Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Lóunabagüle 10 hálügüdahan nibureintiña

 ÁLÜGÜDAHANI 8

Ka lunbei nasubudiruni luagu lananihóun houn amu lun agamariduni?

Ka lunbei nasubudiruni luagu lananihóun houn amu lun agamariduni?

KA UAGU SÚDINI LUBÉI?

Sagü irumu, águrawaguatiña o fósuwatiña saragu míñunu gürigia —hiibe-agei nibureingiña— lun gadan lániña katei lánina agamariduni le mabusenrun hamuti hadügün. *

KABA HAMUGA BADÜGA?

Lubaragiñebei meha tíchugun Annette fe luagu le asuseredubei chü laaru meha gürigia le busenbei lafosurunu múarugun. Ariñagatu: “Adüga numuti yebe sun niyaraati lun máguragun lánina. Hóuchatina nagúaragun, machülaagunti numalali. Ádaha numuti nuáriua, rúguatina kiki luagu, agayuaha nuguya luagu, fiyuguanéi lau núbara... darí lumoun oura le límiragunbalina tau lugusiñun. Aba lásiñarun nageindagun nuéigiñegua”.

Kaba hamuga badüga lidan aban sügǘ ítarati?

RÁRAMABA ASAMINARA

Íbini anhein duari bubéi —kéiburi dan le báfuridun guñoun—, gayaraati lasuseredun katei burí wuribati bun. Ariñagatu Bíbülia mama lan sun dan hagañeiruni ha furesebaña éibaaguni o buidu lan lidin houn ha chúbaña aau lugundun gayaraati lábürühan furumiñeguarügü “gürigia lidan magaradahan lan” (Apurichihati 9:11, 12).

Lidan tikesin Annette, aban gürigia le ibidiñeti tun águragubarun. Ánheinti lidan burí amu kesi, somu hasubudirágun gürigia adügübalin lira houn ani gayaraati aban lan haduhe. Díisirügügili meha irumu tau Noelia dan le láguragunbarun aban nibureinti le meha awinwandubei yarafa tun haban. “Mabahüdagun numuti meha ni ka un lidan lagumeseha —tiña Noelia— lugundun mama meha murusun anufudei luma busiganu le nasandirubei”.

 MAMA BUGUYA GADURUNBEI

Anihagua dan tasandiragun Annette tungua lau duru luagu le asuseredubei. Ariñagatu: “Saminatina ani saminaya nuguya luagun le asuseredubei guñoun ligía, afiñetina gayara lan hamuga meha nadügün ámuya katei nuéigiñegua. Inarüni aba lan lásiñarun nadügün ni kata lárigiñebei límiragunina, gama lumoun anahagua asaminara mosu lan hamuga meha nadügün ámuya katei”.

Sandiguatu giñe Noelia tungua lau duru. Ariñagatu: “Moun lumuti hamuga meha chóuruya lan nasandiragun nungua. Ígira hamutiwa meha wagübürigu lun wáhurerun bóugudi ánheingubeirügü úarañadiwa lubéi tuma namulelua, gama lumoun madügüntina gasu. Ligíati, afiñetina nuguya lan íchugubei chansi lun nubesinan lun láguragunina. Adügati le asuseredubei lun hasufurirun niduheñu saragu ani sanditina nídangiñeti lan hasandirunbei saragu igarigu. Ligíatima gáribei nun”.

Anhein sandigua bubéi bungua kei tasandiragun Annette tuma Noelia houngua, haritaguabei mama lan lau lugundan gürigia lágurawagua. Barǘ hamuti saragu gürigia katei le kei ni kata lau hariñagun gürigia lan le águrawagubei áluahabalin lungua. Gama lumoun, úati gadünati lásügürün lídangiñe aban katei wéiriti luriban kei lira. Anhein águrawaguaadibu lubéi, chóurubei mama lan bidurun.

Ménrenguntimati lariñawagún sügǘ lau lafiñerúniwa. Añahein águrawaguaaña, mabahüdagun hamuti le asuseredubei houn, ábati hagagibudagun hábugua luma luriban burí katei le hasandirubei, duru laganagua. Kati asagarubei buiti lídangiñe bámanichun lau le asuseredubei? Buguya o le águragubalibu? Ma buítimati hamuga báluahan ídemuei?

ABAHÜDAGUABÉI LE ASUSEREDUBEI

Abahüdaguatu Bíbülia dan le lan meha lásügürüña lubéi aban wügüri úaraguati gíriti Hobu lídangiñe saragu asufuriruni, ariñagati: “Nayanuha, awaragua náamuga, níchiga budan lun nigarigu” (Hobu 10:1). Másiñati líderagubadibu lan babahüdaguni le basandirubei tidan banigi lun gürigia le uáguti bafiñera lun bánharun lun le asuseredubei luma lun basandiragun bungua buidu.

