Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Lóunabagüle 10 hálügüdahan nibureintiña

 ÁLÜGÜDAHANI 9

Lunti san nafiñerun saliguarügü lan sun katei?

Lunti san nafiñerun saliguarügü lan sun katei?

KA UAGU SÚDINI LUBÉI?

Anhein inarüni lubéi saliguarügü lan sun katei úati amu isuuni lun wabagari luéidigia wawinwandun fiuraü irumu ani súnhame. Ligía funa san lisuunibei wabagari o anihein amu isuuni lun? Anhein adügǘwarügü wabéi, wadarirubei lóunabagüle álügüdahani burí le.

KABA HAMUGA BADÜGA?

Saminabá luagun sügǘ le: ibidiñe lun Alex kaba lan lafiñera. Lúmagiñe furumiñeti dan lafiñerun Bungiu lan adügübalin sun katei. Gama lumoun, guentó, wéiriti lagiribuhan lumaisturun luagu arufuda laali lan siensia saliguarügü lan sun katei. Mabusenrunti Alex lun larihíniwa kei aban ibidiougua tau, ábati lariñagun lúnguarügü: “Ánheinti chouru hamaali lubéi aturiahatiña siensia saliguarügü lan sun katei, kátañadinagia lun nasigenerubaña lan?”.

Lun hamuga buguya lan Alex, bafiñeruña hamuga san saliguarügü lan sun katei ladügarügü ligía lan ariñawagúbei tidan burí líburu?

RÁRAMABA ASAMINARA

Añahein gürigia, masaminaruntiña bián wéiyaasu lubá hariñagun afiñe hamá, o luagu saliguarügü lan sun katei o luagu adügǘwarügü lan, gama lumoun, ibidiñeti houn ida luba lan hafuranguagüdüni ka lan uagu hafiñerei le hafiñerubei.

  • Añahein afiñetiña luagu adügǘwarügü lan sun katei ladügarügü ligía lan arufudahóubei houn ligilisirugu.

  • Añahein amu, afiñetiña luagu saliguarügü lan sun katei ladüga ligía lan arufudahóubei houn leskuelarugu.

 SISI ÁLÜGÜDAHANI LE LUNBEI BADÜGÜNI BÚNIWAGUA

Ariñagati Ebüréu 3:4: “Sun muna adügarügü lumutu somu gürigia; gama lumoun Bungiu adügübalin sun katei le aniheinbei”. Darí bumuti san liricha le tariñagubei Bíbülia lidan bérusu le?

Ítara liña lariñawagún ua lan Adügüti sun katei kéigubeirügü lariñawagún muna lan to adügaguboun tungua.

LE ARIÑAWAGÚBEI: Aduuchuni le unbei laguarúa Big Bang adügübei lun ñein lan sun le aniheinbei.

1. Ka gürigia o katei adügübei lun lasuseredun Big Bang?

2. Kátima ménrengunbei lafiñerúniwa: saliguarügü lan sun katei o anihein lan adügüti?

LE ARIÑAWAGÚBEI: Hádangiñe animaalugu hayabin gürigia.

3. Anhein hádangiñe lubéi animaalugu wayabin —kéiburi hamuga babunu—, ka uagu wéiritima lubéi lichú wau hawéi?

4. Ka uagu gürewei lubéi gunfurandawa lan íbini luwuyeri ibagari létima genegebei “manarimegu” lan?

LE ARIÑAWAGÚBEI: Anihein saragu katei le arufuduti saliguarügü lan sun katei.

5. Barǘ laali san gürigia le ariñagubalin dimurei le lidaani akutihei katei le lungua buidu?

6. Átirihaña san gürigia afiñerutiña saliguarügü lan sun katei ladügarügü ariñawagúaali lan houn afiñe hamá gürigia ha chúbaña aau luagu?

“Saminabá béibuguña lan lidan aban dabíara ani aba barihin aban tubuidun muna lautu fulansu ñein. Chóuruti masaminarunbadibu lan: ‘Hée! Héiguarügütu funatia fiu tídibu wewe lidoun fulasu le tasaliragunbei muna to ya’. Ma libidiounigan hamuga aau lira? Ligíati, kaba uagu wafiñera saliguarügü lan sun katei?” (Julia).

“Lun hamuga lariñagun aban gürigia bun dan le lan laduuchunbei aban katei tidan muna to ñein lubéi tadügǘwa líburu aba lan ladügün tinta le abahichagubei lidoun sun fulasu lun tasaliragun aban líburu to afuranguagüdübalin lila dimurei, bafiñeruñein hamuga?” (Gwen).

 KA RESUN NÚMABEI LUN NAFIÑERUN LUAGU BUNGIU?

Ariñagatu Bíbülia: “Hóuchagua huméi sun arufudahani” (1 Tesalónikana 5:21). Lidan amu dimurei, moun lumuti bafiñerun aban katei ladügarügü:

  • BASANDIRUNI: “Sanditina tidan nanigi anihein lan somu ubafu wéiriguti”.

  • LE HAFIÑERUBEI AMU: “Sun gürigia ha geyegubaña nau afiñetiña luagu Bungiu”.

  • LE HABUSENRUBEI AMU LUN BAFIÑERUNI: “Ariñawagúati nun wábiñe mosu lan nafiñerun luagu Bungiu”.

Lubaragiñe bidin láurügü le basandirubei, barihibei o baganbubei, lunti bachoururuni bungua ka lan lébunabei bafiñeruni le bafiñerubei.

“Dan le lafuranguagüdüni numaisturun leskuelarugu ida liña lan lawadigimaridun wágubu, ábatima nachoururuni anihein lan Bungiu. Huuti kada aban lídangiñe lumegegun wágubu íbini masudinin lan larihín. Liibe-agei dan, míchugubeitiwa fe ka lan asuseredubei lidan. Wéirigüda lumutu katei le nanigi!” (Teresa).

“Dan le narihin aban muna to wéiriti tiñun o aban waporu o aban karü, aba nálügüdagun nungua: ‘Ka funa san adügübarun?’. Le linarün katei, mosu ábanba lan gürigia le wéiriti lichú lau adüga aban karü lugundun gíbeti lirahüñü umegeguni tuagu ani mosu lafidirún kada aban keisi lubudubu awadigimarida láamuga buidu. Ligíati, anhein anihein lubéi adügüti karü, anihein giñe adügüti sun katei” (Richard).

“Eibu meha nawanserun lidan naturiahan siensia, ábatima meha lagüreweidun nun nafiñeruni saliguarügü lan sun katei. [...] Afiñetina mégeiwatima lan afiñeni lun lafiñerúniwa saliguarügü lan sun katei sügǘ lau lafiñerúniwa anihein lan Aban le adügübalin sun katei” (Anthony).

SAMINABÁ LUAGUN LE

Lau sun barühaña lan aturiahatiña siensia saragu irumu akutiha libügürü katei le, ámuñegueinarügümemegili ligaburi hasaminan hawariuagua libügürü ida liña lan lasaliragun sun katei. Ani anhein ni lubéi hagía múaraduntiña lidan le hariñagubei —ani hagía nege sásaamubaña—, kábati uagu bafiñera luagu arufudahani le?