Keimon lidoun ariñahani

Keimon lidoun libiaman menú

Keimon lidoun tila

Gefentiña luagu Heowá

Garifuna

Lóunabagüle 10 hálügüdahan nibureintiña

 ÁLÜGÜDAHANI 4

Ida luba naransehani wuribati le nadügübei?

Ida luba naransehani wuribati le nadügübei?

KA UAGU SÚDINI LUBÉI?

Ánhabu ánhara lun bichara ábanbadibu gürigia le gúnfuliti ani gayaraabei lafiñerúniwa buagu.

KABA HAMUGA BADÜGA?

Saminabá luagun sügǘ le: láhureruña Tim bali hama lumadagu, sódini, dan le ladügürünu bali, aba toudin áfara luagu tibidiriun likarün lubesinan, aba labouchaguni mabusenrunga.

Lun hamuga buguya lan Tim, kaba hamuga badüga?

RÁRAMABA ASAMINARA

GAYARAATI BADÜGÜN ǗRÜWA KATEI:

  1. Béibaagun ñéingiñe.

  2. Bíchuguni duru luagun amu.

  3. Babahüdaguni lun bubesinan ka lan asuseredubei, ariñaga buguyame lun bafayeirubei lan damichi le badügübei.

Másiñati le lan ariñawagúbei lidan A babusenrubei badügün. Gama lumoun, meberesenga ka lan charati badügübei, súnwandan buídutimabei lan bánharun lun.

 ǗRÜWA RESUN LUN BÁNHARUN LUN BICHARA

  1. Ligía lunbei ladügǘniwa.

    Ariñagatu Bíbülia: “[Busentiwa] buidu lan wóuserun lidan sun katei” (Ebüréu 13:18).

  2. Ánhabu ánhara lun bichara, ménrenguntimabei feruduna hamanibu amu.

    Ariñagatu Bíbülia: “Mabuidunbei lidin lun le adouraguti lau lifigoun, anhein lun le agufeserubalin, ani ígiralei, ferudunawabei” (Proverbios 28:13, La Palabra de Dios para Todos).

  3. Ani le súdinitimabei: bagundaaragüdübei Heowá.

    Ariñagatu Bíbülia: “Mínsiñetiña ha wuribabaña igaburi lun Bungiu, ánheinti hama ha buídubaña [o haruma tóuserun], gamadaguati lungua” (Ariñawagúni 3:32).

Hóuchatu yebe Karina, to gúnfuliharuboun 20 irumu, taramuduni luéi túguchi resibi tan gárada lun tafayeihan seinsu ladüga tadüraaguni lúrudu lau fureseya lan tabugahan, gama lumoun, siñá tumuti aramuda lun sun dan. Ariñagatu: “Irumu lárigiñe, aba larihin núguchi aban gárada lau niri to ídanboun naguburahóua ladüga fureseya lan nabugahan. Turobuli san le ídounbei nádaragua nungua!”.

Ka larufudahabei le woun? Afuranguagüda tumuti Karina: “Gánwounrügüti turobuli dan le louchun gürigia laramuduni lichara. Súnwandan lachülürüba lan oura lun bóuyuahan lau le lanügübei luriban bóuserun”.

FURENDEIBÁ LÍDANGIÑE BICHARA

Ariñagatu Bíbülia: “Sun wagía charatiwa” (Santiagu 3:2). Ani ariha wamaali ánhabu lan ánhara lun bichara lau lóufudagun barufuduñein ǘnabugu ban ani derebugu lan bisaminan.

Lárigiñe lira, lunti bafurendeirun lídangiñe bichara. Ariñagatu aban nibureintu gíritu Bera: “Áfaaguatina lun narihini nichara kei aban chansi lun nafurendeirun. Furendeitina lídangiñe kada aban lídangiñe ani íderagua lumutina lira lúntima aban nan gürigia buitu. Ítarati, madügündigia náalime ligiaméme danya le nadunragun luma ligiaméme turobuli”. Kaba hamuga badüga lidan burí sügǘ le?

Aba lafuredeirúnu búguchi lubeikin bun, aba bagünrinchagunu. Kaba hamuga badüga?

  • Mariñagunbádina hamuga ni kata lun; háfuga míchugunbei fe.

  • Nabahüdaguñein hamuga inarüni lun.

  • Nariñaguñein hamuga lun ka lan asuseredubei, gama lumoun níchugubei hamuga duru luagun amu.

Másügürüntibu aban egüsámini ladüga maturiahan ban. Kaba hamuga badüga?

  • Nariñaguña hamuga wéiriya lan lénrengun egüsámini ligía.

  • Nariñaguñein hamuga nidurun lan ladüga maturiahan nan.

  • Nariñaguña hamuga iyereegu nan lun máisturu.

Dan le magida lani gürigia lisaminan luéi charati le meha ladügübei, ítara liña lira kéigubeirügü hamuga labugahaña lan karü magidarunga larihin tuéi isubusei to auboun lariha lárigoun.

 Guentó, saminayabá luagun bián sügǘ le, ábameti basaminarun buguya lan 1) búguchi 2) bumaisturun. Kaba hamuga hasaminara ánhabu ánhara lun bichara lau lóufudagun? Kaba hamuga hasaminara buagu anhein baramuda inarüni?

Guentó, saminabá luagun somu katei wuribati le badügübei irumu le, ábameti bóunabuni álügüdahani burí le:

Ka charati badügübei? Ka badügübei lárigiñe?

  • Hóuchatina naramuduni.

  • Aba níchuguni duru luagun amu.

  • Abahüdagua numuti inarüni lau lóufudagun.

Anhein aramuda bubalin bichara, ida liña basandiragun bungua lárigiñe?

  • Chaana kopu! Márügüdünwatina!

  • Wuribati nasandiragun nungua. Ariñaga numuti hamuga inarüni.

Ka hamuga lunbei badügüni lun badügüni katei buidu?

Ka bafurendeirubei lídangiñe charati ligía?

KA BASAMINARUBEI?

Ka uagu anihein lubéi dan hénrengu lan lun gürigia lánharun lun lichara?

Kaba hamuga hasaminara gürigia buagu anhein sun lubéi dan bau áluaha baramuduni bichara?

Kábati hasaminara ánhabu ánhara lun bichara? (Lúkasi 16:10).