Ayanuhabá luma somu gürigia le gayaraati líderagunibu. Másiñati hǘrüya lan banügün lun banügüni bábugua.

Ligía tadügübei Annette ani íderagua lumutu. Ariñagatu: “Aba nayanuhan tuma besi numada, ábati tariñagun nun lun nabahüdaguni houn bián wéiyaaña lidan afiñeni. Seremei nadügüni. Ñurutiña ayanuha numa lóugiñe aban wéiyaasu ani ariñaga hamuti létima nemegeirubei naganbun nun: mama lan nuguya gadurunbei luagu le asuseredubei”.

Abahüdagua tumuti Noelia le asuseredubei tun houn tagübürigu. Ariñagatu: “Aba híchuguni sun ídemuei le nemegeirubei nun. Ínchaha hamutina lun nayanuhan luagu le asuseredubei, íderagua lumutinati lira lun láfarun íruni luma igañi le nasandirubei tidan nanigi”.

Sanditu giñe Noelia saragu awalidaguni dan le tafurieidun. Ariñagatu: “Íderagua lumutina nayanuhan luma Bungiu, dántima le nasandirun siñá lan nadimurehan luma amu gürigia luagu katei le. Gayaraati nabahüdaguni sun le nasandirubei lun Bungiu, ruti katei le saragu darangilaü nun”.

Barihibei giñe anihein lan “lidaani agaranihani” (Apurichihati 3:3). Góunigibei bátuadi luma ligaburi basandiragun bungua, emeraaguabá buidu. Ani le súdinitimabei: áluahabei Heowá, Bungiu le gíchigadibei gurasu (2 Korintuna 1:3, 4).

 GARUMUDIRIHAADIBU SAN LUN GADARI BAN?

Anhein afuuda badari bun lun badügün magíaguni luma, ariñagabá lun furangu: “Madügabéi le!” o “Disebá nuéi!”. Mámanichaba ladügarügü mabusenrun ban ladüraaguni lidaradun buma. Ánhabu lígira, mámarügü liña gürigia buiti. Aban gürigia le buídutimati luéi badünabei: aban le unti inebe ban inebehabu ligía lun gumadi lánina laruman ibagari le bafalarubei.

ANANIHÓUNI SAN LIRA?

“Dan meha le 13 o 14 lubéi irumu nau, ábaha hachawahani nupaanágu eyeriñu leskuelarugu tidirandin nibürasiérün nanagangiñe ani ábaha hariñagun katei wíyeti nun, kéiburi: ‘Barihubei buídubei lan básügürüni danme le badügüni numa’” (Coretta).

Lau le hadügübei nibureintiña ha, bariñaguña hamuga san...

  1. ... háhureruña lan?

  2. ... hadarihañoun lan?

  3. ... hananihaña lan tun?

“Aba meha lagumeserun aban nibureinti aguruha nuagu tidan busu ariñaga ligía katei wíyeti nun. Aba napataaruni ariñaga nuguya lun lun ladisedun nuéi. Ábati laríagunina kamá hamuga lǘlühali nau” (Candice).

Lau le ladügübei nibureinti le, bariñaguña hamuga san...

  1. ... láhureruña lan?

  2. ... ladarihañoun lan?

  3. ... lananihaña lan tun?

“Sun meha irumu lau aban nibureinti ariñaga nun hínsiñe nan lun ani busén lan ladari nan. Máhatina meha lun. Anihein meha dan lasupahani narüna. Ani merede lumuti meha ladügüni lau sun ariñaga nan lun lun hebé lan ladügüni. Aban weyu, dan le nagürüñoun lan nisabadun, aba lapouchuni nanagangiñeti” (Bethany).

Lau le ladügübei nibureinti le, bariñaguña hamuga san...

  1. ... láhureruña lan?

  2. ... ladarihañoun lan?

  3. ... lananihaña lan tun?

Le ariñawagúbei lidan létüra C ligía óunabagüleibei lidan ǘrüwagubei sügǘ le.

Ka idan amu lan ananihóuni lun agamariduni luéi adarihani luma huraraü?

Masandiragunti le unbei lananihóua lungua buidu. Sigiti le ananihabei íchiga lidere dan lau sun ariñagaali lan le aban lun lun lígiruni lungua.

Denchati ananihóuni: gayaraati lagumuchun lidan águraguni.

^ par. 4 Lau sun hounba lan würiña nibureingiña ladimurehóua lidan arütíkulu le, lahuuduba giñe adundehani le lunbei lichugún ya houn wügüriña nibureingiña.