Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Lóunabagüle 10 hálügüdahan nibureintiña

 ÁLÜGÜDAHANI 6

Kaba íderaguana lun mafalarun nániña ha adügüdarutiña nuagu?

Kaba íderaguana lun mafalarun nániña ha adügüdarutiña nuagu?

KA UAGU SÚDINI LUBÉI?

Ánhabu árügüda luagu le bafiñerubei, buguyaba abugurei bibagari; mámaba amu ahandilihabu.

KABA HAMUGA BADÜGA?

Saminabá luagun sügǘ le: aba tádühan lanigi Brian dan le larihini ayarafadeina haña lan bián hádangiñe lupaanágu luagun. Lídanrügü dimaasu le, biámaali wéiyaasu héredun luagu lun lagumulahan. Anihánba lǘrüwan.

Ábati lariñagun aban hádangiñe lun:

“Abunháñoun san bábugua, hin? Han, darí báamuga bisebáhari”.

Aba lasagarun aban katei lubuseedurugugiñe, aba línchuni lun Brian sun aniha lan ámuruda aban lídangiñe lagu lun.

Aba larihin Brian luagun sígaru le labadinaguabei lifinga lúhabu nibureinti le, ábatimati tádühan lanigi.

“Uá, mabusenrun numuti bisigarun, ariñagaadina bun...”.

Aba ladüraaguni le aban nibureinti, aba lariñagun: “Ka mégeiboun bun, hin? Odi hanufudetibu?”.

“Uá, mama nanufude”, liña lóunabun Brian lauraü lagumuhóun ganigi le erederubei lun.

Ábati lóuburuni nibureinti le Brian luéigiñe lege ariñageina lun lau gamadóuni: “Ragüba aban hin, mama gusan amu katei le luéidigia sígaru”.

Ábati línchuni le aban nibureinti sígaru luagun ligibu Brian agülülüheina lun: “Mariñagun wabéi ni ka un. Wádanguarügüba leredera”.

Lun hamuga buguya lan Brian, kaba hamuga badüga?

 RÁRAMABA ASAMINARA

Afiñetibu san subudi hamani lupaanágu Brian ka lan hadaagubei? Afiñetibu san hagía lan desidírübaña houngua? Chóuruti mítaran lan. Másiñati rédeirügü hamá afalarei le hadaagubei amu. Kei busén habéi héiguadun buidu houn amu, ligía hígirunbei lun amu lan desidírü hawagu.

Lun hamuga badunragun luma aban sügǘ ítarati, hínsiñeti hamuga san bun lun amu lan ligaburi bóuserun hawéi, mafalara báamugaña ha éredutiña buagu lun badügüni le wuribabei?

  1. ARANSEBÁ

    Ariñagatu Bíbülia: “Ha buídubaña ichügü harihini denchaü hegeyedun luéi; ánhañati ha ibidiouguabaña aau, ñǘdünrügütiña lubaroun ábati hasufuriruni damichi” (Ariñawagúni 22:3).

    Liibe-agei dan, arihúati anhein lanügüba lubéi aban katei turobuli. Saminabá abutén lan éibugeina ani aba barihin añaha lan fiu nibureintiña agumulaha. Anhein gabaroun bubalin ka lan turobuli gayaraabei lanügüni lira bun, aranseñu buba lun bagagibudagun luma.

  2. SAMINABÁ

    Ariñagatu Bíbülia: “Harumatá hanigi” (1 Féduru 3:16).

    Álügüdaguaba bungua: “Ida luba san nasandiragun nungua anhein nafalara sun le hadaagubei gürigia?”. Másiñati béiguaduba lan buidu houn bupaanágu, íbini luágurügü lan murusun dan. Gama lumoun, ida luba san basandiragun bungua lárigiñe? Himei bumuti san babulieiduni kátabu lan luma ka lan súdinibei bun lúnrügü béiguadun buidu houn bupaanágu? (Áfuriduni 23:2).

  3. DESIDIRÜBÁ

    Ariñagatu Bíbülia: “Hanufudetiña ha chúbaña aau luéi wuribani ani aba hadisedun luéi” (Ariñawagúni 14:16).

    Úati ni aban wádangiñe esefuruti luéi desidírü lan ni luéi lóuyuahan lau le lanügübei le desidírü lubéi. Abahüdaguatu Bíbülia woun hawagu wügüriña ha meha desidírübaña buidu, kéiburi Hosé, Hobu luma Hesusu, gama lumoun abahüdaguatu giñe woun hawagu amu ha meha desidírübaña wuriba, kéiburi Kaín, Esaú luma Húdasi. Agia buguya, kaba badüga?

Ariñagatu Bíbülia: “Gúnfuliba súnwandan” (Sálumu 37:3). Anhein ráramaguaadibu lubéi asaminara luagun sun le gayaraabei lanügüni ligaburi bóuserun bun ani desidírü baali kaba lan badüga, ménrenguntimabei bun bariñaguni houn amu ka lan basaminarubei. Aban katei wéiriti lisudinin lira.

Máhüchüraba, mama mosu básurun ariñaga houn bupaanágu. Buídurügübei bariñagun houn furangu: uá. Gayaraati giñe bachoururagüdüni houn masansirun bubéi lan baritagun lau bariñagun:

  • “Mádarabana lidoun badaagun”.

  • “Madaagun numutu katoun burí to”.

  • “Subudi baali ka lan nasaminarubei luagu lira”.

Súdiniti lun deregüda ban houn óunaba buguyame lau lóufudagun. Anhein badüga ítara, másiñati taweiriduba lan banigi lau barihini lufuresen hígirunibu bupaanágu bungua.

 KABA NADÜGA ANHEIN ADÜGǗWA BULA NAU?

Anhein badüga sun le hariñagubei bupaanágu, hahandilihabadibu kei hadibiri.

Gayaraati híchugunibu bupaanágu lidoun busiganu. Háfuga hariñagun bun: “Ka san mégeibei bun? Banufude!”. Kamaniti lariñawagún lira dan le ladügüdarúña lan hawagu amu lun hadügüni le wuribabei. Ka lunbei badügüni? Gayaraati badügün bián katei:

  • Basigiruni huraraü. Gayaraati bariñagun: “Letia lúgubu hanufude nan!”. Ábameti bafuranguagüdüni houn ka lan uagu.

  • Bagarabaaguni dimurei houn. Afuranguagüdabéi houn ka lan uagu madügün bubéi lubéi, ábameti bariñagun: “Magumulahántiña gürigia ha chúbaña aau”.

Ánhaña asigira íchiga lidere dan bun, beiba ñéingiñe. Mabulieidabéi eibu lanme bálüdün ñein, hanarimetimabei héredun buagu. Lau bidin ñéingiñe, barufudubei houn buguya lan desidírübalin kaba lan badüga.

Meyeedagua wamá woungua: siñati lanurahan gürigia sunsuinagubei luéi hadügüdarun amu luagu. Gama lumoun, gayaraati desidírü bani ida luba lan bóunabun, basubudiragüdüni houn furangu ka lan basaminarubei ragügua buguyame bungua. Buguya lunbei desidírü ban (Hosué 24:15).