán furumiñeti: lóugiñe 700 irumu lubaragiñe lasuseredun, ariñagati profeta Mikeasi nasiruabei lan le füramasewabei Belén, aban liraüraü aüdü Hudá (Mikeasi 5:2). Halíati nasirua lan Hesusu? Ñein lidan fulasu ligía (Matéu 2:1, 3-9). Le libiaman hénpulu, profesía le lídanbei Danieli 9:25, ariñagati ñein ida luba lan labahüdǘn dan lun lasubudiruniwa irumu le lunbei lachülürün  Mesíasi: irumu 29 lidan wadaani. * Lagunfulirun profesía le luma burí amu, arufudati luagu Hesusu lan meha Mesíasi le füramasewabei.

Dan le labadiserunbei Hesusu, aba Mesíasihali lan, o Kristu

8, 9. Ida liña furangu lan larufuduni labadiseirun Hesusu luagu ligía lan Mesíasibei?

8 Lidoun lagumuchun irumu 29, furanguti meha larihín luagu Hesusu lan Mesíasibei. Ligía lidin Hesusu amuriaha luma Huan le Abadiseihabei lun labadiseiruni lidan duna Hordán. Füramaseti meha Heowá lun Huan líchuguba lan aban seini lun, gayara láamuga lasubudiruni Mesíasi, ani ru lumuti lun dan le labadiseirunbei Hesusu. Abahüdaguatu Bíbülia: “Ariha numuti [s]ífiri [s]andu kamá aban unhun, lararirun siélugiñe, aba lararamagun lábulugu. Ibidiñeti yebe nun katei lan wügüri ligia; ariñagarügüti meha le óunahabalina abadiseiha lau duna, nun: ‘Danme le barihin lararirun [s]ífiri [s]andu ábame lararamun lábulugu ítaga wügüri, ligía wügüri ligía le abadiseihabei lau sífiri sandu’. Ariha náaliti, gefén au luagu ligía lan Liraübei Bungiu’” (Huan 1:32-34; Matéu 3:16, 17). Dan le larihínbalin ani aganbaléi Huan lira, chouru lumuti luagu Hesusu lan lóunahabei Bungiu. Weyu ligía aba líchuguni Heowá lani sífiri sandu luagun Hesusu, lúmagiñe oura ligía Mesíasihali o Kristu, le anuadirúabei lun ligíaba lan Urúei luma Alidihati (Isaíasi 55:4).

9 Profesía burí le tídanbei Bíbülia le gúnfulihalibei, luma dimurei le lariñagubei Heowá, arufudati furangu Hesusu lan Mesíasi le füramasewabei. Ani óunabatu Bíbülia biamaya álügüdahani súdiniti luagu Hesukrístu: halíagiñe lan liabin, ani ka meha luwuyeri gürigia ligía.

HALÍAGIÑE SAN LIABIN HESUSU?

10. Ka tarufudahabei Bíbülia luagu libagari Hesusu lubaragiñe liabin ubouagun?

10 Arufudahatu Bíbülia luagu sielu lan meha lawinwanda  Hesusu lubaragiñe liabin ubouagun. Ariñagati Mikeasi Belénba lan nasirua lan Mesíasi ani ariñagati giñe winwan lan lúmagiñe “binadu dan” (Mikeasi 5:2, RVA). Hesusu guánarügü ariñagubei saragu wéiyaasu luagu sielu lan meha lawinwanda lubaragiñe nasirua lan kei wügüri (aliiha huméi Huan 3:13; 6:38, 62; 17:4, 5). Kei aban gürigia sífiri sielu, espechaliti meha lanaagun lungua luma Heowá.

11. Ida liña tarufuduni Bíbülia luagu Hesusu lan Liráü Heowá le hínsiñetimabei lun?

11 Hesusu liráü Heowá le hínsiñetimabei lun. Ligía tariñagunbei Bíbülia, luagu ligía lan “ígiramaübei, le lóugiñebei sun katei le adügǘbei” ladüga ligía lan furumiñeti katei ladügün Bungiu (Kolosana 1:15). * Amu katei le adügübei lun espechali lan ladüga ligía lan “Liráü le ábanrügüti” (Huan 3:16). Mini lan lira Bungiu guánarügü lan adügübalin. Ligíarügüñein giñe íderaguei Heowá adügei sun le líbiri katei (Kolosana 1:16). Wawati giñe lun “Dimurei” (Huan 1:14). Arufudati iri le ligía lan meha laubei kárugu lun ladimurehan luagu liri Lúguchi. Háfuga ligía meha íchugubalin uganu luma adundehani lúmagiñeti Bungiu houn ha híbiri lirahüñü, dandu houn ánheligu kei houn gürigia.

