Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Lóunabagüle 10 hálügüdahan nibureintiña

 ÁLÜGÜDAHANI 3

Ida luba nayanuhan hama nagübürigu?

Ida luba nayanuhan hama nagübürigu?

KA UAGU SÚDINI LUBÉI?

Buídutimabei bibagari anhein buidu banaagun bungua hama bagübürigu.

KABA HAMUGA BADÜGA?

Saminabá luagun sügǘ le: luáguhali-ǘrüwa rábounweyu, gumú laali Geoff, le gúnfulihalibei 17 irumu, lidasin, chülüdüga oura lun lemeraagun, yuuti lun lugundun awadigimaridaali saragu. Ábati lachüüragun lungua luagun haláü le hínsiñetimaabei lun ani aba lébedunu bigibigitu.

Ligíati lebelurun lúguchi luéigiñe le aban bena lau ligañi ligibu.

“Geoffrey! Ka san uagu abuhán lubéi eferidira dan ñein aríagua bigibigitu, lubaragiñe hamuga abunha lan íderaguei bamulen lau lidasin? Ka santi uagu madügün bubalin le ariñawagúbei bun?”.

“Hagumeseraañoun”, liña Geoff agülülüheina.

Ouraméme ligía, aba layarafadun lúguchi álügüdei: “Ka bariñagubei?”.

“Ni kata”, liña lóunabun Geoff ñugeñu ligibu.

Lau igañi, aba lariñagun lúguchi lun: “Madimurehabá nun ítara!”.

Lun hamuga buguya lan Geoff, kaba hamuga badüga lun masuseredun lan lira?

RÁRAMABA ASAMINARA

Dan le badunragun ǘmada luma somu katei le eberesehati bawanserun dan le babugahaña lan karü, ma gayaraati báluahan amu üma? Ítarameme, gayaraati giñe bagumeserun ayanuha houn bagübürigu lidan ámuñegueinarügü igaburi.

 ABAN SÜGǗ:

“Güreweiti nun nayanuhan luma núguchi —tiña Leah—. Anihein dan, lárigiñe barühadina lan saragu minutu adimureha luma, ligía lálügüdünina: ‘Ferudun, ka buga bariñagubei?’”.

GAYARAATI TADÜGÜN LEAH ǗRÜWA KATEI

  1. Tagúaragun lun túguchi.

    “Núguchi, aganbabána! Súdiniti gusan le nariñagubei bun!”.

  2. Támanichun.

    Aba masigiharu lan Leah ayanuha luma túguchi luagu tituróbulin.

  3. Tígiruni yanu lubaame ariñoun.

    Aba táluahan amu oura lun tadimurehan luma túguchi, o tabürüdün aban gárada afuranguagüdei tituróbulin lun.

Kaba hamuga lídangiñe ǘrüwa katei le bariñaga tun Leah lun tadügüni?

SAMINABÁ LUAGUN LE: Lasaminaruña túguchi Leah luagun amu katei, ligía míchugun lubéi fe luagu tidiheri. Anhein tadüga le ariñawagúbei lidan A lau tagúaragun lun túguchi, háfuga úabei gunfuranda lani ka lan uagu tóusera ítara. Súnhameti maganbun lanu. Ani tarufuduña hamuga menebenehabuni lun (Éfesuna 6:2). Mabuidunbei hamuga lira lun ni aban hádangiñe.

Íbini badunragun luma katei le ídanti múaran ban hama bagübürigu, gayaraati báluahan amu üma lun bayanuhan hama luma lun gunfurandagua humá húmagua.

Lau sun ménrenguntima lan tadügüni Leah le ariñawagúbei lidan B, mama hamuga tarufuduña lichú aau. Ka uagu? Ladüga anhein busén tubéi tadariruni lárani tituróbulin, mosu tadimurehan luma túguchi. Mégeibei lasubudiruni ka lan suserebei tun lun líderagunu. Mibihinboun ni kata anhoun ámanicha.

Ánheinti tadüga Leah le ariñawagúbei lidan C, tarufuduñeinme mígirun tan lun ñein lan somu katei eredehatu luéi tasigirun adimureha luma túguchi. Hóucharügütu lun tadimurehan luma lidan amu oura. Ánhounti desidírü tabürühan aban gárada lun, másiñati ladügün lira lun buídutima lan tasandiragun tungua.

Anhoun abürüha aban gárada lun túguchi, ménrenguntimabei tun tafuranguagüdüni lun ka lan tabusenrubei tariñagun. Danme le laliihanu úguchili gárada, ménrenguntimabei lun gunfuranda lani ka lan suserebei tun. Buídutimabei lidin dandu tun kei lun túguchi anhein tafalara le ariñawagúbei lidan C. Meberesenga anhoun anúadira tadimurehan luma o tabürühan aban gárada lun, úarabei ligaburi tóuserun luma adundehani tídangiñeti Bíbülia luáguti wasigirun “áluaha lun lidan lan darangilaü sun katei” (Rómana 14:19).

Ka amu katei gayaraabei tadügüni Leah?

Saminabá luagun amu katei le gayaraabei tadügüni luma ka lan buiti gayaraabei lanügüni tun.

 FURANGULÁ BADIMUREHAN

Mabulieidabéi le: anihein dan mama lan le babusenrubei bariñagun gunfuranda habéi bagübürigu.

ABAN SÜGǗ:

Ánhabu hálügüda bagübürigu ka lan uagu gañi bubéi ani aba bóunabuniña: “Mabusenruntina nayanuhan luagu le”.

Másiñati hasaminaruba lan bariñaguña lan houn: “Mafiñentina huagu. Hámarügübei numadagu nayanuha luagu nituróbulin, mama huma”.

Guentó, saminabá bagagibudaguña lan luma aban turobuli hénrenguti ani busenti aban hádangiñe bagübürigu líderagunibu ani aba bariñagun lun: “Máhüchüra humá, gayaraabei naransehani turobuli le nábugua”.

  • Ka gayaraabei hasaminaruni bagübürigu?

  • Ka hamuga lunbei bariñaguni?