12. Ida liña wasubudiruni luagu mama lan ligíameme Bungiu, luma Liráü le ígiramaübei?

12 Ligíameme funa san Bungiu luma Liráü le ígiramaübei, kei hafiñerun fiú gürigia? Mama ligía tarufudahabei Bíbülia. Kei wafurendeirun lidan párafu 11, adügüwarügüti Hesusu. Mini lan lira gagumeseha lan, ánheinti Heowá magumesehati ani mébehati (Sálumu 90:2) Masaminarungubeiti Hesusu lun ítara lan kei Lúguchi. Arufudahatu Bíbülia furangu luagu íñugutima lan Úguchili luéi Liráü (aliiha huméi  Huan 14:28; 1 Korintuna 11:3). Heowárügüñein “Bungiu le Suntigabafu” (Agumesehani 17:1). Úati amu kei ligía. *

13. Ka mini lubéi tariñagun Bíbülia: “Lidan Kristu larihíwa Bungiu le marihínwabei?”

13 Luagu saragu míñunu irumu wínwanti Heowá luma Hesusu aban umadaguaü le espechaliti, bandi dan lubaragiñe ladügǘn Ubóu tuma burí waruguma. Ma funa lueirin hínsiñegua houngua! (Huan 3:35; 14:31). Genege lumuti Isaani le hínsiñewabei, Lúguchi. Ligía tariñagunbei Bíbülia: “Lidan Kristu larihíwa Bungiu le marihínwabei” (Kolosana 1:15). Ítara kei genegegua hamá isaanigu hama hagübürigu Lisaani Bungiu siélugiñeti le, arufuda lumuti ligaburi luma lusan Lúguchi.

14. Ida liña san gayara lubéi nasirua lan Liráü Heowá le ábanrügüti kei aban gürigia garaüwarügüti?

14 Ígira lumuti Liráü Heowá le ábanrügüti sielu lau lugundan, lun liabin ubouagun awinwanda kei wügüri. Gama lumoun, háfuga álügüdaguatün hungua: “Ida liña gayara lubéi nasirua lan aban sífiri kei aban gürigia garaüwarügüti?”. Adügati Heowá aban milaguru, ru lumuti libagari Lisaani le ábanrügüti turageirugun aban nibureintu gañüngiru gíritu María. Kei mama lubéi wügüri adügübei lun tagaraüdün María, ligía mafigoun lubéi irahü le tágurahabei, le unbei tagúara Hesusu (Lúkasi 1:30-35).

KA MEHA LUWUYERI GÜRIGIA HESUSU?

15. Ida liña gayara lubéi buídutima lan wasubudiruni Heowá lau lani Hesusu hénpulu?

15 Sun meha le ladügübei Hesusu luma le lariñagubei dan le ubouagu lubéi íderagua lumutiwa lun wasubudiruni buidu. Ani gayarati wasubudiruni Heowá buidu lau lani Hesusu hénpulu. Ida luba? Haritagua humá luagu genege lani Lúguchi. Ligíati lariñagunbei lun aban hádangiñe lani disipulugu:  “Le arihitina, larihiñein giñe Bungiu Úguchili” (Huan 14:9). Tidan liliburun Matéu, Márükosu, Lúkasi, luma Huan daritiwa saragu ariñahani luagu libagari Hesukrístu, ligaburi, luma burí le ladügübei.

16. Ka meha uganu méiniti lapurichihabei Hesusu, ani ka úmagiñe liabin le larufudahabei?

16 Wawati lun Hesusu “Máisturu” (Huan 1:38; 13:13). Ka meha larufudahabei? Apurichihati meha “uganu buiti luagu [L]arúeihan Bungiu”. Lagumadihaba arúeihani le lidan sun Ubóu siélugiñe, ani líchuguba saragu abinirúni houn gürigia ha úaraguabaña lun Bungiu (Matéu 4:23). Ka san úmagiñe liabin uganu ligía? Hesusu guánarügü ariñagubalin: “Le narufudahabei, mama númagiñeti, lúmagiñeti le óunahabalina”, Heowá (Huan 7:16). Subudi lumuti Hesusu luagu busén lan Lúguchi lun haganbuni gürigia uganu buiti luagu Arúeihani lani Bungiu. Warihubame lanwoun ariñahani luagu arúeihani le luma le lunbei libihini lidan kapítulu 8.

17. Halía meha san larufudaha Hesusu, ani ka uagu láfaagua lun ladügüni?

17 Halía meha san larufudaha Hesusu? Lidan sun fulasu le ñein hamuti gürigia: Lidan uburugu, aüdü, mágidurugu luma hábiñe gürigia. Mañuurunti Hesusu agurabaha lun hayabin gürigia áluahei, ligía ñǘdünbei áluahaña (Márükosu 6:56; Lúkasi 19:5, 6). Ka uagu láfaagua Hesusu ani yusu ligía bandi dan apurichiha luma arufudaha? Ladüga ligía lan lugundanbei Lúguchi ani súnwandan lagunfuliruni (Huan 8:28, 29). Ladüga giñe gudemehabu lan Hesusu houn ha ñǘdünbaña áluahei (aliiha huméi Matéu 9:35, 36). Lunti yebe harufudahani ábutigu lidan relihión inarüni luáguti Bungiu luma lisuini houn gürigia, ani madügün hamuti. Gama lumoun, subudi lumuti Hesusu mégei hamá gürigia haganbuni uganu luáguti Larúeihan Bungiu.

18. Ka ligaburi Hesusu hínsiñetimabei hun?

18 Hínsiñehabuti meha Hesusu ani buitu lanigi. Buiti  meha lóuseruniña gürigia íbini irahüñü buiti hasandiragun houngua luma (Márükosu 10:13-16). Aban labu lóuseruniña sun gürigia. Iyereeguti wuribani lun luma marichaü (Matéu 21:12, 13). Lidan meha aban dan, le mouserún habéi würiña lau inebesei luma ínsiñehabuni, óusera lumutiña Hesusu lau inebesei (Huan 4:9, 27). Ǘnabuguti meha Hesusu, lidan aban ókaasion chibá lumuti hagudi lani apostolugu, libe-agei dan musu adügübalin wadagimanu le.

Apurichihati meha Hesusu ñein hamuti gürigia

19. Ka hénpulu arufudubei gudemehabu lan meha Hesusu houn gürigia ha asufurirubaña?

19 Gudemehabuti meha Hesusu houn gürigia ha asufurirubaña kei larufuduni dan le ladügünbei milaguru lun lareidaguagüdün sánditiña lau lubafu lani Bungiu sífiri (Matéu 14:14). Aba liabin aban sánditi lau lépüra ariñaga lun: “Gayaraati bareidaguágüdünina ánhabu busén”. Aba lasandiruni Hesusu lasufurirun wügüri ligía tidan lanigi. Aba lagudemedagun lun, aba laguuruni, aba lariñagun: “Busentina, areidaguabá”. Aba lareidagun sánditi ligía!  (Márükosu 1:40-42). Ida liña funa san lasandiragun sánditi ligía lungua?

ÚARAGUATI DARÍ LAGUMUHÓUN

20, 21. Ka uagu gayara lubéi wariñagun Hesusu lan íchugubalin hénpulu le buídutimabei lani gaganbadi luma úaraguni lun Bungiu?

20 Hesusu íchugubalin hénpulu le buídutimabei lani gaganbadi luma úaraguni lun Bungiu. Úaraguati lun Lúguchi le siélubei lidan sun katei, íbini awanda lániñu gürigia kóntüratiña luagu, luma bandi asufuriruni. Máhati Hesusu léiguadun lidoun burí lóuchaguni Mafia (Máteu 4:1-11). Ñeinñein meha aban dan mafiñen hamá hádangiñe liduheñu luagu, darí lun hariñagun “lǘlühali lan lau Hesusu” (Márükosu 3:21). Gama lumoun meferidirun lumuti Hesusu liguraasun, sigiti adügei luádigimari Bungiu. Dan le hagayuahanbei láganiñu luagu anaba haméi, súnwandan lárügüdagun lungua ani málugunti ladügün dañu houn (aliiha huméi Adügaü 13:28).

 21 Úaraguati Hesusu darí lounwen, aban ounweni gáriti ani hanarimeti háhaburugu láganiñu (1 Féduru 2:24). Samina humá luagu sun le lasufurirubei lagumuhóun weyu lidan libagari kei wügüri. Awanda lumuti hárügüdüni súdaragu, híchugun gefentiña yeétiña lidurun, hasíadiruni aguseragüdütiña wuribatiña, hadügün gürigia bula lau luma hasufuriragüdüni súdaragu. Aba hádaraguni luagu aban wagabu, lidan lagumuhóun lawaragun aba lagúaragun: “Gúnfuliha sun katei” (Huan 19:30). Ǘrüwa weyu lárigiñe, aba láguyuguagüdüni Lúguchi kei aban sífiri gürigia (1 Féduru 3:18). Bián-wein weyu lárigiñe, aba lagiribudun sielun, aba “lañuurun luégiñe lóunwenren Bungiu” agurabaha líchuguni ubafu lun, lun larúeihan (Ebüréu 10:12, 13).

22. Ka buiti libihubei Hesusu lau úaragua lan lun Bungiu darí lagumuhóun?

22 Ka buiti libihubei Hesusu lau úaragua lan lun Bungiu darí lagumuhóun? Lau lóunwen dará lumuti üma lun gayara lan wawinwandun lun súnwandan lidan aban paraísu ubouagu, ítara kei labusenruni Heowá lúmagiñe furumiñeti dan. Lidan le aban kapítulu warihibei ida luba lan lagunfulirun emenigini le.

^ par. 7 Ariha huméi lanwoun ariñahani lidan “Ladimurehan profeta Danieli luagu lachülürün Mesíasi”, ida liña lan lagunfulirun profesía lani Danieli luagu Hesusu.

^ par. 11 Úguchili laguarún lun Heowá, ladüga ligía lan Adügübalin sun katei (Isaíasi 64:8). Keiti Bungiu lan adügübalin Hesusu, wawati lun Liráü Bungiu. Ligíati, ha híbiri sífiri gürigia luma giñe furumiñeti wügüri Adán, wawati houn lirahüñü Bungiu (Lúkasi 3:38).

^ par. 12 Lidan “Inarüni luáguti Úguchili, Irahü luma sífiri sandu”, hadeiruba lanwoun ariñahani luagu mama lan ligíameme Bungiu, luma Liráü le ígiramaübei.